ପାକିସ୍ତାନରୁ ଆମଦାନୀ, ରପ୍ତାନୀ ବ୍ୟାନ୍

ପହଲଗାମ ଆତଙ୍କବାଦ ଆକ୍ରମଣ ପରେ ପାକିସ୍ତାନ ବିରୋଧରେ ଆଉ ଏକ ବଡ଼ ପଦକ୍ଷେପ ନେଲା ଭାରତ । ପାକିସ୍ତାନରୁ ସମସ୍ତ ପ୍ରକାରର ଆମଦାନୀ, ରପ୍ତାନୀ ବ୍ୟାନ୍ କଲେ ଭାରତ ସରକାର । ଉଭୟ ପ୍ରତ୍ୟେକ୍ଷ ଓ ପରୋକ୍ଷ ଆମଦାନୀ, ରପ୍ତାନୀ ବ୍ୟାନ୍ କରାଯାଇଛି । ଏନେଇ ବାଣିଜ୍ୟ ମନ୍ତ୍ରଣାଳୟ ପକ୍ଷରୁ ସୂଚନା ଜାରି କରାଯାଇଛି ।

ପହଲଗାମ ଆତଙ୍କବାଦୀ ଆକ୍ରମଣ ପରେ, ଭାରତ ପ୍ରତିଦିନ ପାକିସ୍ତାନକୁ ବିରୋଧରେ କିଛି ନା କିଛି ପଦକ୍ଷେପ ନେଉଛି । ଆତଙ୍କବାଦୀ ଆକ୍ରମଣ ପରେ, ଭାରତ ଅଟାରୀ ସୀମା ବନ୍ଦ କରିଦେଇଥିଲା। ଏବେ ଭାରତ ପାକିସ୍ତାନ ସହିତ ଆମଦାନୀ-ରପ୍ତାନି ମଧ୍ୟ ବନ୍ଦ କରିଦେଇଛି। ଭାରତ ପୂର୍ବରୁ ପାକିସ୍ତାନ ପାଇଁ ତାର ଆକାଶପଥ ବନ୍ଦ କରିସାରିଛି।

ଭାରତ ସହିତ ଆମଦାନୀ-ରପ୍ତାନି ଏବଂ ବାଣିଜ୍ୟ ବନ୍ଦ ହେବା ଯୋଗୁଁ, ପାକିସ୍ତାନର ଆର୍ଥିକ ଅବସ୍ଥା ଆହୁରି ଖରାପ ହୋଇଯାଇ ପାରେ । ଆଜି ୩ ମଇରେ ଏକ ବିଜ୍ଞପ୍ତି ଜାରି କରି ଭାରତ ପାକିସ୍ତାନରୁ ଆସୁଥିବା ସାମଗ୍ରୀ ଆମଦାନୀ ଉପରେ ରୋକ୍ ଲଗାଇଛି। ସାମଗ୍ରୀଗୁଡ଼ିକ ପ୍ରତ୍ୟକ୍ଷ ଭାବରେ କିମ୍ବା ପରୋକ୍ଷ ଭାବରେ କିମ୍ବା ତୃତୀୟ ପକ୍ଷ ମାଧ୍ୟମରେ ଆସୁ, ସମସ୍ତଙ୍କ ଉପରେ ପ୍ରତିବନ୍ଧକ ଲଗାଯାଇଛି ।

ପାକିସ୍ତାନକୁ ଆର୍ଥିକ ଦୃଷ୍ଟିରୁ ଦୁର୍ବଳ କରିବା ପାଇଁ, ଭାରତ IMF, ବିଶ୍ୱ ବ୍ୟାଙ୍କ ଏବଂ ଏସୀୟ ବିକାଶ ବ୍ୟାଙ୍କ ଦ୍ୱାରା ପାକିସ୍ତାନକୁ ଦିଆଯାଇଥିବା ଅନ୍ତର୍ଜାତୀୟ ଆର୍ଥିକ ସହାୟତାର ପୁନଃମୂଲ୍ୟାୟନ ଦାବି କରିପାରେ । ସରକାରୀ ସୂତ୍ର ଅନୁଯାୟୀ, ଭାରତ ଅଭିଯୋଗ କରୁଛି ଯେ ପାକିସ୍ତାନକୁ ଦିଆଯାଉଥିବା ଆର୍ଥିକ ସହାୟତା ଆତଙ୍କବାଦକୁ ପ୍ରୋତ୍ସାହିତ କରିବା ଏବଂ ଆତଙ୍କବାଦୀଙ୍କୁ ଆଶ୍ରୟ ଦେବା ପାଇଁ ବ୍ୟବହୃତ ହେଉଛି, ତେଣୁ ପାକିସ୍ତାନକୁ ଦିଆଯାଉଥିବା ପାଣ୍ଠି ବନ୍ଦ କରାଯିବ।

ଭାରତ ପାକିସ୍ତାନକୁ ଫାଇନାନ୍ସିଆଲ୍ ଆକ୍ସନ୍ ଟାସ୍କ ଫୋର୍ସ (FATF)ର 'ଗ୍ରେ ତାଲିକା'ରେ ସାମିଲ କରିବାକୁ ଚେଷ୍ଟା କରିବ ଯାହା ଦ୍ଵାରା ପାକିସ୍ତାନ ଉପରେ ଆର୍ଥିକ ଚାପ ପକାଯିବ। ଜୁନ୍‌ରେ ହେବାକୁ ଥିବା FATF ବୈଠକରେ ଭାରତ ଏହି ଦାବି ଉଠାଇବା ନେଇ ସୂଚନା ରହିଛି ।