ସରକାର ଏବଂ ୟୁଜିସିକୁ ତଥ୍ୟ ମାଗିଲେ ସୁପ୍ରିମକୋର୍ଟ

ଘରୋଇ ବିଶ୍ୱବିଦ୍ୟାଳୟ ପରିଚାଳନା ସମ୍ବନ୍ଧରେ ସେମାନେ ସମସ୍ତ କାଗଜପତ୍ର ସରକାରଙ୍କୁ ଦାଖଲ କରିବେ । ଦେଶରେ ହୁହୁ ହୋଇ ଗଢି ଉଠୁଥିବା ଘରୋଇ ଶିକ୍ଷାନୁଷ୍ଠାନର କାର୍ଯ୍ୟପ୍ରଣାଳୀ, ନିୟମ ଏବଂ ଏହାର ଢାଞ୍ଚାର ଯାଞ୍ଚ୍ କରିବା ପାଇଁ କେନ୍ଦ୍ର ସରକାର, ବିଭିନ୍ନ ରାଜ୍ୟ ସରକାର ଏବଂ ବିଶ୍ୱବିଦ୍ୟାଳୟ ଅନୁଦାନ କମିଶନ ବା ୟୁଜିସିକୁ ସର୍ବୋଚ୍ଚ ନ୍ୟାୟାଳୟ ନିର୍ଦ୍ଦେଶ ଦେଇଛନ୍ତି । ଏହାର ରିପୋର୍ଟ କୋର୍ଟଙ୍କୁ ପ୍ରଦାନ କରିବା ପାଇଁ ମଧ୍ୟ ନିର୍ଦ୍ଦେଶ ଦିଆଯାଇଛି ।

ସୁପ୍ରିମକୋର୍ଟ କହିଛନ୍ତି ଯେ, ତଥ୍ୟକୁ ଲୁଚାଯାଇ ପାରିବ ନାହିଁ । ଏଥିରେ କିଛି ଟ୍ୟାମ୍ପରିଂ କରିବା ଠିକ୍ ନୁହେଁ । ସମସ୍ତ ଘରୋଇ ବିଶ୍ବବିଦ୍ୟାଳର ନୀତି, ନିୟମ, କର୍ତ୍ତବ୍ୟ, ପ୍ରତିଷ୍ଠାର ଢାଞ୍ଚାକୁ ୟୁଜିସି ଯାଞ୍ଚ୍ କରିବା ଦରକାର । ଘରୋଇ ବିଶ୍ୱବିଦ୍ୟାଳୟର ବାସ୍ତବିକ ସ୍ଥିତି ଏବଂ ବ୍ୟବସ୍ଥା ସମସ୍ତେ ଜାଣିବା ଜରୁରୀ ।

ଜଷ୍ଟିସ ଅହସାନୁଦ୍ଦୀନ ଅମାନୁଲ୍ଲାହ ଏବଂ ଜଷ୍ଟିସ ଏନବି ଅଞ୍ଜାରିଆଙ୍କୁ ନେଇ ଗଠିତ ଖଣ୍ଡପୀଠ କହିଛନ୍ତି ଯେ, ୟୁଜିସି ଅଧିକ ତତ୍ପରତାର ସହ କାମ କରିବା ଆବଶ୍ୟକ । ବିଶ୍ବବିଦ୍ୟାଳୟର ଛାତ୍ର ପ୍ରବେଶ ନୀତି ବା ନାମଲେଖା, ଶିକ୍ଷକଙ୍କ ନିଯୁକ୍ତି ପ୍ରକ୍ରିୟା, ନିୟାମକ ଯାଞ୍ଚ ଓ ସରକାରଙ୍କଠୁ ମିଳୁଥିବା ସୁବିଧା ସୁଯୋଗର ଅନୁପାଳନ ହେଉଛି ନା ନାହିଁ ସେନେଇ ୟୁଜିସି ଦୃଷ୍ଟି ଦେବା ଉଚିତ । ଏନଜିଓ ଏବଂ ଟ୍ରଷ୍ଟ ଦ୍ୱାରା ଏହା ପରିଚାଳିତ ହେଉଛି ନା ନାହିଁ ତାହାର ଯାଞ୍ଚ ହେବା ଦରକାର । ସରକାରଙ୍କ ପାଖରେ ଏନେଇ ସ୍ପଷ୍ଟ ତଥ୍ୟ ରହିବା ଜରୁରି । ପାଠ ପଢୁଥିବା ଛାତ୍ରଛାତ୍ରୀ ଏବଂ କର୍ମଚାରୀଙ୍କ ପାଇଁ ୟୁନିଭର୍ସିଟିରେ ଅଭିଯୋଗ ପ୍ରକୋଷ୍ଠ ରହିବା ନେଇ ସରକାର ସୁନିଶ୍ଚିତ କରିବା ଆବଶ୍ୟକ ବୋଲି ଖଣ୍ଡପୀଠ କହିଛନ୍ତି।

କୋର୍ଟ ଆହୁରି ନିର୍ଦ୍ଦେଶ ଦେଇଛନ୍ତି ଯେ, କେନ୍ଦ୍ରୀୟ ସ୍ତରରେ କ୍ୟାବିନେଟ୍ ସଚିବ ଏବଂ ସମସ୍ତ ରାଜ୍ୟର ମୁଖ୍ୟ ଶାସନ ସଚିବ ବିଶ୍ୱବିଦ୍ୟାଳୟର ତଥ୍ୟ ହାସଲ କରିବେ । ଏଥିରେ କୌଣସି ସତ କିମ୍ବା ତଥ୍ୟକୁ ଲୁଚାଯାଇପାରିବ ନାହିଁ । ଯଦି କୌଣସି ଅନିୟମିତତା ହୋଇଥିବା ଜଣାପଡେ ତେବେ କୋର୍ଟ ଏଦିଗରେ କଡା କାର୍ଯ୍ୟାନୁଷ୍ଠାନ ନେବେ ।

ସୂଚନାଯୋଗ୍ୟ, ଆମିଟୀ ୟୁନିଭର୍ସିଟି ବିରୋଧରେ ଜଣେ ଛାତ୍ରୀଙ୍କ ନାମ ପରିବର୍ତ୍ତନ ସମ୍ପର୍କୀୟ ମାମଲାର ଶୁଣାଣିରୁ ୟୁନିଭର୍ସିଟି ଏବଂ ୟୁଜିସିର ଉତ୍ତରାଦାୟିତ୍ୱ ଯାଏଁ କଥା ପହଁଚିଥିଲା । ଅନ୍ୟ ଏକ ଜନ ସ୍ୱାର୍ଥ ମାମଲାର ଶୁଣାଣି କରି କୋର୍ଟ ଘରୋଇ ବିଶ୍ବବିଦ୍ୟାଳୟକୁ କିପରି ନିୟନ୍ତ୍ରଣ କରାଯିବ ସେନେଇ ପ୍ରଶ୍ନ କରିଥିଲେ ।