ପାକିସ୍ତାନକୁ ଆଉ ଏକ ଶକ୍ତ ଝଟକା,ଚେନାବ ନଦୀର ପାଣି ରୋକିଲା ଭାରତ

ପହଲଗାମ ଆତଙ୍କବାଦୀ ଆକ୍ରମଣ ପରଠାରୁ ଭାରତ ତାର କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିଚାଲିଛି। ପାକିସ୍ତାନକୁ ଦଣ୍ଡ ଦେବା ପାଇଁ ସିନ୍ଧୁ ଜଳ ଚୁକ୍ତିନାମାକୁ ସ୍ଥଗିତ ରଖିବାର କିଛି ଦିନ ପରେ, ଭାରତ ପୁଣି ଚେନାବ ନଦୀର ବାଗଲିହାର ଡ୍ୟାମ୍‌ ଦେଇ ଜଳ ପ୍ରବାହ ବନ୍ଦ କରିଛି। ଝେଲମ ନଦୀର କିଶନଗଙ୍ଗା ଡ୍ୟାମରେ ସମାନ ପଦକ୍ଷେପ ନେବା ପାଇଁ ଯୋଜନା କରୁଛି। ଜମ୍ମୁର ରାମବନରେ ଥିବା ବାଗଲିହାର ଜଳବିଦ୍ୟୁତ୍ ବନ୍ଧ ଏବଂ ଉତ୍ତର କାଶ୍ମୀରର କିଶନଗଙ୍ଗା ଜଳବିଦ୍ୟୁତ୍ ବନ୍ଧ ଭାରତକୁ ପାଣି ଛାଡିବାର ସମୟକୁ ନିୟନ୍ତ୍ରଣ କରିବାର କ୍ଷମତା ରଖିଛି।

ଜମ୍ମୁ ଏବଂ କାଶ୍ମୀରର ପହଲଗାମରେ ଆତଙ୍କବାଦୀ ଆକ୍ରମଣ ପରେ ଭାରତ ପୁରୁଣା ଚୁକ୍ତିନାମାକୁ ସ୍ଥଗିତ କରିବାକୁ ନିଷ୍ପତ୍ତି ନେଇଥିଲା। ଏହି ଆକ୍ରମଣରେ ୨୬ ଜଣଙ୍କର ମୃତ୍ୟୁ ହୋଇଥିଲା। ବିଶ୍ୱ ବ୍ୟାଙ୍କ ଦ୍ୱାରା ମଧ୍ୟସ୍ଥତା ହୋଇଥିବା ସିନ୍ଧୁ ଜଳ ଚୁକ୍ତିନାମା ୧୯୬୦ ମସିହାରୁ ଭାରତ ଏବଂ ପାକିସ୍ତାନ ମଧ୍ୟରେ ସିନ୍ଧୁ ନଦୀ ଏବଂ ଏହାର ଶାଖା ନଦୀଗୁଡ଼ିକର ବ୍ୟବହାରକୁ ନିୟନ୍ତ୍ରଣ କରିଆସୁଛି।

ବାଗଲିହାର ଡ୍ୟାମ ଦୀର୍ଘ ଦିନ ଧରି ଦୁଇ ପଡ଼ୋଶୀଙ୍କ ମଧ୍ୟରେ ବିବାଦର ବିଷୟ ହୋଇଆସିଛି। ପାକିସ୍ତାନ ଏହି ମାମଲାରେ ବିଶ୍ୱ ବ୍ୟାଙ୍କର ମଧ୍ୟସ୍ଥତା ଲୋଡିଛି। ୧୯୬୦ ମସିହାରେ ଭାରତର ପ୍ରଧାନମନ୍ତ୍ରୀ ଜବାହରଲାଲ ନେହେରୁ ଏବଂ ପାକିସ୍ତାନର ରାଷ୍ଟ୍ରପତି ଆୟୁବ ଖାନଙ୍କ ଦ୍ୱାରା ସ୍ୱାକ୍ଷରିତ ସିନ୍ଧୁ ଜଳ ଚୁକ୍ତିନାମା ବିଶ୍ୱ ବ୍ୟାଙ୍କ ଦ୍ୱାରା ମଧ୍ୟସ୍ଥତାରେ ଏକ ଐତିହାସିକ ଚୁକ୍ତିନାମା ଥିଲା।

୨୨ ଏପ୍ରିଲରେ ଜମ୍ମୁ ଏବଂ କାଶ୍ମୀରର ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣ ପରେ ଭାରତ ପାକିସ୍ତାନ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିଛି ଏବଂ କୂଟନୈତିକ, ଅର୍ଥନୈତିକ ଏବଂ ଜଳସମ୍ପଦ ସହ ଜଡ଼ିତ ଅନେକ ନିଷ୍ପତ୍ତି କାର୍ଯ୍ୟକାରୀ କରିଛି। ଏହାର ଜବାବରେ, ଭାରତ ସରକାର ସିନ୍ଧୁ ଜଳ ଚୁକ୍ତିନାମାକୁ ସ୍ଥଗିତ ରଖିବା ଘୋଷଣା କରିଛନ୍ତି ଏବଂ ପାକିସ୍ତାନକୁ ପ୍ରବାହିତ ନଦୀ, ବିଶେଷକରି ଚେନାବ ଏବଂ ଝେଲମ ନଦୀର ଜଳ ପ୍ରବାହକୁ ନିୟନ୍ତ୍ରଣ କରିବା ପାଇଁ ପଦକ୍ଷେପ ନେଇଛନ୍ତି। ଅଧିକାରୀଙ୍କ ଅନୁଯାୟୀ, ବାଗଲିହାର ଡ୍ୟାମ (ଚେନାବ ନଦୀ ଉପରେ)ରୁ ଜଳ ଯୋଗାଣ କାଟ ଆରମ୍ଭ କରାଯାଇଛି, ଯେତେବେଳେ କିଶନଗଙ୍ଗା ଡ୍ୟାମ (ଝେଲମର ଏକ ଶାଖା ନଦୀ ନୀଲମ ନଦୀ ଉପରେ)ରେ ସମାନ ପଦକ୍ଷେପ ନେବାର ଯୋଜନା କରାଯାଉଛି।