ନୀତୀଶଙ୍କୁ ଲାଗିଲା ବଡ଼ ଝଟକା, ଜେଡିୟୁ ପ୍ରାର୍ଥୀଙ୍କୁ ହରାଇଲେ ସ୍ୱାଧୀନ ପ୍ରାର୍ଥୀ

ଲୋକସଭା ନିର୍ବାଚନ ପରେ ୭ ରାଜ୍ୟରେ ୧୩ ବିଧାନସଭା ଆସନରେ ଉପନିର୍ବାଚନ ହୋଇଛି । ଆଜି ଏହାର ଗଣତି ଚାଲିଛି । ୧୩ ବିଧାନସଭା ଆସନରୁ ଅଧିକାଂଶ ଆସନରେ ଆଗରେ ରହିଛି ଇଣ୍ଡିଆ ମେଂଟ । ୧୧ଟି ଆସନରୁ ୯ଟିରେ ଇଣ୍ଡିଆ ମେଂଟ ପ୍ରାର୍ଥୀ ଆଗରେ ରହିଛନ୍ତି । ଯାହା କେନ୍ଦ୍ରର ଶାସକ ଦଳ ବିଜେପି ପାଇଁ ଗୋଟିଏ ବଡ ଘାଟା । ଆଉ ଏହାରି ମଧ୍ୟରେ ବିହାର ପୁର୍ଣ୍ଣିମା ଜିଲାର ରୁପୈଲି ବିଧାନସଭା ଆସନ ପାଇଁ ହୋଇଥିବା ଉପ ନିର୍ବାଚନ ଫଳ ସାମ୍ନାକୁ ଆସିଛି ।

ସ୍ୱାଧୀନ ପ୍ରାର୍ଥୀ ଶଙ୍କର ସିଂଙ୍କ ଉପରେ ଜନତା ଭରଷା କରିଛନ୍ତି । ଜେଡ଼ିୟୁ ପ୍ରାର୍ଥୀ କଳାଧର ମଣ୍ଡଳଙ୍କୁ ସେ ୮ ହଜାର ୨୧୧ ଭୋଟ ବ୍ୟବଧାନରେ ପରାସ୍ତ କରିଛନ୍ତି । ଏଥି ସହିତ ସେ ୫ ଥରର ବିଧାୟକ ବୀମା ଭାରତୀଙ୍କୁ ମଧ୍ୟ ହରାଇଛନ୍ତି । ନୀତିଶ କୁମାରଙ୍କ ଆଶିର୍ବାଦରୁ ନିର୍ବାଚନ ଲଢ଼ୁଥିବା କଳାଧର ଦ୍ୱିତୀୟ ସ୍ଥାନରେ ରହିଥିବା ବେଳେ ବୀମା ଭାରତୀ ତୃତୀୟ ସ୍ଥାନରେ ରହିଛନ୍ତି । ଶଙ୍କର ସିଂଙ୍କୁ ମୋଟ ୬୭,୭୭୯ ଖଣ୍ଡ ଭୋଟ ମିଳିଥିବା ବେଳେ କଳାଧରଙ୍କୁ ୫୯,୫୬୮ ଖଣ୍ଡ ଭୋଟ ମିଳିଛି । ତୃତୀୟ ସ୍ଥାନରେ ଥିବା ବୀମା ଭାରତୀଙ୍କୁ ୩୦,୧୦୮ ଖଣ୍ଡ ଭୋଟ ମିଳିଛି ।