ଦିଲ୍ଲୀ ସରକାରଙ୍କ ପକ୍ଷରୁ ପତାକା ଉତ୍ତୋଳନ କରିବେ ଗୃହମନ୍ତ୍ରୀ

ନୂଆଦିଲ୍ଲୀ: ସ୍ବାଧୀନତା ଦିବସ ଅର୍ଥାତ୍ ଅଗଷ୍ଟ ୧୫ରେ ଦିଲ୍ଲୀ ଛତ୍ରସାଲ ଷ୍ଟାଡିୟମରେ ଜାତୀୟ ପତାକା ଉତ୍ତୋଳନ କରାଯାଇଥାଏ । ହେଲେ ଚଳିତ ବର୍ଷ ସ୍ବାଧୀନତା ଦିବସରେ ତ୍ରିରଙ୍ଗା ଉତ୍ତୋଳନକୁ ନେଇ ଦିଲ୍ଲୀ ଏଲ.ଜି ଭି.କେ ସକ୍ସେନା ଏବଂ ଆମ୍ ଆଦମୀ ପାର୍ଟି ମଧ୍ଯରେ ବିବାଦ ଦେଖାଦେଇଛି । ତେବେ ଦିଲ୍ଲୀ ମୁଖ୍ୟମନ୍ତ୍ରୀ କେଜ୍ରିୱାଲ, ଅତିଶୀଙ୍କ ଦ୍ଵାରା ତ୍ରିରଙ୍ଗା ଉତ୍ତୋଳନ ପାଇଁ ଦାବି କରିଥିଲେ, କିନ୍ତୁ ସାଧାରଣ ପ୍ରଶାସନ ବିଭାଗ ଏହାକୁ ପ୍ରତ୍ୟାଖ୍ୟାନ କରିଛି ।

ବର୍ତମାନ ମନ୍ତ୍ରୀ କୈଳାସ ଗେହଲଟଙ୍କ ନାଁରେ ମୋହର ମାରିଛନ୍ତି ଉପରାଜ୍ୟପାଳ ଭିକେ ସକ୍ସେନା। ଅଗଷ୍ଟ 15ରେ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ସ୍ଥାନରେ କୈଳାସ ଗେହଲଟ ଦିଲ୍ଲୀରେ ପତାକା ଉତ୍ତୋଳନ କରିବେ ,ତେବେ ଏହାକୁ ନେଇ ଆପ୍ ଏବଂ ଉପରାଜ୍ୟପାଳଙ୍କ ମଧ୍ୟରେ ବିବାଦ ସୃଷ୍ଟି ହୋଇଛି।

କାରଣ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଜେଲରେ ଥିଲେ ମଧ୍ୟ ତାଙ୍କ ସ୍ଥାନରେ ଶିକ୍ଷାମନ୍ତ୍ରୀ ଆତିଶୀଙ୍କୁ ପତାକା ଉତ୍ତୋଳନ କରିବାକୁ ଅନୁମତି ଦିଆଯାଉ ବୋଲି ଉପରାଜ୍ୟପାଳଙ୍କୁ ଚିଠି ଲେଖି ଜଣାଇଥିଲେ। କିନ୍ତୁ ଉପରାଜ୍ୟପାଳ ସକ୍ସେନା କୈଳାସଙ୍କ ନାଁରେ ମୋହର ମାରିଛନ୍ତି। ଏହାକୁ ନେଇ ଆପ୍ ଏବଂ ସକ୍ସେନାଙ୍କ ମଧ୍ୟରେ ବିବାଦ ସୃଷ୍ଟି ହୋଇଥିବା କୁହାଯାଉଛି।

ମଙ୍ଗଳବାର ଦିଲ୍ଲୀ ସରକାରଙ୍କ ସାଧାରଣ ପ୍ରଶାସନ ବିଭାଗ (ଜିଏଡି) ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲଙ୍କ ପ୍ରସ୍ତାବକୁ ପ୍ରତ୍ୟାଖ୍ୟାନ କରିଛି ଯେଉଁଥିରେ ସେ ସ୍ବାଧୀନତା ଦିବସରେ ଛତ୍ରସାଲ ଷ୍ଟାଡିୟମରେ ଆୟୋଜିତ ହେବାକୁ ଥିବା କାର୍ଯ୍ୟକ୍ରମରେ ଅତିଶୀଙ୍କୁ ତାଙ୍କ ସ୍ଥାନରେ ପତାକା ଉତ୍ତୋଳନ କରିବାକୁ ଇଚ୍ଛା ପ୍ରକାଶ କରିଛନ୍ତି।

ମନ୍ତ୍ରୀ ଗୋପାଳ ରାୟଙ୍କୁ ଉତ୍ତର ଦେବାବେଳେ ପ୍ରଶାସନ ବିଭାଗ କହିଛି ଯେ ଅଗଷ୍ଟ ୧୫ରେ ଜାତୀୟ ପତାକା ଉତ୍ତୋଳନ ପାଇଁ ଅତିଶୀଙ୍କୁ ଅନୁମତି ଦେବା ପାଇଁ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲ ଦେଇଥିବା ନିର୍ଦ୍ଦେଶ ଆଇନଗତ ଭାବରେ ଅବୈଧ ଏବଂ ଏହା ଉପରେ କାର୍ଯ୍ୟ କରାଯାଇପାରିବ ନାହିଁ। ଏହା ମଧ୍ୟ କୁହାଯାଇଛି ଯେ ତିହାର ଜେଲରୁ କେଜରିୱାଲଙ୍କୁ ଏକ ଚିଠି ଲେଖିବା ଏବଂ ଏପରି ବାର୍ତ୍ତାଳାପ ଗ୍ରହଣୀୟ ନୁହେଁ ଏବଂ ଏହା ନିୟମର ଉଲ୍ଲଂଘନ ଅଟେ।