ଅଗ୍ନିବୀରଙ୍କ ପାଇଁ ବଡ଼ ଘୋଷଣା କଲେ ହରିୟାଣା ସରକାର

ନୂଆଦିଲ୍ଲୀ: ଅଗ୍ନିବୀରଙ୍କୁ ନେଇ ବଡ ଘୋଷଣା । ଅଗ୍ନିବୀରଙ୍କୁ ମିଳିବ ପୋଲିସ୍ ଚାକିରିରେ ୧୦ ପ୍ରତିଶତ ସଂରକ୍ଷଣ । ଖାଲି ସେତିକି ନୁହେଁ, ମାଇନିଂ ଗାର୍ଡ ପଦବୀରେ ମଧ୍ୟ ସେମାନଙ୍କୁ ସଂରକ୍ଷଣ ସୁବିଧା ମିଳିବ । ଏଥିସହ ଗ୍ରୁପ-ସି ପରୀକ୍ଷାରେ ମଧ୍ୟ ସେମାନଙ୍କୁ ୩ ବର୍ଷ ପର୍ଯ୍ୟନ୍ତ ଆୟୁସୀମା ଛାଡ କରାଯିବ । ୫ ଲକ୍ଷ ଟଙ୍କା ପର୍ଯ୍ୟନ୍ତ ଋଣ ମଧ୍ୟ ବିନା ସୁଧରେ ଉପଲବ୍ଧ ହେବ । ଏନେଇ ହରିୟାଣାର ନାୟବ ସିଂ ସଇନି ସରକାର ଏକ ବଡ ନିଷ୍ପତ୍ତି ନେଇଛନ୍ତି ।

ହରିୟାଣାରେ ରାଜ୍ୟ ସରକାରଙ୍କ ଦ୍ୱାରା ନିଯୁକ୍ତ ହେବାକୁ ଥିବା କନଷ୍ଟେବଳ, ମାଇନିଂ ଗାର୍ଡ, ଫରେଷ୍ଟ ଗାର୍ଡ, ଜେଲ ୱାର୍ଡେନ ଏବଂ ଏସପିଓ ନିଯୁକ୍ତିରେ ୧୦ ପ୍ରତିଶତ ସଂରକ୍ଷଣ ମିଳିବ ବୋଲି ହରିୟାଣା ମୁଖ୍ୟମନ୍ତ୍ରୀ ନାଇବ ସିଂ ସଇନି କହିଛନ୍ତି । ଗ୍ରୁପ ବି ଏବଂ ସିରେ ସରକାରୀ ପଦବୀ ପାଇଁ ସର୍ବାଧିକ ୩ ବର୍ଷର ଆରାମ ପ୍ରଦାନ କରାଯିବ, କିନ୍ତୁ ପ୍ରଥମ ବ୍ୟାଚ ଅଗ୍ନିବୀରଙ୍କ କ୍ଷେତ୍ରରେ ଏହି ଆରାମ ୫ ବର୍ଷ ହେବ ।

ସେ ଆହୁରି ମଧ୍ୟ କହିଛନ୍ତି, ଗ୍ରୁପ ସିରେ ସିଭିଲ ପୋଷ୍ଟରେ ସିଧାସଳଖ ନିଯୁକ୍ତିରେ ଅଗ୍ନିବୀର କର୍ମଚାରୀଙ୍କ ପାଇଁ ସରକାର ୫ ପ୍ରତିଶତ ଏବଂ ଗ୍ରୁପ ବିରେ ଏକ ପ୍ରତିଶତ ସଂରକ୍ଷଣ ପ୍ରଦାନ କରିବେ । ଯଦି କୌଣସି ଅଗ୍ନିବୀରଙ୍କ କୌଣସି ଶିଳ୍ପ ୟୁନିଟ ଦ୍ୱାରା ମାସକୁ ୩୦ ହଜାରରୁ ଅଧିକ ବେତନ ଦିଆଯାଏ, ତେବେ ଆମ ସରକାର ସେହି ଶିଳ୍ପ ୟୁନିଟକୁ ବାର୍ଷିକ ୬୦ ହଜାର ଟଙ୍କା ସବସିଡି ଦେବେ । ଯଦି କୌଣସି ଅଗ୍ନିବୀର ନିଜର ଉଦ୍ୟୋଗ ପ୍ରତିଷ୍ଠା କରିବାକୁ ଚାହାଁନ୍ତି ତେବେ ସରକାର ୫ ଲକ୍ଷ ଟଙ୍କା ଋଣ ଉପରେ ସୁଧ ଛାଡ଼ କରିବେ ରାଜ୍ୟ ସରକାର ।

୨୦୨୨ ଜୁନରେ କେନ୍ଦ୍ର ସରକାର ପ୍ରଥମ କରି ସେନାରେ ଅଗ୍ନିପଥ ନିଯୁକ୍ତି ବ୍ୟବସ୍ଥା ଆରମ୍ଭ କରିଥିଲେ । ଏହି ନିଯୁକ୍ତି ମାଧ୍ୟମରେ ସାଢେ ୧୭ ବର୍ଷରୁ ୨୧ ବର୍ଷ ବୟସର ପିଲା ସେନାରେ ନିୟୋଜିତ ହୋଇ ପାରୁଛନ୍ତି । ଅଗ୍ନିପଥ ଯୋଜନାରେ ସାମିଲ ହେଉଥିବା ଯବାନଙ୍କ କାର୍ଯ୍ୟକାଳ ୪ ବର୍ଷ ରଖାଯାଇଛି ।

ନିଯୁକ୍ତ ଅଗ୍ନବୀରଙ୍କ ମଧ୍ୟରୁ ୨୫ ପ୍ରତିଶତ ଯବାନଙ୍କ ଚାକିରି କାଳ ଆଉ ୧୫ ବର୍ଷ ପାଇଁ ବଢ଼ାଯିବାର ବ୍ୟବସ୍ଥା ଥିବା ବେଳେ ଅବଶିଷ୍ଟ ୭୫ ପ୍ରତିଶତ ଯବାନଙ୍କୁ କ୍ଷତିପୂରଣ ସହ ଅବସର ଦିଆଯିବାର ବ୍ୟବସ୍ଥା ରହିଛି । ଏହାକୁ ନେଇ ବିରୋଧୀ କେନ୍ଦ୍ରର ବିଜେପି ସରକାରଙ୍କୁ ବାରମ୍ବାର ଟାର୍ଗେଟ କରି ଆସିଛନ୍ତି ।