କୃଷକଙ୍କ ଆୟ ବୃଦ୍ଧି ଉପରେ କୃଷିମନ୍ତ୍ରୀଙ୍କ ବଡ଼ ବୟାନ, କହିଲେ ଏଥିଲାଗି ପ୍ରସ୍ତୁତ ହୋଇଛି ସ୍ୱତନ୍ତ୍ର ରଣନୀତି

କୃଷକଙ୍କ ଆୟ ବୃଦ୍ଧି ପାଇଁ ସରକାର ୬ ସୂତ୍ରୀ ରଣନୀତି ପ୍ରସ୍ତୁତ କରିଛନ୍ତି। ଆଜି ଲୋକସଭାରେ କୃଷି ଓ କୃଷକ କଲ୍ୟାଣ ମନ୍ତ୍ରୀ ଶିବରାଜ ସିଂହ ଚୌହାନ କହିଛନ୍ତି, ୨୦୦୨-୦୩ରେ କୃଷକଙ୍କ ଆୟ ମାସିକ ୨ ହଜାର ୧୧୫ ଟଙ୍କା ଥିବାବେଳେ ୨୦୧୮-୧୯ରେ ଏହା ୧୦ ହଜାର ୨୧୮ ଟଙ୍କାକୁ ବୃଦ୍ଧି ପାଇଛି।

୬ ସୂତ୍ରୀ ରଣନୀତିରେ ଉତ୍ପାଦନ ବୃଦ୍ଧି, ଉତ୍ପାଦନ ଖର୍ଚ୍ଚ ହ୍ରାସ, ଉତ୍ପାଦିତ ଦ୍ରବ୍ୟର ଉପଯୁକ୍ତ ସର୍ବନିମ୍ନ ମୂଲ୍ୟ ସୁନିଶ୍ଚିତ କରିବା, ପ୍ରାକୃତିକ ବିପର୍ଯ୍ୟୟ ଜନିତ କ୍ଷୟକ୍ଷତିର ଭରଣା, କୃଷିର ବିବିଧତା ଏବଂ ପ୍ରାକୃତିକ ଓ ଜୈବିକ ଚାଷକୁ ପ୍ରୋତ୍ସାହନ ଦେବା ଆଦି ରହିଛି। ସେ କହିଛନ୍ତି, ଚାଷୀମାନଙ୍କୁ କମ୍ ସୁଧହାରରେ ଋଣ ଓ ସାର ଏବଂ ଯାନ୍ତ୍ରିକ ଚାଷ ପାଇଁ ସବ୍‍ସିଡି ମଧ୍ୟ ଦିଆଯାଉଛି। ଗତବର୍ଷ ଚାଷୀଙ୍କୁ ୨ ଲକ୍ଷ ୧୪ ହଜାର କୋଟି ଟଙ୍କାର ସବ୍‍ସିଡି ଦିଆଯାଇଥିଲା। କେନ୍ଦ୍ର ସରକାର ସର୍ବନିମ୍ନ ସହାୟକ ମୂଲ୍ୟରେ ରେକର୍ଡ କ୍ରୟ କରିଛନ୍ତି ବୋଲି ମନ୍ତ୍ରୀ ଗୃହରେ ସୂଚନା ଦେଇଛନ୍ତି।