ସିଦ୍ଧୁ ମୁସୱାଲା ହତ୍ୟା ଘଟଣା: ନିଜକୁ ଦାୟୀ କଲା ଗ୍ୟାଙ୍ଗଷ୍ଟର ଗୋଲ୍ଡି

ଲୋକପ୍ରିୟ ପଞ୍ଜାବୀ ଗାୟକ ସିଦ୍ଧୁ ମୁସୱାଲାଙ୍କୁ ହତ୍ୟା କରାଯାଇଛି । ଏହି ହତ୍ୟାକାଣ୍ଡ ଘଟଣାରେ ନିଜକୁ ଦାୟୀ କରିଛି କାନାଡା ଗ୍ୟାଙ୍ଗଷ୍ଟାର ଗୋଲ୍ଡି ।

Published: Monday, May 30, 2022, 15:36 [IST]

ଚଣ୍ଡିଗଡ଼: ଲୋକପ୍ରିୟ ପଞ୍ଜାବୀ ଗାୟକ ସିଦ୍ଧୁ ମୁସୱାଲାଙ୍କୁ ହତ୍ୟା କରାଯାଇଛି । ଏହି ହତ୍ୟାକାଣ୍ଡ ଘଟଣାରେ ନିଜକୁ ଦାୟୀ କରିଛି କାନାଡା ଗ୍ୟାଙ୍ଗଷ୍ଟାର ଗୋଲ୍ଡି ବ୍ରାର । ଏହି ଅପରାଧୀ ଜଣକ ଭାରତରେ ଅନେକ ଅପରାଧିକ ମାମଲାରେ ଜଡ଼ିତ ଥିବା ଜଣାପଡିଛି। ବର୍ତ୍ତମାନ ଗୋଲ୍ଡି କାନାଡ଼ାରେ ରହୁଛି । ଚଳିତ ମାସରେ ହିଁ ଫେରୋଜପୁର କୋର୍ଟ ଗୋଲ୍ଡି ବିରୋଧରେ ଜାମିନ ବିହୀନ ଗିରଫ ୱାରେଣ୍ଟ ଜାରି କରିଥିଲେ ।

ରବିବାର ପଞ୍ଜାବର କଂଗ୍ରେସ ନେତା ତଥା ଲୋକପ୍ରିୟ ଗାୟକ ସିଦ୍ଧୁ ମୁସଓ୍ବାଲାଙ୍କୁ ଅତି ନିର୍ମମ ଭାବେ ଗୁଳି କରି ହତ୍ୟା କରାଯାଇଥିଲା । ଗୋଲ୍ଡି ଏକ ଫେସବୁକ ପୋଷ୍ଟ ମାଧ୍ୟମରେ ଏହି ହତ୍ୟାକାଣ୍ଡରେ ନିଜକୁ ଦାୟୀ କରିଥିଲା । ଏପରି ପୋଷ୍ଟ ପରେ ପୁଣି ଗୋଲ୍ଡିକୁ ନେଇ ଚର୍ଚ୍ଚା ହେଉଛି । ଗ୍ୟାଙ୍ଗଷ୍ଟାର ଲରେନ୍ସ ବିଷ୍ଣୋଇ ଓ ଗୋଲ୍ଡିର 3 ଜଣ ସହଯୋଗୀଙ୍କୁ ଗତ ମେ 1 ତାରିଖରେ ଆଣ୍ଟି- ଗ୍ୟାଙ୍ଗଷ୍ଟାର ଟାସ୍କ ଫୋର୍ସ ଭଟିଣ୍ଡାରୁ ଗିରଫ କରିଥିଲା ।

କାନାଡା ଗ୍ୟାଙ୍ଗଷ୍ଟାର ଗୋଲ୍ଡି ବରାଡ଼ର ପ୍ରକୃତ ନାମ ହେଉଛି ସତିନ୍ଦର ସିଂ । ଅନ୍ୟତମ କୁଖ୍ୟାତ ଗ୍ୟାଙ୍ଗଷ୍ଟର ଲରେନ୍ସର ସହଯୋଗୀ ହେଉଛି ଗୋଲ୍ଡି । ଜିଲ୍ଲା ଯୁବ କଂଗ୍ରେସ ସଭାପତି ଗୁରଲାଲ ସିଂ ପେହଲୱାନଙ୍କ ହତ୍ୟାକାଣ୍ଡରେ ଏମାନେ ଜଡ଼ିତ ଥିବା ବେଳେ ସେ ଏବେ କାନାଡ଼ାରେ ରହୁଛି । ପଞ୍ଜାବର ଫରିଦକୋଟ ଜିଲ୍ଲାର ଅଧିବାସୀ ହେଉଛି ଗୋଲ୍ଡି । ଗୋଲ୍ଡି ଓ ଲରେନ୍ସ କିଛି ବର୍ଷ ଧରି ପଞ୍ଜାବରେ ହଇଚଇ ସୃଷ୍ଟି କରିଆସୁଛନ୍ତି । ଉଭୟ ନିଜ ଶତ୍ରୁର ନିକଟତମ ବ୍ୟକ୍ତିଙ୍କୁ ଟାର୍ଗେଟ କରି ହତ୍ୟା କରିଥାନ୍ତି । ଲରେନ୍ସ ଏବେ ଜେଲରେ ଥିବାରୁ ଗୋଲ୍ଡିର ଉତ୍ପାତ ବଢିବାରେ ଲାଗିଛି ।
ପଞ୍ଜାବ ଡିଜିପି ସିଦ୍ଧୁଙ୍କ ହତ୍ୟାକାଣ୍ଡକୁ ନେଇ କହିବାନୁସାରେ,ସିଦ୍ଧୁ ମୁସୱାଲା ସନ୍ଧ୍ୟା ପ୍ରାୟ 5ଟା ବେଳେ ନିଜ କାରରେ ଯାଉଥିଲେ । କାର ସିଦ୍ଧୁ ନିଜେ ଚଲାଉଥିଲେ । ଆଗରୁ 2ଟି କାରରେ ଆସୁଥିବା କିଛି ଆକ୍ରମଣକାରୀ ତାଙ୍କ ଉପରେ ଗୁଳା ଚାଳନା କରିଥିଲେ । ଫଳରେ ସିଦ୍ଧୁଙ୍କ ମୃତ୍ୟୁ ଘଟିଛି । ଡିଜିପି କହିଛନ୍ତି ଯେ, ଏହି ହତ୍ୟାକାଣ୍ଡ ଗୋଷ୍ଠୀ ବିବାଦକୁ ନେଇ ଘଟିଛି । ମିଡୁ ଖେଡା ହତ୍ୟାକାଣ୍ଡରେ ସିଦ୍ଧୁଙ୍କ ପୂର୍ବ ମ୍ୟାନେଜରଙ୍କ ନାଁ ସାମନାକୁ ଆସିଥିଲେ, ଯିଏକି ଏବେ ଅଷ୍ଟ୍ରେଲିଆରେ ରହୁଛନ୍ତି । ଏହାର ଜବାବରେ ଏହି ହତ୍ୟାକାଣ୍ଡକୁ ନେଇ ଲରେନ୍ସ ବିଷ୍ଣୋଇଙ୍କ ଗ୍ୟାଙ୍ଗ ନିଜକୁ ଦାୟୀ କରିଛି ବୋଲି ସେ କହିଛନ୍ତି ।

Published On May 30, 2022