୬୦୦ ଫୁଟ ତଳକୁ ଖସିଲା କାର୍‌, ୫ ମୃତ

ଜମ୍ମୁ-କାଶ୍ମୀରର ରାମବନ ଜିଲ୍ଲାରେ ଏକ ବଡ଼ ଦୁର୍ଘଟଣା ଘଟିଛି। ଏଠାରେ ଶୁକ୍ରବାର ରାତିରେ ଏକ କାର ଅନିୟନ୍ତ୍ରିତ ହୋଇ ଘାଟିର ୬୦୦ ଫୁଟ୍ ତଳକୁ ଖସିଯାଇଛି। ଏହି ଦୁର୍ଘଟଣାରେ ୫ଜଣଙ୍କ ମୃତ୍ୟୁ ଘଟିଛି। ଜଣେ ବ୍ୟକ୍ତି ଗୁରୁତର ଆହତ ହୋଇଛନ୍ତି। ଆହତଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି। ଏଠାରେ ତାଙ୍କର ଚିକିତ୍ସା ଚାଲିଛି। ସେହିପରି ଜିଲ୍ଲା ପ୍ରଶାସନ ମୃତକଙ୍କ ପରିବାରକୁ ଏକ-ଏକ ଲକ୍ଷ ଟଙ୍କା ଏବଂ ଆହତକୁ ୨୫ ହଜାର ଟଙ୍କା ଆର୍ଥିକ ସହାୟତା ପ୍ରଦାନ କରିବା ଲାଗି ଘୋଷଣା କରିଛନ୍ତି।

କୁହାଯାଉଛି ଯେ, ବିଳମ୍ବିତ ରାତିରେ କାର୍‌ଟି ନିୟନ୍ତ୍ରଣ ହରାଇ ଘାଟିରେ ଖସିପଡ଼ିଛି। ରାମବନ ଜିଲ୍ଲାରେ ଘଟିଥିବା ଏହି ଦୁର୍ଘଟଣାରେ ଉପରାଜ୍ୟପାଳ ମନୋଜ ସିହ୍ନା, ମୁଖ୍ୟମନ୍ତ୍ରୀ ଉମର ଅବଦୁଲ୍ଲା ଏବଂ କେନ୍ଦ୍ର ମନ୍ତ୍ରୀ ଜିତେନ୍ଦ୍ର ସିଂହ ଦୁଃଖ ପ୍ରକାଶ କରିଛନ୍ତି।