ମୁଖ୍ୟମନ୍ତ୍ରୀଙ୍କ ବଡ଼ ଘୋଷଣା, ଭୂମିହୀନ ଚାଷୀଙ୍କୁ ଏଣିକି ବର୍ଷକୁ ମିଳିବ ୧୦ ହଜାର ଟଙ୍କା

ନୂଆଦିଲ୍ଲୀ: ଛତିଶଗଡ଼ର ଭୂମିହୀନ ଚାଷୀଙ୍କ ପାଇଁ ରାଜ୍ୟ ସରକାର ଏକ ସ୍ୱତନ୍ତ୍ର ଉପହାର ଆଣିଛନ୍ତି । ଦୀନଦୟାଲ ଉପାଧ୍ୟାୟ ଭୂମିହୀନ କୃଷି ଶ୍ରମିକ କଲ୍ୟାଣ ଯୋଜନା ଅଧୀନରେ, ରାଜ୍ୟର ପ୍ରତ୍ୟେକ ଭୂମିହୀନ ଚାଷୀଙ୍କୁ ଏଣିକି ବାର୍ଷିକ ୧୦ ହଜାର ଟଙ୍କା ଦେବାକୁ ଘୋଷଣା କରିଛନ୍ତି ମୁଖ୍ୟମନ୍ତ୍ରୀ ବିଷ୍ଣୁ ଦେବ ସାଇ। ମୁଖ୍ୟମନ୍ତ୍ରୀ ବିଷ୍ଣୁ ଦେବ ସାଇ ସୋସିଆଲ ମିଡିଆ ପ୍ଲାଟଫର୍ମ X ରେ ମଧ୍ୟ କହିଛନ୍ତି ଯେ ଆମ ସରକାର "ଦୀନଦୟାଲ ଉପାଧ୍ୟାୟ ଭୂମିହୀନ କୃଷି ମଜଦୁର କଲ୍ୟାଣ ଯୋଜନା" ଅଧୀନରେ ଭୂମିହୀନ ପରିବାରକୁ ପ୍ରତିବର୍ଷ ୧୦ ହଜାର ଟଙ୍କା ଆର୍ଥିକ ସହାୟତା ପ୍ରଦାନ କରିବାକୁ ଯାଉଛି। ଏଥିପାଇଁ, ଆମ ସରକାରଙ୍କ ବଜେଟରେ ୫ ଶହ କୋଟି ଟଙ୍କାର ବ୍ୟବସ୍ଥା କରାଯାଇଛି।

ଛତିଶଗଡ଼ରେ ଭାରତୀୟ ଜନତା ପାର୍ଟି ସରକାର ଗୋଟିଏ ବର୍ଷ ପୂରଣ କରିଛି। ଏହି ଅବସରରେ, ଶକ୍ତି ଜିଲ୍ଲା ମୁଖ୍ୟାଳୟରେ ଏକ କାର୍ଯ୍ୟକ୍ରମ ଆୟୋଜନ କରାଯାଇଥିଲା। ଏହି କାର୍ଯ୍ୟକ୍ରମ ସମୟରେ ମୁଖ୍ୟମନ୍ତ୍ରୀ ବିଷ୍ଣୁ ଦେବ ସାଇ କହିଥିଲେ ଯେ ଏବେ ରାଜ୍ୟର ଗ୍ରାମୀଣ ଭୂମିହୀନ ଶ୍ରମିକ ମାନଙ୍କୁ ବାର୍ଷିକ ୧୦ ହଜାର ଟଙ୍କା ଦିଆଯିବ। ସେ କହିଥିଲେ ଯେ ରାଜ୍ୟର ୫ ଲକ୍ଷ ୬୨ ହଜାର ଶ୍ରମିକ ଏହା ଦ୍ୱାରା ଉପକୃତ ହେବେ। ମୁଖ୍ୟମନ୍ତ୍ରୀ କହିଛନ୍ତି ଯେ ଯେବେ ଠାରୁ ତାଙ୍କ ସରକାର ଗଠନ ହୋଇଛି, ସେବେ ଠାରୁ ସେ ମୋଦିଙ୍କ ପ୍ରତ୍ୟେକ ଗ୍ୟାରେଣ୍ଟି ପୂରଣ କରି ଆସୁଛନ୍ତି।