ନିଜକୁ ନିଜେ ଗୁଳି କରି ଜୀବନ ହାରିଦେଲେ ପୂର୍ବତନ ବିଧାୟକ

ଜମ୍ମୁ-କଶ୍ମୀରର ପୂର୍ବତନ BJP ବିଧାୟକ ଫକିର ମହମ୍ମଦ ଖାନ ଆତ୍ମହତ୍ୟା କରିଥିବା ଅଭିଯୋଗ ହୋଇଛି। ଦଳର ମୁଖପାତ୍ର ଏହି ସୂଚନା ଦେଇଛନ୍ତି। ସେ ନିଜକୁ ଗୁଳି କରି ଆତ୍ମହତ୍ୟା କରିଥିବା କୁହାଯାଉଛି। ଫକୀର ମହମ୍ମଦଙ୍କୁ ଜମ୍ମୁ ଓ କଶ୍ମୀର ଭାଜପାର ବରିଷ୍ଠ ନେତାମାନଙ୍କ ମଧ୍ୟରେ ଗଣନା କରାଯାଉଥିଲା।

ଶ୍ରୀନଗରର ଏକ ଉଚ୍ଚ ସୁରକ୍ଷା ଅଞ୍ଚଳ ତୁଳସୀବାଗରେ ତାଙ୍କୁ ଦିଆଯାଇଥିବା ସରକାରୀ ବଙ୍ଗଳାରେ ସେ ନିଜକୁ ଗୁଳି କରି ଆତ୍ମହତ୍ୟା କରିଛନ୍ତି। ସରକାରୀ ସୂତ୍ର ଅନୁଯାୟୀ, ସେ କ୍ୱାର୍ଟର ନମ୍ବର ୯ଏରେ ତାଙ୍କର ଜଣେ ପିଏସଓଙ୍କ ସର୍ଭିସ ରାଇଫଲ୍‌ରେ ନିଜକୁ ଗୁଳି କରିବା ପରେ ରକ୍ତ ଜୁଡ଼ୁବୁଡ଼ୁ ଅବସ୍ଥାରେ ପଡ଼ିଥିବା ଦେଖିବାକୁ ମିଳିଥିଲା।

ଗତବର୍ଷ ବିଧାନସଭା ନିର୍ବାଚନରେ BJP ଗୁରେଜ ଆସନରୁ ଫକିର ମହମ୍ମଦ ଖାନଙ୍କୁ ଟିକେଟ ଦେଇଥିଲା କିନ୍ତୁ ସେ ଜିତିବାରେ ସଫଳ ହୋଇପାରି ନ ଥିଲେ। ଏଠାରେ, ନ୍ୟାଶନାଲ କନଫରେନ୍ସର ନାଜିର ଅହମ୍ମଦ ଖାନ ତାଙ୍କୁ ୧୦୪୯ ଭୋଟ ବ୍ୟବଧାନରେ ପରାସ୍ତ କରିଥିଲେ।

ପୋଲିସ ତାଙ୍କ ମୃତ୍ୟୁର ତଦନ୍ତ ଆରମ୍ଭ କରିଛି। ତାଙ୍କୁ ତୁରନ୍ତ ଶ୍ରୀନଗରର SMHS ହସ୍ପିଟାଲକୁ ନିଆଯାଇଥିଲା। ଏଠାରେ କର୍ତ୍ତବ୍ୟରତ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଉତ୍ତର କାଶ୍ମୀରର ବାନ୍ଦିପୋରା ଜିଲାର ଗୁରେଜ ନିବାସୀ ଫକିର ମହମ୍ମଦ ଖାନ ଜଣେ ପ୍ରବୀଣ ରାଜନେତା ଥିଲେ। ସେ ୧୯୯୬ ଜମ୍ମୁ ଓ କଶ୍ମୀର ବିଧାନସଭା ନିର୍ବାଚନରେ ସ୍ବାଧୀନ ପ୍ରାର୍ଥୀ ଭାବରେ ବିଜୟୀ ହୋଇଥିଲେ ଏବଂ ତତ୍କାଳୀନ ବିଧାନସଭାର ସଦସ୍ୟ ଭାବରେ କାର୍ଯ୍ୟ କରିଥିଲେ।