ଏଣିକି ବିଜୁଳି ବିଲ୍ ଭରିବେ ମୁଖ୍ୟମନ୍ତ୍ରୀ
ନୂଅଦିଲ୍ଲୀ: ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱା ଶର୍ମା ଏକ ନିର୍ଦ୍ଦେଶ ଦେଇଛନ୍ତି ଯେ ମନ୍ତ୍ରୀ, ବିଧାୟକ ଏବଂ ଅଧିକାରୀମାନେ ନିଜେ ବିଦ୍ୟୁତ୍ ବିଲ୍ ଭରିବେ । ସେ କହିଛନ୍ତି ଯେ ଏହାର ଉଦ୍ଦେଶ୍ୟ ହେଉଛି ଭିଆଇପି ସଂସ୍କୃତିକୁ ଶେଷ କରିବା । ଏଥିସହ ବିଦ୍ୟୁତ୍ ହାର ହ୍ରାସ କରିବାକୁ ରାଜ୍ୟ ସରକାର ଚେଷ୍ଟା କରୁଛନ୍ତି ବୋଲି ସେ କହିଛନ୍ତି ।
ମୁଖ୍ୟମନ୍ତ୍ରୀ, ମୁଖ୍ୟ ଶାସନ ସଚିବଙ୍କଠାରୁ ଆରମ୍ଭ କରି ସମସ୍ତ ଅଧିକାରୀମାନେ ଏଥର ବିଜୁଳି ବିଲ୍ ଭରିବେ । ଦୀର୍ଘ ୭୫ବର୍ଷ ହେବ ରାଜ୍ୟର ମୁଖ୍ୟମନ୍ତ୍ରୀଙ୍କ ଠାରୁ ଆରମ୍ଭ କରି ଅନ୍ୟମନ୍ତ୍ରୀ, ବଡ ବଡ ସରକାରୀ ଅଧିକାରୀ ମାନଙ୍କର ବିଜୁଳି ବିଲ୍ ସରକାରୀ ବଜେଟରୁ ଖର୍ଚ୍ଚ କରାଯାଉଥିଲା । ଯାହା ଜନସାଧାରଣଙ୍କ ଟଙ୍କା । ଏଣିକି ଏହି ପ୍ରଥା ବନ୍ଦ ହେବାକୁ ଯାଉଛି । ଜୁଲାଇ ୧ଠାରୁ ଏହି ବ୍ୟବସ୍ଥା ଉଚ୍ଛେଦ ହେବାକୁ ଯାଉଥିବାର ବେଳେ ମୁଖ୍ୟମନ୍ତ୍ରୀ ନିଜେ ଏବଂ ମୁଖ୍ୟ ଶାସନ ସଚିବ ନିଜ ଟଙ୍କାରେ ବିଜୁଳି ବିଲ୍ ଭରଣ କରିବେ ।
ଶର୍ମା କହିଛନ୍ତି ଜୁଲାଇ ୧ ରୁ ଆମର ବିଦ୍ୟୁତ୍ ବିଲ୍ ପୈଠ କରି ମୁଁ ଏବଂ ମୁଖ୍ୟ ଶାସନ ସଚିବ ଏକ ଉଦାହରଣ ସୃଷ୍ଟି କରିବୁ । ଜୁଲାଇ ୨୦୨୪ ଆରମ୍ଭରୁ ସମସ୍ତ ସରକାରୀ କର୍ମଚାରୀଙ୍କୁ ନିଜେ ନିଜର ବିଦ୍ୟୁତ୍ ବିଲ୍ ଦେବାକୁ ପଡିବ । ସିଏମ୍ ଶର୍ମା ରବିବାର ଏକ ନୂଆ୨.୫ ମେଗାୱାଟ ସୌର ଶକ୍ତି ପ୍ରକଳ୍ପର ଉଦଘାଟନ କରିଛନ୍ତି ।
ସେ କହିଛନ୍ତି ଯେ ରାଜ୍ୟର ଲକ୍ଷ୍ୟ ହେଉଛି ୟୁନିଟ୍ ପିଛା ବିଦ୍ୟୁତ୍ ବିଲ୍ ହ୍ରାସ କରିବା, ଯାହାଫଳରେ ସମାଜର ଗରିବ ଶ୍ରେଣୀର ଲୋକଙ୍କ ପାଇଁ ବିଦ୍ୟୁତ୍ ବ୍ୟବହାର ସହଜ ହେବ । ଆସନ୍ତା ବର୍ଷ ଏପ୍ରିଲ ସୁଦ୍ଧା ସରକାର ଏହାକୁ ୟୁନିଟ୍ ପିଛା ୧ଟଙ୍କା କମାଇବାକୁ ଲକ୍ଷ୍ୟ ରଖିଛନ୍ତି ବୋଲି ସେ ସୂଚନା ଦେଇଛନ୍ତି ।
ସରକାର ସୌର ପ୍ୟାନେଲ ପାଇଁ ରାଜ୍ୟର ସମସ୍ତ ବିଶ୍ୱବିଦ୍ୟାଳୟ ଏବଂ ମେଡିକାଲ କଲେଜଗୁଡ଼ିକର ଛାତ ବ୍ୟବହାର କରିବାକୁ ଯାଉଛନ୍ତି ବୋଲି ଶର୍ମା କହିଛନ୍ତି । ସେ କହିଛନ୍ତି ଯେ ଆସାମର ୨ ଲକ୍ଷରୁ ଅଧିକ ପରିବାର ନିଜ ଘରେ ସୌର ପ୍ୟାନେଲ ସ୍ଥାପନ ପାଇଁ ଆବେଦନ କରିଛନ୍ତି । ବିଦ୍ୟୁତ ନଷ୍ଟ ନକରିବାକୁ ସେ ଜନସାଧାରଣଙ୍କୁ ନିବେଦନ କରିଛନ୍ତି କାରଣ ରାଜ୍ୟ ସରକାର ସବସିଡିରେ ବିପୁଳ ପରିମାଣର ଖର୍ଚ୍ଚ କରୁଛନ୍ତି ।
Click it and Unblock the Notifications
Sign in with Google