ସୋପିଆନରେ ଏନକାଉଣ୍ଟର, 4 ଆତଙ୍କୀ ନିପାତ

ଗତ 12 ଘଣ୍ଟା ମଧ୍ୟରେ ଦକ୍ଷିଣ କାଶ୍ମୀରର ସୋପିଆନ ଜିଲ୍ଲାରେ ପୁଣି ଥରେ ଏନକାଉଣ୍ଟର ହୋଇଛି। ଏଥିରେ 4 ଆତଙ୍କୀଙ୍କୁ ନିପାତ ହୋଇଛନ୍ତି ।

Published: Wednesday, October 5, 2022, 11:44 [IST]

ଶ୍ରୀନଗର: ଗତ 12 ଘଣ୍ଟା ମଧ୍ୟରେ ଦକ୍ଷିଣ କାଶ୍ମୀରର ସୋପିଆନ ଜିଲ୍ଲାରେ ପୁଣି ଥରେ ଏନକାଉଣ୍ଟର ହୋଇଛି। ଏଥିରେ 4 ଆତଙ୍କୀଙ୍କୁ ନିପାତ ହୋଇଛନ୍ତି । ଜିଲ୍ଲାର ମୋଲୁ ଅଞ୍ଚଳରେ ଆତଙ୍କୀ ଗିତିବିଧି ନେଇ ସୂଚନା ପାଇବା ପରେ ସୁରକ୍ଷାକର୍ମୀ ସର୍ଚ୍ଚ ଅପରେସନ ଆରମ୍ଭ କରିଥିଲେ। ଫଳରେ 4 ଆତଙ୍କୀ ଗୁଳି ମାଡରେ ପ୍ରାଣ ହରାଇଥିବା ନେଇ କାଶ୍ମୀର ଜୋନ ପୋଲିସ ନିଜ ଟ୍ବିଟ କରି ସୂଚନା ଦେଇଛନ୍ତି ।

ଏନକାଉଣ୍ଟର ହୋଇଥିବା ସମଗ୍ର ଅଞ୍ଚଳକୁ କର୍ଡନ କରି ସର୍ଚ୍ଚ ଅପରେସନ ଜାରି ରହିଛି । ଗତ 12 ଘଣ୍ଟା ମଧ୍ୟରେ ଏହା ହେଉଛି ଦ୍ବିତୀୟ ଏନକାଉଣ୍ଟର । କିଛି ଦିନ ହେବ ନିୟମିତ ଭାବେ ସୁରକ୍ଷାବଳ ଓ ଆତଙ୍କୀଙ୍କ ମଧ୍ୟରେ ଗୁଳି ବିନିମୟ ହେଉଛି । ଖରାପ ପାଗ କାରଣରୁ ଲୋ- ଭିଜିବିଲିଟି ଓ ତୁଷାରପାତର ସୁଯୋଗ ନେଇ ପାକିସ୍ତାନୀ ଆତଙ୍କୀମାନେ ସୀମା ଅତିକ୍ରମ କରି ଘାଟିରେ ପ୍ରବେଶ କରିବାର ଆଶଙ୍କା ରହିଛି । ତେଣୁ ସୀମାରେ ପାଟ୍ରୋଲିଂକୁ କଡାକଡି କରାଯିବା ସହିତ ଆତଙ୍କୀ ଗତିବିଧି ଉପରେ କଡା ନଜର ରଖିଛି ଭାରତୀୟ ସେନା।

ଏହି କିଛି ଦିନ ହେବ ପୁଣି କାଶ୍ମୀର ପଣ୍ଡିତ ଓ ଅଣସ୍ଥାନୀୟଙ୍କୁ ହତ୍ୟା ସରକାରଙ୍କ ଚିନ୍ତା ବଢାଇଛି । ସୀମାରେ କୌଣସି ଆତଙ୍କୀ ସୂଚନା ମିଳିବା ପରେ ତୁରନ୍ତ ଅପରେସନ ଆରମ୍ଭ କରାଯାଉଛି । ଏହି ଅପରେସନରେ ବର୍ତ୍ତମାନ ସୁଦ୍ଧା ଅନେକ ଆତଙ୍କୀ ନିପାତ ହୋଇସାରିଲାଣି । ନିହତ ଆତଙ୍କୀଙ୍କ ମଧ୍ୟରେ କିଛି ସୀମାପାର ତଥା ପାକିସ୍ତାନୀ ଆତଙ୍କୀ ମଧ୍ୟ ରହିଥିବା ପୋଲିସ ସ୍ପଷ୍ଟ କରିଛି । ଜାରି ରହିଥିବା ଆତଙ୍କୀ ନିରୋଧୀ ଅପରେସନକୁ ଆହୁରି ବ୍ୟାପକ କରିବା ପାଇଁ ସ୍ଥାନୀୟ ପୋଲିସ ଆଇଜିପି ବିଜୟ କୁମାର ସୂଚନା ପ୍ରଦାନ କରିଛନ୍ତି ।

Published On October 5, 2022