ଅନିଲଙ୍କ ଉପରେ ଇଡିର ଆକ୍ସନ, ୫୦ ଠିକଣାରେ ଚଢାଉ

ଶିଳ୍ପପତି ଅନିଲ ଅମ୍ବାନୀଙ୍କ ଏକାଧିକ ଠିକଣାରେ ଗୁରୁବାର ଚଢାଉ କରିଛି ପ୍ରବର୍ତ୍ତନ ନିର୍ଦେଶାଳୟ(ଇଡି)। ୩୦୦୦ କୋଟି ୟେସ୍ ବ୍ୟାଙ୍କ ଋଣ ଠକେଇ ମାମଲାରେ କାର୍ଯ୍ୟାନୁଷ୍ଠାନସ୍ଵରୂପ ମୁମ୍ବଇସ୍ଥିତ ଅନିଲ ଅମ୍ବାନୀଙ୍କ ପ୍ରାୟ ୫୦ଟି ଠିକଣାରେ ଇଡି ଚଢାଉ କରିଛି। ଭାରତୀୟ ଷ୍ଟେଟ୍ ବ୍ୟାଙ୍କ ରିଲାଏନ୍ସ କମ୍ୟୁନିକେସନ୍ସ ଏବଂ ଏହାର ପ୍ରମୋଟର-ନିର୍ଦ୍ଦେଶକ ଅନିଲ ଡି. ଅମ୍ବାନୀଙ୍କୁ 'ଠକେଇ' ଭାବରେ ବର୍ଗୀକୃତ କରିବାର କିଛି ଦିନ ପରେ ଏହି ଚଢାଉ କରାଯାଇଛି।

ତଦନ୍ତରୁ ଜଣାପଡିଛି ଯେ ଏହି କମ୍ପାନିଗୁଡ଼ିକ ବ୍ୟାଙ୍କରୁ ଋଣ ନେଇ ଟଙ୍କାର ଅପବ୍ୟବହାର କରିଥିଲେ। ଋଣ ଟଙ୍କାଗୁଡ଼ିକୁ ରିଲାଏନ୍ସ ଅନିଲ ଅମ୍ବାନୀ ଗ୍ରୁପର କମ୍ପାନିଗୁଡ଼ିକ ଅନ୍ୟ କମ୍ପାନିକୁ ପଠାଇବା ସହିତ ସାଧାରଣ ଲୋକ, ନିବେଶକ ଏବଂ ସରକାରୀ ସଂସ୍ଥାଗୁଡ଼ିକ ସହିତ ଠକେଇ କରିଥିଲେ।

ଇଡି କାର୍ଯ୍ୟାନୁଷ୍ଠାନ ନ୍ୟାସନାଲ ହାଉସିଂ ବ୍ୟାଙ୍କ, ସିକ୍ୟୁରିଟିଜ ଆଣ୍ଡ ଏକ୍ସଚେଞ୍ଜ ବୋର୍ଡ ଅଫ ଇଣ୍ଡିଆ, ନ୍ୟାଶନାଲ ଫାଇନାନ୍ସିଆଲ ରିପୋର୍ଟିଂ ଅଥରିଟି, ବ୍ୟାଙ୍କ ଅଫ ବରୋଦା ଏବଂ କେନ୍ଦ୍ରୀୟ ତଦନ୍ତ ବ୍ୟୁରୋ ଦ୍ୱାରା ଦାୟର ଦୁଇଟି ଏଫଆଇଆର ସମେତ ବହୁ ନିୟାମକ ଏବଂ ଆର୍ଥିକ ସଂସ୍ଥାରୁ ପ୍ରାପ୍ତ ଇନପୁଟ ଉପରେ ଆଧାରିତ।

ଇଡିର ପ୍ରାରମ୍ଭିକ ତଦନ୍ତରେ ଜଣାପଡ଼ିଛି ଯେ ୨୦୧୭ ରୁ ୨୦୧୯ ମଧ୍ୟରେ ୟେସ୍ ବ୍ୟାଙ୍କରୁ ୩୦୦୦ କୋଟି ଟଙ୍କାର ଋଣ ନିଆଯାଇଥିଲା, ଯାହାକୁ ପରେ ଅନ୍ୟ କମ୍ପାନିଗୁଡ଼ିକୁ ପଠାଇ ଦିଆଯାଇଥିଲା। କେବଳ ଏତିକି ନୁହେଁ, ଋଣ ପାସ୍ କରିବା ପାଇଁ ୟେସ୍ ବ୍ୟାଙ୍କ ଅଧିକାରୀ ଏବଂ ପ୍ରମୋଟରମାନଙ୍କୁ ଲାଞ୍ଚ ଦେବା ଘଟଣା ମଧ୍ୟ ସାମ୍ନାକୁ ଆସିଛି।