ଶ୍ରୀଲଙ୍କାକୁ ଶ୍ରୀହୀନ କରିଛି ବାତ୍ୟା ଡିଟୱା: 153 ଜଣଙ୍କ ମୃତ୍ଯୁ

ଶ୍ରୀଲଙ୍କାକୁ ଶ୍ରୀହୀନ କରିଛି ଡିଟୱା । ୨୦୦୩ ପରେ ସବୁଠାରୁ ଭୟଙ୍କର ବନ୍ୟାର ସମ୍ମୁଖୀନ ହୋଇଛି । ବାତ୍ୟା ପ୍ରଭାବରେ ଆସିଥିବା ଭୀଷଣ ବନ୍ୟାରେ ଏଯାଏ ୧୫୩ ଜଣ ପ୍ରାଣ ହରାଇଛନ୍ତି । ଶତାଧିକ ନିଖୋଜ ଥିବା ଶ୍ରୀଲଙ୍କା ବିପର୍ଯ୍ୟୟ ପରିଚାଳନା କେନ୍ଦ୍ର ପକ୍ଷରୁ ସୂଚନା ପ୍ରଦାନ କରାଯାଇଛି । ପ୍ରଳୟଙ୍କରୀ ବନ୍ୟାରେ ଦେଶର ଅର୍ଦ୍ଧାଧିକ ଭାଗ କ୍ଷତିଗ୍ରସ୍ତ ହୋଇଛି। ପ୍ରାୟ ୪୪ ହଜାର ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି। ଶ୍ରୀଲଙ୍କା ସେନାକୁ ରେସକ୍ୟୁ ଓ ରିଲିଫ କାର୍ଯ୍ୟରେ ନିୟୋଜିତ କରିଛନ୍ତି ସରକାର। ବିପତ୍ତି ସମୟରେ ଶ୍ରୀଲଙ୍କାକୁ ମାନବୀୟ ସହାୟତା ଯୋଗାଇଛି ଭାରତ।

ଅପରେସନ ସାଗର ବନ୍ଧୁରେ ଇଣ୍ଡିଆନ ଏୟାର ଫୋର୍ସର C-130Jରେ ୧୨ଟନର ରିଲିଫ ସହାୟତା ପହଞ୍ଚିଛି । ଉଦ୍ଧାର କାର୍ଯ୍ୟରେ ନିୟୋଜିତ ହୋଇଛି ଚେତକ IN R11 ବିକ୍ରାନ୍ତ । ବିଭିନ୍ନ ସ୍ଥାନରେ ଫସିଥିବା ଲୋକଙ୍କୁ ଉଦ୍ଧାର କରୁଛି 'ଚେତକ' ହେଲିକପ୍ଟର। ଏହା ସହ ଏନଡିଆରଏଫର ୮୦ ଜଣିଆ ଟିମ ମଧ୍ୟ ସହାୟତା ପାଇଁ ଶ୍ରୀଲଙ୍କାରେ ପହଞ୍ଚିଛନ୍ତି । ବାତ୍ୟା ପୀଡ଼ିତଙ୍କ ପାଇଁ ୬ ଦଶମିକ ୫ ମେଟ୍ରିକ ଟନ ଖାଦ୍ୟ ଓ ଔଷଧ ପଠାଯାଇଛି । ସେପଟେ ସମ୍ଭାବ୍ୟ ବାତ୍ୟାକୁ ଦୃଷ୍ଟିରେ ରଖି ଚେନ୍ନାଇ ବିମାନବନ୍ଦରରୁ ୫୪ଟି ବିମାନକୁ ବାତିଲ କରାଯାଇଛି । ଫଳରେ କଲମ୍ବୋ ବିମାନବନ୍ଦରରେ ଫସି ରହିଛନ୍ତି ୩୦୦ ଭାରତୀୟ ।