ରାଜଧାନୀରେ କଲବଲ କରୁଛି ଘନ କୁହୁଡ଼ି;୧୨୯ ବିମାନ ବାତିଲ

ଦିଲ୍ଲୀ ପୁଣି ଥରେ ଘନ କୁହୁଡ଼ି ଏବଂ ବିପଦଜନକ ପ୍ରଦୂଷଣରେ ଆଚ୍ଛାଦିତ ହୋଇଛି । ଶନିବାର ସକାଳେ ଅନେକ ଅଞ୍ଚଳରେ ରାସ୍ତା ସ୍ପଷ୍ଟ ଦେଖାଯାଉନଥିବାରୁ ସଡ଼କ ପରିବହନଠୁ ଆରମ୍ଭ କରି ବିମାନ ଚଳାଚଳ ମଧ୍ୟ ବାଧାପ୍ରାପ୍ତ ହୋଇଛି । ଇନ୍ଦିରା ଗାନ୍ଧୀ ଅନ୍ତର୍ଜାତୀୟ (IGI) ବିମାନବନ୍ଦର ବିଶେଷ ପ୍ରଭାବିତ ହୋଇଛି ।

ଯାତ୍ରୀ ସୁରକ୍ଷାକୁ ପ୍ରାଥମିକତା ଦେଇ, ବିମାନବନ୍ଦର ପରିଚାଳନା ଆଜି ପାଇଁ ୬୬ଟି ଆଗମନ ଏବଂ ୬୩ଟି ପ୍ରସ୍ଥାନ ମୋଟ୍ ୧୨୯ଟି ବିମାନ ବାତିଲ କରିଛି । ବିମାନ ବାତିଲ ହେବା ଦ୍ୱାରା ହଜାର ହଜାର ଯାତ୍ରୀ ପ୍ରଭାବିତ ହୋଇଛନ୍ତି । ଅନେକ ବିମାନକୁ ଅନ୍ୟତ୍ର ସ୍ଥାନାନ୍ତରିତ କରାଯାଉଛି କିମ୍ବା ବିଳମ୍ବ କରାଯାଉଛି । ଏଥିସହ ୩୨ଟି ଟ୍ରେନ୍ ମଧ୍ୟ ନିର୍ଦ୍ଧାରିତ ସମୟଠାରୁ ବିଳମ୍ୱରେ ଚାଲୁଛି ।

ପାଣିପାଗ ବିଭାଗ ଅନୁଯାୟୀ, ଆଗାମୀ କିଛି ଦିନ ପାଇଁ ଘନ କୁହୁଡ଼ି ଲାଗି ରହିବ ବୋଲି ଆଶା କରାଯାଉଛି । ଯାତ୍ରୀମାନଙ୍କୁ ସେମାନଙ୍କର ବିମାନର ସ୍ଥିତି ଯାଞ୍ଚ କରିବାକୁ ଏବଂ କେବଳ ଆବଶ୍ୟକ ହେଲେ ହିଁ ଯାତ୍ରା କରିବାକୁ ଅନୁରୋଧ କରାଯାଇଛି । ଶନିବାର ସକାଳେ ଜାତୀୟ ରାଜଧାନୀ ଦିଲ୍ଲୀରେ ବାୟୁ ପ୍ରଦୂଷଣ ଗୁରୁତର ସ୍ଥିତିରେ ପହଞ୍ଚିଥିଲା ।

କେନ୍ଦ୍ରୀୟ ପ୍ରଦୂଷଣ ନିୟନ୍ତ୍ରଣ ବୋର୍ଡ ( CPCB), ଦିଲ୍ଲୀ ପ୍ରଦୂଷଣ ନିୟନ୍ତ୍ରଣ କମିଟି ( DPCC) ଏବଂ IMDର ତଥ୍ୟ ଅନୁଯାୟୀ, ରାଜଧାନୀର ପ୍ରାୟ ସମସ୍ତ ଅଞ୍ଚଳରେ ବାୟୁ ଗୁଣବତ୍ତା ସୂଚକାଙ୍କ(AQI) ୩୦୦ ଉପରେ ରେକର୍ଡ କରାଯାଇଛି, ଯାହା 'ଅତ୍ୟନ୍ତ ଖରାପ' ରୁ 'ଗମ୍ଭୀର' ବର୍ଗରେ ଆସେ ।