ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କୁ ମିଳିଲା ନାହିଁ ଜାମିନ

Updated: Wednesday, June 5, 2024, 17:04 [IST]

Arvind Kejriwal: ମିଳିଲା ନାହିଁ ଦିଲ୍ଲୀ ମୁଖ୍ୟମନ୍ତ୍ରୀ ତଥା ଆମ୍ ଆଦମୀ ପାର୍ଟି ଜାତୀୟ ସଂଯୋଜକ ଅରବିନ୍ଦ କେଜ୍ରିୱାଲଙ୍କୁ ଜାମିନ । ଆଜି ରାଉସ୍ ଆଭେନ୍ୟୁ କୋର୍ଟ ତାଙ୍କ ଜାମିନ ଆବେଦନକୁ ପ୍ରତ୍ୟାଖ୍ୟାନ କରିଛନ୍ତି । ମଦ ଦୁର୍ନିତୀ ମାମଲାରେ ମଧ୍ୟବର୍ତ୍ତୀକାଳୀନ ଜାମିନ ପାଇଁ ସେ ଆବେଦନ କରିଥିଲେ।

ଏହା ସହ ରାଉସ୍ ଆଭେନ୍ୟୁ କୋର୍ଟ ଅରବିନ୍ଦ କେଜ୍ରିୱାଲଙ୍କ ନ୍ୟାୟିକ ହେପାଜତକୁ 14 ଦିନ ବୃଦ୍ଧି କରି ଦେଇଛନ୍ତି । ଜାମିନକୁ 19 ଜୁନ୍ ପର୍ଯ୍ୟନ୍ତ ବୃଦ୍ଧି କରାଯାଇଛି। ଭିଡିଓ କନଫରେନ୍ସିଂ ମାଧ୍ୟମରେ କେଜ୍ରିୱାଲ କୋର୍ଟରେ ହାଜର ହୋଇଥିଲେ।

ସୂଚନାଥାଉ ଯେ, ମାର୍ଚ୍ଚ 21 ରେ ଦିଲ୍ଲୀ ଏକ୍ସାଇଜ୍ ପଲିସି ମାମଲାରେ ଅରବିନ୍ଦ କେଜ୍ରିୱାଲଙ୍କୁ ଇଡି ଗିରଫ କରିଥିଲା। ଏହି ଗିରଫଦାରୀକୁ ସୁପ୍ରିମକୋର୍ଟରେ ଚ୍ୟାଲେଞ୍ଜ କରିଥିଲେ। ମେ 10 ରେ, ସୁପ୍ରିମକୋର୍ଟ ତାଙ୍କୁ ଲୋକସଭା ନିର୍ବାଚନ ପାଇଁ ପ୍ରଚାର କରିବା ପାଇଁ 21 ଦିନ ପାଇଁ ମଧ୍ୟବର୍ତ୍ତୀକାଳୀନ ଜାମିନ ପ୍ରଦାନ କରିଥିଲେ ଏବଂ ତାଙ୍କୁ ଜୁନ୍ 2ରେ ଆତ୍ମସମର୍ପଣ କରିବାକୁ କହିଥିଲେ।

ସେ ସିଏମ୍ କାର୍ଯ୍ୟାଳୟକୁ ଯିବେ ନାହିଁ କିମ୍ବା କୌଣସି ସରକାରୀ ଫାଇଲରେ ଦସ୍ତଖତ କରିବେ ନାହିଁ ବୋଲି କୋର୍ଟ ମଧ୍ୟ ସର୍ତ୍ତ ରଖିଛନ୍ତି। ଆବଶ୍ୟକ ହେଲେ ତାଙ୍କୁ ଲେଫ୍ଟନାଣ୍ଟ ଗଭର୍ଣ୍ଣରଙ୍କଠାରୁ ଅନୁମତି ନେବାକୁ ପଡ଼ିବ ବୋଲି କୋର୍ଟ କହିଥିଲେ ।

ମଧ୍ୟବର୍ତ୍ତୀକାଳୀନ ଜାମିନ ସମୟରେ ସ୍ୱାସ୍ଥ୍ୟକୁ ଦର୍ଶାଇ ସିଏମ୍ କେଜ୍ରିୱାଲ ମଧ୍ୟବର୍ତ୍ତୀକାଳୀନ ଜାମିନର ଅବଧି ବୃଦ୍ଧି କରିବାକୁ ଆବେଦନ କରିଥିଲେ। ଏଥିପାଇଁ ସେ ପରେ ରାଉସ୍ ଆଭେନ୍ୟୁ କୋର୍ଟରେ ମଧ୍ୟ ଏକ ଆବେଦନ କରିଥିଲେ। ଶୁଣାଣି ସମୟରେ ଇଡି ତାଙ୍କ ଆବେଦନକୁ ବିରୋଧ କରିଥିଲେ। ବର୍ତ୍ତମାନ କୋର୍ଟ ତାଙ୍କ ଆବେଦନକୁ ପ୍ରତ୍ୟାଖ୍ୟାନ କରିଛନ୍ତି।