ଦିଲ୍ଲୀ ବିଧାନସଭା ନିର୍ବାଚନର ଫଳାଫଳ Live: ଆପକୁ ଲାଗିଲା ବଡ଼ ଝଟକା,୨୭ ବର୍ଷ ପରେ ଫୁଟିଲା ପଦ୍ମ

Delhi Assembly Election 2025: ନୂଆଦିଲ୍ଲୀ: ଦିଲ୍ଲୀ ବିଧାନସଭା ନିର୍ବାଚନରେ ଦୀର୍ଘ ୨୭ ବର୍ଷ ପରେ ବିଜୟର ସ୍ୱାଦ ଚାଖିଛି ବିଜେପି। ବିପୁଳ ବହୁମତରେ ନିର୍ବାଚନରେ ଜୟ ଲାଭ କରିଥିବାରୁ ବିଜେପି କାର୍ଯ୍ୟକର୍ତ୍ତାମାନଙ୍କ ମଧ୍ୟରେ ଖୁସିର ଲହରି ଖେଳିଯାଇଛି। ଏହି ଜନମତକୁ ନେଇ ବିଭିନ୍ନ ବିଜେପି କାର୍ଯ୍ୟାଳୟରେ ବିଜୟ ଉତ୍ସବ ପାଳନ ଆରମ୍ଭ ହୋଇଯାଇଛି। ଏହି ବିଜୟ ଉତ୍ସବରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ସାମିଲ ହୋଇଛନ୍ତି। ସେ ଦିଲ୍ଲୀସ୍ଥିତ ବଜେପି ମୁଖ୍ୟାଳୟରେ ପହଞ୍ଚି ଦଳିୟ କର୍ମିଙ୍କ ସହ ଜନତାଙ୍କୁ ସମ୍ବୋଧନ କରିଛନ୍ତି।ଦଳୀୟ କାର୍ଯ୍ୟାଳୟରେ କାର୍ଯ୍ୟକର୍ତ୍ତାମାନଙ୍କୁ ସମ୍ବୋଧିତ କଲା ବେଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଇଣ୍ଡି ବ୍ଲକ୍‌କୁ କଟାକ୍ଷ କରିଥିଲେ। ବିରୋଧୀଙ୍କ ମେଣ୍ଟ ଇଣ୍ଡି ବ୍ଲକ୍‌ରେ ଫାଟ ଆଉ ଲୁଚି ରହି ନଥିବା ବେଳେ ପ୍ରଧାନମନ୍ତ୍ରୀ କହିଥିଲେ, ଦିଲ୍ଲୀରେ ଇଣ୍ଡି ବ୍ଲକ୍‌ର ସଦସ୍ୟମାନେ କଂଗ୍ରେସ ବିପକ୍ଷରେ ଲଢ଼ିଥିଲେ। ସେମାନେ କଂଗ୍ରେସକୁ ହରାଇବାରେ ସମର୍ଥ ହୋଇଗଲେ। କିନ୍ତୁ ଆପ୍‌କୁ ଜିତାଇବାରେ ବିଫଳ ହେଲେ।

କଂଗ୍ରେସକୁ ସମାଲୋଚନା କରି ପ୍ରଧାନମନ୍ତ୍ରୀ କହିଥିଲେ, ଆଜି ପୁଣିଥରେ କଂଗ୍ରେସକୁ କଡ଼ା ସନ୍ଦେଶ ମିଳିଛି। ପୁଣି ଥରେ ଖାତା ଖୋଲିବାରେ ବିଫଳ ହୋଇଛି କଂଗ୍ରେସ। ୬ ଥର ଖାତା ଖୋଲିପାରିନି କଂଗ୍ରେସ। ଦିଲ୍ଲୀରେ କଂଗ୍ରେସକୁ ଜିରୋର ଡବଲ ହ୍ୟାଟ୍ରିକ ମିଳିଛି। କଂଗ୍ରେସ ଉପରେ ଦେଶ ଆଉ ଭରସା କରୁନି। ମୁଁ ପୂର୍ବରୁ କହିଛି କଂଗ୍ରେସ ଏକ ପରଜୀବୀ ପାର୍ଟି। ନିଜେ ବୁଡ଼ିବା ସହ ସହଯୋଗୀ ଦଳକୁ ବି ବୁଡ଼ାଉଛି।