ମହାବିକାଶ ଅଘାଡ଼ିରେ ଫାଟ! ବିଏମସି ନିର୍ବାଚନରେ ଏକୁଟିଆ ଲଢ଼ିବ କଂଗ୍ରେସ

ବିଏମସି ନିର୍ବାଚନ ପୂର୍ବରୁ ମହାବିକାଶ ଅଘାଡ଼ିରେ ଫାଟ ଦେଖା ଯାଇଛି। ଠାକରେ ଭ୍ରାତା ଏକ ହେବା ପରେ ଅଘାଡ଼ିରେ ଏବେ ସବୁକିଛି ଠିକ୍ ନଥିବା ଖବର ଆସୁଛି। ମୁମ୍ବାଇ ବିଏମସି ନିର୍ବାଚନରେ ଠାକରେ ଭ୍ରାତା (ଉଦ୍ଧବ ଠାକରେ ଓ ରାଜ ଠାକରେ) ମରାଠୀ-ମୁସ୍ଲିମ ସମୀକରଣରୁ ବିଜୟ ଆଶା କରୁଥିବା ବେଳେ ଉଦ୍ଧବ ଓ ରାଜ ଏକାଠି ହେବା କଂଗ୍ରେସ ଆଖିରେ ଯାଉ ନାହିଁ। ଏଣୁ କଂଗ୍ରେସ ଶନିବାର ବିଏମସି ନିର୍ବାଚନ ଏକାକୀ ଲଢିବ ବୋଲି ଘୋଷଣା କରିଛି।

ମହାରାଷ୍ଟ୍ର କଂଗ୍ରେସ ପ୍ରଭାରୀ ରମୋ ଚେନ୍ନିଥଲା ଶନିବାର ଏହା ସ୍ପଷ୍ଟ କରିଛନ୍ତି। ଦଳ ସମ୍ପୂର୍ଣ୍ଣ ପ୍ରସ୍ତୁତ ହୋଇ ନିର୍ବାଚନ ମଇଦାନକୁ ଓହ୍ଲାଇବ। ଦଳ ଖୁବଶୀଘ୍ର ନିଜର ଘୋଷଣାପତ୍ର ଜାରି କରିବ। ଚେନ୍ନିଥଲା କହିଛନ୍ତି ଯେ, ବିଏମସିରେ ହୋଇଥିବା ଭ୍ରଷ୍ଟାଚାରକୁ ନେଇ ଏକ ଚାର୍ଜଶିଟ୍‌ ଜନତାଙ୍କ ସମ୍ମୁଖରେ ରଖାଯିବ। ମୁମ୍ବଇର ବିକାଶ ଯେପରି ହେବା ଆବଶ୍ୟକ ସେପରି ହୋଇନାହିଁ। ଏଥିପାଇଁ କିଏ ଦାୟୀ ତାହା ଜନତା ଭଲ ଭାବେ ଜାଣିଛନ୍ତି।

ସେ ଆହୁରି କହିଥିଲେ ଯେ, ବିଏମସି ନିର୍ବାଚନ ସୁପ୍ରିମକୋର୍ଟଙ୍କ ନିର୍ଦେଶ ପରେ ଅନୁଷ୍ଠିତ ହେବାକୁ ଯାଉଛି। ଏହା ପରେ ଦଳ ନିର୍ବାଚନୀ ପ୍ରସ୍ତୁତିକୁ ନେଇ ଆଲୋଚନା କରିଛି। ତୃଣମୂଳସ୍ତରରେ ସଂଗଠନକୁ ମଜଭୁତ କରାଯାଉଛି।