ଡାକ୍ତର ନଲେଖିଲେ କିଣି ହେବନି କଫ ସିରପ

ମଧ୍ୟପ୍ରଦେଶରେ କଫ ସିରପ ଯୋଗୁ ଅନେକ ପିଲାଙ୍କ ମୃତ୍ୟୁର ଏକ ଚାଞ୍ଚଲ୍ୟକର ଘଟଣା ସାମ୍ନାକୁ ଆସିଥିଲା। ଏପରି ଘଟଣାକୁ ରୋକିବା ପାଇଁ, ସରକାର କହିଛନ୍ତି ଯେ, ଖୁବ୍ ଶୀଘ୍ର ଏକ ନୂତନ ନିୟମ ପ୍ରଣୟନ କରିବେ। ଯଦି ଏହା କାର୍ଯ୍ୟକାରୀ ହୁଏ, ତେବେ ଡାକ୍ତରଙ୍କ ପ୍ରେସକ୍ରିପସନ ବିନା ଫାର୍ମାସିରେ କଫ ସିରପ ଉପଲବ୍ଧ ହେବ ନାହିଁ। ଏହା ସୁରକ୍ଷା ବୃଦ୍ଧି କରିବ, କିନ୍ତୁ ଲୋକଙ୍କ ପକେଟ ଉପରେ ବୋଝ ମଧ୍ୟ ବଢ଼ାଇବ। କଫ ସିରପ ଯେତେ ଶସ୍ତା କିମ୍ବା ମହଙ୍ଗା ହେଉନା କାହିଁକି, ଏହାକୁ କିଣିବା ପାଇଁ ଡାକ୍ତରଙ୍କ ପ୍ରେସକ୍ରିପସନ୍ ଆବଶ୍ୟକ ହେବ ଏବଂ ଡାକ୍ତରଙ୍କ ଫିସ୍ ମଧ୍ୟ ଦେବାକୁ ପଡିବ।

ଡାକ୍ତରଙ୍କ ସାଧାରଣତଃ ଫିସ୍ ୨୦୦ ରୁ ୫୦୦ ଟଙ୍କା ହୋଇଥାଏ । ସ୍ପଷ୍ଟ ଭାବରେ, ନୂତନ ନିୟମ କାର୍ଯ୍ୟକାରୀ ହେବା ପରେ, ୫୦ ଟଙ୍କା ମୂଲ୍ୟର ଏକ କଫ ସିରପ କିଣିବା ପାଇଁ ଡାକ୍ତରଙ୍କ ଫିସ୍ ଦେବା ସହିତ ସିରପର ଦାମଟଠାରୁ ଅନେକ ଗୁଣା ଅଧିକ ଖର୍ଚ୍ଚ କରିବାକୁ ପଡିବ। ଗଣମାଧ୍ୟମ ରିପୋର୍ଟ ଅନୁସାରେ, କେନ୍ଦ୍ର ସରକାର ଔଷଧ ପରାମର୍ଶଦାତା କମିଟିର ରିପୋର୍ଟ ସମୀକ୍ଷା କରୁଛନ୍ତି ଏବଂ ଏହି ପ୍ରସ୍ତାବରେ ପରିବର୍ତ୍ତନ କରି କଫ ସିରପ ସମ୍ପର୍କରେ ନୂତନ ନିୟମ ଆଣିପାରନ୍ତି ବୋଲି କୁହାଯାଉଛି।

ଏହା ଅନୁମାନ କରାଯାଉଛି ଯେ, କମିଟି ପ୍ରସ୍ତାବ ଦେଇଛି, ଡାକ୍ତରଙ୍କ ପ୍ରେସକ୍ରିପସନ ବିନା ବିକ୍ରି ହୋଇପାରିବା ଔଷଧ ତାଲିକାରୁ କଫ ସିରପକୁ ଖୁବ୍ ଶୀଘ୍ର ବାଦ ଦିଆଯାଇପାରେ। ରିପୋର୍ଟରେ କୁହାଯାଇଛି, କଫ ସିରପ ସହିତ ଜଡିତ ସାମ୍ପ୍ରତିକ ଘଟଣାଗୁଡ଼ିକୁ ଦୃଷ୍ଟିରେ ରଖି, ଏହାର ବିକ୍ରୟ ଉପରେ ନଜର ରଖିବା ଗୁରୁତ୍ୱପୂର୍ଣ୍ଣ। ବର୍ତ୍ତମାନ, କଫ ସିରପଗୁଡ଼ିକୁ ସୂଚୀ କେ (K)ରେ ତାଲିକାଭୁକ୍ତ କରାଯାଇଛି। ଯାହାକୁ ଏକ କମ୍ ବିପଦପୂର୍ଣ୍ଣ ଔଷଧ ଭାବରେ ବିବେଚନା କରାଯାଏ। ତେଣୁ, ଏପରି ଔଷଧ ଲାଇସେନ୍ସ ବିନା ବିକ୍ରି କରାଯାଇପାରିବ। ତଥାପି, ଏହାର ବିକ୍ରୟ ନିୟନ୍ତ୍ରଣ କରୁଥିବା ନିୟମଗୁଡ଼ିକ ଖୁବ୍ ଶୀଘ୍ର କଠୋର କରାଯିବ।