ଇଣ୍ଡିଆ ମେଣ୍ଟ ଉପରେ ବଡ଼ ବୟାନ ଦେଲେ କଂଗ୍ରେସ ନେତା, କହିଲେ ଶେଷ ହୋଇଗଲା.....

ନୂଆଦିଲ୍ଲୀ : ୨୦୨୪ ଲୋକ ସଭା ନିର୍ବାଚନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱାଧୀନ ଭାଜପା ସରକାରଙ୍କୁ କ୍ଷମତାରୁ ହଟାଇବା ଉଦ୍ଦେଶ୍ୟରେ ଗଠିତ ଅଖିଳ ଭାରତୀୟ ମେଣ୍ଟ କ'ଣ ଶେଷ ହୋଇଗଲା? ଏହି ପ୍ରଶ୍ନ ବର୍ତ୍ତମାନ ଲୋକଙ୍କ ମନରେ ଉଙ୍କି ମାରୁଛି। କାରଣ ଆରଜେଡି ନେତା ତେଜସ୍ବୀ ଯାଦବଙ୍କ ପରେ କଂଗ୍ରେସ ନେତା ପଓ୍ବନ ଖେରା ବଡ଼ ବୟାନ ଦେଇଛନ୍ତି। ସେ କହିଛନ୍ତି, ଏହି ମେଣ୍ଟ କେବଳ ଲୋକ ସଭା ନିର୍ବାଚନ ପର୍ଯ୍ୟନ୍ତ ଥିଲା।

ଇଣ୍ଡିଆ ମେଣ୍ଟ ସମ୍ପର୍କରେ ଏକ ପ୍ରଶ୍ନର ଉତ୍ତରରେ ପଓ୍ବନ ଖେରା କହିଛନ୍ତି, ଇଣ୍ଡିଆ ଆଲାଏନ୍ସ ଲୋକ ସଭା ନିର୍ବାଚନ ପାଇଁ ଥିଲା ଏବଂ ଜାତୀୟ ସ୍ତରରେ ଥିଲା। ବିଭିନ୍ନ ରାଜ୍ୟର ପରିସ୍ଥିତି ଉପରେ ନିର୍ଭର କରି, ଦଳଗୁଡ଼ିକ, ସେ କଂଗ୍ରେସ ହୁଅନ୍ତୁ କିମ୍ବା ଆଞ୍ଚଳିକ ଦଳ, ନିଷ୍ପତ୍ତି ନିଅନ୍ତି ଯେ ସେମାନଙ୍କୁ ଏକାଠି ଲଢ଼ିବାକୁ ପଡିବ ନା ପୃଥକ ଭାବରେ ଲଢ଼ିବାକୁ ପଡିବ।

ପୂର୍ବରୁ ଆରଜେଡି ନେତା ତେଜସ୍ବୀ ଯାଦବ ମଧ୍ୟ ସ୍ପଷ୍ଟ ଭାବରେ କହିଥିଲେ ଯେ ଇଣ୍ଡିଆ ମେଣ୍ଟ ଶେଷ ହୋଇଯାଇଛି। ସେ କହିଥିଲେ ଯେ ଏହି ମେଣ୍ଟ କେବଳ ଲୋକ ସଭା ନିର୍ବାଚନ ପର୍ଯ୍ୟନ୍ତ ଥିଲା ଏବଂ ନିର୍ବାଚନ ଶେଷ ହେବା ପରେ ଏହା ଶେଷ ହୋଇଯାଇଛି।