ଉତ୍ତରାଖଣ୍ଡ ହିମସ୍ଖଳନ ଘଟଣା: ପ୍ରଭାବିତ ଅଞ୍ଚଳ ବୁଲି ଦେଖିଲେ ମୁଖ୍ୟମନ୍ତ୍ରୀ, ଆହତଙ୍କୁ ଭେଟିଲେ

ଧସିଲା ପାହାଡ, ବନ୍ଦ ହେଲା ରାସ୍ତା । ପାହାଡ ଧସିବା କାରଣରୁ ଜାତୀୟ ରାଜପଥ ବନ୍ଦ । କର୍ଣ୍ଣାପ୍ରୟାଗ ନିକଟରେ ପାହାଡର ବଡ ବଡ ପଥର ଖଣ୍ଡ ରାସ୍ତାରେ ପଡିଥିବାରୁ ଋଷିକେଶ-ବଦ୍ରିନାଥ ହାଇୱେ ବନ୍ଦ ରହିଛି । ରାସ୍ତାର ଦୁଇ ପାର୍ଶ୍ୱରେ ବଡ ବଡ ଗାଡି ଅଟକି ରହିଛି । ତେବେ ଗତକାଲି ପ୍ରବଳ ବର୍ଷା ପରେ ସ୍ଥିତି ଏମିତି ହୋଇଛି । କିଛି କିଛି ସ୍ଥାନରେ ପାହାଡ ଧସିବା ସହ ରାସ୍ତା ବି ଧୋଇ ଯାଇଛି । ଲଗାଣ ବର୍ଷା ବିପଦକୁ ଡାକି ଆଣିବା ପରେ ଏବେ ରାଜପଥ ଉପରେ କାର, ଟ୍ରକ୍ ଅଟକି ରହିଛି ।

ସେହିପରି ଗତକାଲି ଉତ୍ତରାଖଣ୍ଡର ଚମୋଲି ଜିଲ୍ଲାର ବଦ୍ରିନାଥରେ ହିମସ୍ଖଳନ ହୋଇଥିଲା । ଉଚ୍ଚ ସୀମାନ୍ତ ଗ୍ରାମ ମାନା ନିକଟରେ ପ୍ରବଳ ହିମସ୍ଖଳନ ଯୋଗୁ ଭୟାନକ ସ୍ଥିତି ଉପୁଜିଛି । ବିଆରଓର ୫୭ ଜଣ ଶ୍ରମିକ ବରଫ ଅତଡ଼ା ତଳେ ଫସି ରହିଥିବାବେଳେ ବର୍ତ୍ତମାନ ସୁଦ୍ଧା ୪୭ ଜଣଙ୍କୁ ଉଦ୍ଧାର କରାଯାଇଛି । ଆହୁରି ୮ ଜଣ ଏବେବି ବରଫ ତଳେ ଫସି ରହିଛନ୍ତି ।

ଆଉ ଆଜି ଏହି ଭୟଙ୍କର ହିମସ୍ଖଳନ ଘଟଣାରେ ଆକାଶ ମାର୍ଗରୁ ପ୍ରଭାବିତ ଅଞ୍ଚଳର ଅନୁଧ୍ୟାନ କରିଛନ୍ତି ମୁଖ୍ୟମନ୍ତ୍ରୀ । ହେଲିକପ୍ଟର ଯୋଗେ ଉତ୍ତରାଖଣ୍ଡ ମୁଖ୍ୟମନ୍ତ୍ରୀ ପୁଷ୍କର ସିଂହ ଧାମୀ ମାନା ଗାଁର ସେ କ୍ଷତିଗ୍ରସ୍ତ ଅଞ୍ଚଳକୁ ଦେଖିଛନ୍ତି । ତା ସହ ମୁଖ୍ୟମନ୍ତ୍ରୀ ଯୋଶୀମଠ ଯାଇ ସେଠାରେ ଚିକିତ୍ସିତ ହେଉଥିବା ଆହତମାନଙ୍କୁ ଭେଟିଛନ୍ତି ।