ଟ୍ରକକୁ ଧକ୍କା ଦେଲା କାର୍‌: ୪ ମୃତ

ଉତ୍ତର ପ୍ରଦେଶରେ ଭୟଙ୍କର ସଡକ ଦୁର୍ଘଟଣା। ଦ୍ରୁତଗାମୀ କାର୍ ଏକ ଟ୍ରକ ସହ ଧକ୍କା ହୋଇଛି। ଏହି ଦୁର୍ଘଟଣାରେ ଚାରି ଜଣଙ୍କ ମୃତ୍ୟୁ ଘଟିଛି। ବୁଧବାର ବିଳମ୍ବିତ ରାତିରେ ଉତ୍ତର ପ୍ରଦେଶର ଆମରୋହାରେ ଜାତୀୟ ରାଜପଥ ୯ରେ ଏହି ଭୟଙ୍କର ସଡକ ଦୁର୍ଘଟଣା ଘଟିଛି। ମୃତକ ଚାରିଜଣ ରାଜବପୁର ପୋଲିସ ଷ୍ଟେସନ ଅଞ୍ଚଳର ଶ୍ରୀ ଭେଙ୍କଟେଶ୍ୱର ବିଶ୍ୱବିଦ୍ୟାଳୟର ଡାକ୍ତରୀ ଛାତ୍ର ବୋଲି କୁହାଯାଉଛି। କାର ସହିତ ଧକ୍କା ହୋଇଥିବା ଟ୍ରକଟି ଜିନିଷପତ୍ରରେ ଭର୍ତ୍ତି ଥିଲା।

ସୂଚନା ଅନୁସାରେ, ଏହି ଘଟଣାଟି ଆମରୋହା ଜିଲ୍ଲାର ରାଜବପୁର ପୋଲିସ ଷ୍ଟେସନ ଅଞ୍ଚଳରେ ଘଟିଛି। ସେଠାରେ ଅତ୍ରାସି ନିକଟରେ, ଏକ ଦ୍ରୁତଗାମୀ କାର ରାସ୍ତା କଡ଼ରେ ଠିଆ ହୋଇଥିବା ଏକ ଟ୍ରକକୁ ଧକ୍କା ଦେଇଥିଲା। ଧକ୍କା ଏତେ ଜୋରଦାର ଥିଲା ଯେ କାରଟି ଦୁର୍ଘଟଣଗ୍ରସ୍ଥ ହୋଇ ଘଟଣାସ୍ଥଳରେ ସମସ୍ତ ଚାରିଜଣ ଯାତ୍ରୀଙ୍କ ମୃତ୍ୟୁ ହୋଇଥିଲା।

ରାତି ପ୍ରାୟ ୧୦ଟାରେ ଫ୍ଲାଏଓଭର ନିକଟରେ ଏହି ଦୁର୍ଘଟଣା ଘଟିଥିଲା। ପୀଡିତମାନେ ମେରଠରୁ ଗାଜିଆବାଦ ଫେରୁଥିଲେ। ଦୁର୍ଘଟଣା ପରେ, ଟ୍ରକ ଡ୍ରାଇଭର ଘଟଣାସ୍ଥଳରୁ ପଳାଇ ଯାଇଥିଲେ। ଟ୍ରକଟି ଅନ୍ଧାରରେ ପାର୍କିଂ କରାଯାଇଥିବାରୁ ଦୁର୍ଘଟଣା ଘଟିଥିବା ସନ୍ଦେହ କରାଯାଉଛି।

ଦୁର୍ଘଟଣାର ଶିକାର ହୋଇଥିବା ଯାତ୍ରୀମାନେ ଗୋଟିଏ କାରରେ ଯାତ୍ରା କରୁଥିଲେ ଏବଂ ବାଟରେ ଦୁର୍ଘଟଣାର ସମ୍ମୁଖୀନ ହୋଇଥିଲେ। ସୂଚନା ପାଇ ପୋଲିସ ଦଳ ଘଟଣାସ୍ଥଳରେ ପହଞ୍ଚି କାରରେ ଫସି ରହିଥିବା ମୃତଦେହଗୁଡ଼ିକୁ ବାହାର କରି ପୋଷ୍ଟମର୍ଟମ ପାଇଁ ପଠାଇଥିଲେ। ପୋଲିସ ଦୁର୍ଘଟଣା ପଛର କାରଣ ଖୋଜିବା ପାଇଁ ତଦନ୍ତ ଆରମ୍ଭ କରିଛି। ରାସ୍ତା କଡ଼ରେ ଛିଡା ହୋଇଥିବା ଟ୍ରକ୍ ସହିତ ଧକ୍କା ହେବା ପରେ ଗାଡି ଦୁର୍ଘଟଣାଗ୍ରସ୍ତ ହେବା ଏହା ପ୍ରଥମ ଘଟଣା ନୁହେଁ। ଏହା ପୂର୍ବରୁ ଅନେକ ଥର ଘଟିଛି। ରାସ୍ତା କଡ଼ରେ ଟ୍ରକ୍ ପାର୍କିଂ କରୁଥିବା ଲୋକଙ୍କ ବିରୁଦ୍ଧରେ ମଧ୍ୟ ପୋଲିସ କାର୍ଯ୍ୟାନୁଷ୍ଠାନ ଗ୍ରହଣ କରୁଛି, କିନ୍ତୁ ଏପରି ଘଟଣା ହ୍ରାସ ପାଉନାହିଁ।