ଶିବସେନାରେ ସାମିଲ ହେଲେ ଗୋବିନ୍ଦା, ଏହି ଆସନରୁ କରିବେ ପ୍ରତିଦ୍ୱନ୍ଦିତା

Updated: Thursday, March 28, 2024, 18:50 [IST]

ମୁମ୍ବାଇ : ଶିବସେନାରେ ସାମିଲ ହେଲେ ଅଭିନେତା ଗୋବିନ୍ଦା । ଗୁରୁବାର ମହାରାଷ୍ଟ୍ର ମୁଖ୍ୟମନ୍ତ୍ରୀ ଏକନାଥ ଶିନ୍ଦେଙ୍କ ଉପସ୍ଥିତିରେ ସେ ଶିବସେନାରେ ଯୋଗ ଦେଇଛନ୍ତି । ଶିନ୍ଦେଙ୍କ ଦଳ ତାଙ୍କୁ ମୁମ୍ବାଇ ଉତ୍ତର ପଶ୍ଚିମ ଲୋକ ସଭା ଆସନରୁ ଟିକେଟ୍ ଦେଇପାରେ ବୋଲି ଅନୁମାନ କରାଯାଉଛି ।

ଯଦି ଏହା ଘଟେ ତେବେ ସେ ଶିବସେନା (ୟୁବିଟି) ପ୍ରାର୍ଥୀ ଅମୋଲ କୀର୍ତ୍ତିକରଙ୍କ ସହ ପ୍ରତିଦ୍ୱନ୍ଦ୍ୱିତା କରିବେ । ଏହାପୂର୍ବରୁ ବୁଧବାର ଦିନ ଗୋବିନ୍ଦା ସିନ୍ଦେ କ୍ୟାମ୍ପ ନେତା ତଥା ପୂର୍ବତନ ଶିବସେନା ବିଧାୟକ କୃଷ୍ଣ ହେଗଡେଙ୍କୁ ଭେଟିଥିଲେ, ଯାହାର ଫଟୋ ମଧ୍ୟ ସୋସିଆଲ ମିଡିଆରେ ହୋଥିଲା ଭାଇରାଲ ।

ଶିବସେନାରେ ସାମିଲ ହେବାପରେ ଗୋବିନ୍ଦା କହିଛନ୍ତି, 'ମୋର ବନବାସ ଶେଷ ହୋଇଛି । ସିନ୍ଦେଜୀଙ୍କ ଅଧୀନରେ ଚାଲିଥିବା ରାମ ରାଜ୍ୟରେ ମୁଁଏବେ ପ୍ରବେଶ କରିଛି । ୨୦୦୪ ରୁ ୨୦୦୯ ଯାଏଁ ମୁଁ ରାଜନୀତିରେ ଥିଲି । ତାହା ୧୪ ତମ ଲୋକସଭା ଥିଲା । ଆଉ ଏବେ ଗୋଟିଏ ଚମତ୍କାର ସଂଯୋଗ ଘଟିଛି କହିଲେ ଅତ୍ୟୁକ୍ତି ହେବନି । ଏବେ ଦୀର୍ଘ ୧୪ ବର୍ଷର ବ୍ୟବଧାନ ପରେ ମୁଁ ରାଜନୀତିକୁ ଫେରିଛି'।

ଗୋବିନ୍ଦା ପୂର୍ବରୁ ୨୦୦୪ ରେ କଂଗ୍ରେସ ଟିକେଟରେ ମୁମ୍ବାଇ ଉତ୍ତର ଲୋକସଭା ଆସନରୁ ନିର୍ବାଚନରେ ଜିତିଥିଲେ । ସେହି ନିର୍ବଚନରେ ବିଜେପି ପ୍ରାର୍ଥୀ ରାମ ନାୟକଙ୍କୁ ୪୮,୨୭୧ ଭୋଟରେ ପରାସ୍ତ କରିଥିଲେ । ତେବେ ଦେଖିବାର କଥା ଏଥର ଦଳ ତାଙ୍କୁ କେଉଁ ଆସନରୁ ପ୍ରତିଦ୍ୱନ୍ଦିତା କରିବା ଲାଗି ମଇଦାକୁ ଓହ୍ଲାଉଛି ।