ରାଜ୍ୟସଭାରେ ୯୦ରୁ ତଳକୁ ଖସିଲା ବିଜେପି

ନୂଆଦିଲ୍ଲୀ : ୨୦୨୪ ଲୋକସଭା ନିର୍ବାଚନ ପରଠାରୁ ଭାରତୀୟ ଜନତା ପାର୍ଟିକୁ ଝଟକା ପରେ ଝଟକା ଲାଗିବାରେ ଲାଗିଛି । ଗତ କିଛି ବର୍ଷ ମଧ୍ୟରେ ପ୍ରଥମ ଥର ପାଇଁ ରାଜ୍ୟ ସଭାରେ ଭାରତୀୟ ଜନତା ପାର୍ଟିର ସଦସ୍ୟଙ୍କ ସଂଖ୍ୟା ୯୦ ତଳକୁ ଖସି ଆସିଛି । ତେବେ ଖାଲିଥିବା ପଦବୀ ପୂରଣ ପାଇଁ ଉପ-ନିର୍ବାଚନ ପରେ ଭାରତୀୟ ଜନତା ପାର୍ଟି ଏବଂ ଏହାର ସହଯୋଗୀମାନେ କେବଳ ସାମ୍ପ୍ରତିକ କ୍ଷତିର କ୍ଷତିପୂରଣ ଦେଇ ପାରିବେ ନାହିଁ ବରଂ ସେମାନଙ୍କ ସ୍ଥିତିକୁ ମଧ୍ୟ ଦୃଢ କରିବେ ।

ରାଜ୍ୟସଭାରେ ବିଜେପିର ସଭ୍ୟସଂଖ୍ୟା ୯୦ ତଳକୁ ଖସି ଆସିଛି । ଚାରି ଜଣ ମନୋନୀତ ସଭ୍ୟଙ୍କ କାର୍ଯ୍ୟକାଳ ଶେଷ ହେବାପରେ ବିଜେପିର ସଭ୍ୟସଂଖ୍ୟା ୮୬ ରହିଛି । କିନ୍ତୁ ଆଉ କିଛି ସପ୍ତାହ ମଧ୍ୟରେ ଖାଲି ପଡ଼ିଥିବା ଆସନରେ ନିର୍ବାଚନ ହେଲେ ବିଜେପି ପୁଣି ଏହାର ପୂର୍ବ ସ୍ଥିତିକୁ ଫେରି ଆସିବ । ନିର୍ବାଚନରେ ବିଜେପି ଅତିକମ୍‌ରେ ୮ଟି ଆସନ ଜିତିବ ବୋଲି କୁହାଯାଉଛି ।

୨୪୫ ସଭ୍ୟ ବିଶିଷ୍ଟ ରାଜ୍ୟସଭାରେ ୧୯ଟି ଆସନ ଖାଲି ପଡ଼ିଥିବାରୁ ଏବେ ମୋଟ୍ ସଭ୍ୟସଂଖ୍ୟା ୨୨୬ ରହିଛି । ବିଲ୍ ଅନୁମୋଦନ ପାଇଁ ୧୧୪ ସଭ୍ୟଙ୍କ ସମର୍ଥନ ଆବଶ୍ୟକ ଥିବା ବେଳେ ବିଜେପି ନେତୃତ୍ୱାଧୀନ ଏନ୍‌ଡିଏର ୧୦୧ ଜଣ ସଭ୍ୟ ଅଛନ୍ତି । ଆବଶ୍ୟକ ଠାରୁ ୧୩ ଜଣ କମ୍ ସଭ୍ୟ ଥିଲେ ମଧ୍ୟ ମୋଦୀ ସରକାରଙ୍କୁ ବିଶେଷ ଅସୁବିଧା ହେବାର ନାହିଁ ।

କାରଣ ଆହୁରି ୭ ଜଣ ମନୋନୀତ ସଭ୍ୟ ଅଛନ୍ତି, ଯେଉଁମାନେ କି ସରକାରକୁ ସମର୍ଥନ ଦେବାର ଯଥେଷ୍ଟ ସମ୍ଭାବନା ରହିଛି । ରାଜ୍ୟସଭା ସାଂସଦ ରାକେଶ ସିହ୍ନା, ରାମ ଶକାଲ, ସୋନାଲ ମାନସିଂହ ଓ ମହେଶ ଜେଠମାଳିନୀଙ୍କ କାର୍ଯ୍ୟକାଳ ଶେଷ ହୋଇଛି । ଏହି ୪ ସଦସ୍ୟ ସରକାରୀ ଦଳର ସୁପାରିଶକ୍ରମେ ରାଷ୍ଟ୍ରପତିଙ୍କ ଦ୍ୱାରା ଗୃହକୁ ମନୋନୀତ ହୋଇଥିଲେ । ସେମାନେ ବିଜେପି ସରକାରରେ ସମସ୍ତ ଆବଶ୍ୟକତାରେ ସହଯୋଗ ମଧ୍ୟ କରିଥିଲେ ।

ତେବେ ଏହି ଅବସର ପରେ ବିଜେପିର ସଂଖ୍ୟା ୮୬କୁ ହ୍ରାସ ପାଇଥିବା ବେଳେ 'ଏନଡିଏ' ମେଣ୍ଟର ସଦସ୍ୟ ସଂଖ୍ୟା ୧୦୧କୁ ଖସିଛି । ୨୪୫ ଆସନ ବିଶିଷ୍ଟ ରାଜ୍ୟସଭାରେ ସଂଖ୍ୟା ଗରିଷ୍ଠତା ପାଇଁ ୧୧୩ ଆସନ ଆବଶ୍ୟକ । ତେଣୁ ଶାସକ ମେଣ୍ଟ ୧୨ ଆସନ ପଛରେ ରହିଛି । ତେଣୁ ଅଷ୍ଟାଦଶ ଲୋକସଭାରେ ମୋଦି ନେତୃତ୍ୱାଧୀନ ଭାରତୀୟ ଜନତା ପାର୍ଟି କୌଣସି ଜଟିଳ କିମ୍ବା ବିବାଦୀୟ ବିଲ ପାସ କରିବା ପାଇଁ ମେଣ୍ଟ ସଦସ୍ୟ ନଥିବା କିଛି ଆଞ୍ଚଳିକ ଦଳଙ୍କ ସହଯୋଗ ଲୋଡିବାକୁ ବାଧ୍ୟ ହେବ ।