ବିଜେପି ଛାଡି ବିଜେଡିରେ ଯୋଗଦେଲେ ଇରାନୀ ରାୟ
ଭୁବନେଶ୍ୱର: ନିର୍ବାଚନ ପୂର୍ବରୁ ନୟାଗଡ ବିଜେପିକୁ ଲାଗିଲା ବଡ଼ ଝଟକା । ବିଜେଡିରେ ଯୋଗଦେଲେ ଇରାନୀ ରାୟ । ଶଙ୍ଖ ଭବନରେ ମିଶ୍ରଣ ପର୍ବରେ ବିଧିବଦ୍ଧ ଭାବେ ଯୋଗଦେଲେ ଇରାନୀ । ଗତ କିଛି ଦିନ ତଳେ ବିଜେପି ଛାଡିଥିଲେ ଇରାନୀ । ୨୦୧୯ରେ ବିଜେପିର ବିଧାୟକ ପ୍ରାର୍ଥୀ ଭାବେ ନିର୍ବାଚନ ଲଢିଥିଲେ ଇରାନୀ ।
ସାଂସଦ ମାନସ ମଙ୍ଗରାଜ, ନୟାଗଡ ବିଧାୟକ ତଥା ବରିଷ୍ଠ ବିଜେଡି ନେତା ଅରୁଣ ସାହୁ ଓ ସାଂସଦ ସସ୍ମିତ ପାତ୍ର ମୁଖ୍ୟମନ୍ତ୍ରୀ ତଥା ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କ ପକ୍ଷରୁ ଇରାନୀ ଓ ତାଙ୍କ ଶତାଧିକ ସମର୍ଥକଙ୍କୁ ଦଳକୁ ସ୍ୱାଗତ କରିଛନ୍ତି । ପ୍ରଥମେ, ଭାଜପା ଟିକେଟ୍ ରେ ପ୍ରତିଦ୍ୱନ୍ଦ୍ୱିତା କରିଥିବା ଇରାନୀ ୨୦୧୯ ରେ ନୟାଗଡ଼ ବିଧାନସଭା ଆସନରୁ ୬୬,୭୩୭ ଭୋଟ୍ (୪୩% ଭୋଟ୍) ପାଇଥିଲେ । ଇରାନୀ ଏବେ ବିଜେଡିରେ ମିଶିବା ପରେ ନୟାଗଡ଼ ବିଧାନସଭା ଆସନରୁ ଜିତିବା ଅରୁଣଙ୍କ ପାଇଁ ସହଜ ହେବ ।
ଦ୍ୱିତୀୟରେ, ଇରାନୀ ବିଜେଡ଼ିକୁ ଆସିବା ପୁରୀ ଲୋକସଭା ଆସନକୁ ମଧ୍ୟ ପ୍ରଭାବିତ କରିବ କାରଣ ନୟାଗଡ଼ ପୁରୀ ପୁରୀର ୭ ବିଧାନସଭା ନିର୍ବାଚନ ମଣ୍ଡଳୀ ମଧ୍ୟରୁ ଗୋଟିଏ । ଇରାନୀଙ୍କ ସମର୍ଥନକୁ ଆଧାର କରି ପୁରୀ ଲୋକସଭାରେ ଭୋଟ୍ ଅଂଶ ବୃଦ୍ଧି ପାଇବ ବୋଲି ବିଜେଡି ଆଶା କରୁଛି । ବିଜେଡିରେ ଯୋଗ ଦେଇ ଇରାନୀ କହିଛନ୍ତି , ସେ ମୁଖ୍ୟମନ୍ତ୍ରୀଙ୍କ ଆଦର୍ଶ ଦ୍ୱାରା ଅନୁପ୍ରେରିତ ହୋଇ ଦଳରେ ଯୋଗ ଦେଇଛନ୍ତି ।
ବିଜେପିରେ ତାଙ୍କୁ ଅଣଦେଖା କରାଯାଉଥିଲା ଓ କୌଣସି ମିଟିଂକୁ ତାଙ୍କୁ ଡକା ଯାଉନଥିଲା । ବିଜେପି ପାଇଁ ୧୦୦ ପ୍ରତିଶତ କାମ କରୁଥିଲି, ପରିଶ୍ରମ, ତ୍ୟାଗ ଯାହା କର୍ମଭୁମିରେ ଦେଇଥିଲି, ତାହାର ଫଳ ନ ଦେଇ ବିଜେପି ତାଙ୍କ ସହ ଅନ୍ୟାୟ କରିଛି । ଯେଉଁଠି ସମ୍ମାନ ନାହିଁ, ସେଠି କାହିଁକି ରହିବି ବୋଲି କହିଛନ୍ତି ଇରାନୀ ରାୟ ।
Click it and Unblock the Notifications
Sign in with Google