ବିରୋଧୀ ଦଳ ନେତା ପଦ ହରାଇପାରନ୍ତି ରାହୁଲ, ବିଜେପି ସାଂସଦଙ୍କ ବଡ ଦାବି

ନୂଆଦିଲ୍ଲୀ: ରାହୁଲ ଗାନ୍ଧୀଙ୍କୁ ବିରୋଧୀ ଦଳ ନେତା ପଦରୁ ହଟାଇ ଅନ୍ୟ କାହାକୁ ବିରୋଧୀ ଦଳ ନେତା କରିବା ପାଇଁ ଇଣ୍ଡି ମେଣ୍ଟରେ ମନ୍ଥନ ଚାଲିଛି ବୋଲି ବିଜେପି ଦାବି କରିଛି। ବିଜେପି କହିଛି ଯେ ରାହୁଲ ଗାନ୍ଧୀ ଭଲ ପ୍ରଦର୍ଶନ କରୁନଥିବାରୁ ଏଭଳି ମନ୍ଥନ ଆରମ୍ଭ ହୋଇଯାଇଛି । ଦିଲ୍ଲୀ ଲୋକ ସଭା ନିର୍ବାଚନମଣ୍ଡଳୀରୁ ଭାଜପା ଏମ୍‌ପି ବାଂଶୁରୀ ସ୍ବରାଜ କହିଛନ୍ତି ଯେ ବିରୋଧୀ ଦଳ ମଧ୍ୟରେ ଅନେକ ଦକ୍ଷ ନେତା ଅଛନ୍ତି ଯେଉଁମାନେ ବିରୋଧୀ ଦଳର ନେତା ଦାୟିତ୍ୱ ନେଇପାରିବେ। ଏଥିସହ ସେ ଏହା ମଧ୍ୟ ସ୍ପଷ୍ଟ କରିଛନ୍ତି ଯେ ଇଣ୍ଡିଆ ଗଠବନ୍ଧନର ଆଭ୍ୟନ୍ତରୀଣ ପ୍ରସଙ୍ଗ ହୋଇଥିବାରୁ ଏହି ନିଷ୍ପତ୍ତି ତାଙ୍କୁ ଗ୍ରହଣ କରିବାକୁ ପଡିବ।

ତେବେ ବିଜେପିର ଏହି ଦାବିକୁ ନେଇ ବିରୋଧୀ ଦଳ ପକ୍ଷରୁ କୌଣସି ପ୍ରତିକ୍ରିୟା ପ୍ରକାଶ କରାଯାଇ ନାହିଁ, କିନ୍ତୁ ବିଶେଷଜ୍ଞ ମାନେ କହିଛନ୍ତି ଯେ, ଅତି କମରେ ୧୦ ପ୍ରତିଶତ ସିଟ୍ ବିଶିଷ୍ଟ ସର୍ବ ବୃହତ ବିରୋଧୀ ଦଳର ସାଂସଦଙ୍କୁ LOP ନିଯୁକ୍ତ କରାଯାଇପାରିବ ଏବଂ ରାହୁଲ ଗାନ୍ଧୀଙ୍କୁ LOP ଭାବରେ ନିଯୁକ୍ତ କରାଯାଇ ପାରିବ, କାରଣ କଂଗ୍ରେସ ହେଉଛି ଗୃହର ସବୁଠାରୁ ବଡ ବିରୋଧୀ ଦଳ।