ବିହାର ପାଇଁ ଶାହାଙ୍କ ରଣନୀତୀ! ଆରଜେଡି ଉପରେ ଏଭଳି ମନ୍ତବ୍ୟ ଦେଲେ....

କେନ୍ଦ୍ର ଗୃହ ମନ୍ତ୍ରୀ ଅମିତ ଶାହ ରବିବାର (ମାର୍ଚ୍ଚ ୩୦) ରାଷ୍ଟ୍ରୀୟ ଜନତା ଦଳ (RJD) ଉପରେ ବର୍ଷିଛନ୍ତି । ଲାଲୁ-ରାବଡ଼ିଙ୍କ ଶାସନ ସମୟରେ ବିହାର ଜଙ୍ଗଲ ରାଜରେ ପରିଣତ ହୋଇଥିଲା ବୋଲି କହିଛନ୍ତି ଶାହ । ଅମିତ ଶାହ ପାଟନାରେ ପ୍ରାୟ ୨୦ ମିନିଟ୍ ପାଇଁ ଭାଷଣ ଦେଇଛନ୍ତି ଏବଂ ୧୫ ଥର ଲାଲୁ ଯାଦବଙ୍କ ନାଁ ନେଇଛନ୍ତି। ସେ ସ୍ପଷ୍ଟ ଭାବରେ କହିଛନ୍ତି ଯେ, ଲାଲୁ ଯାଦବ ଚାରା ଦୁର୍ନୀତି କରି ବିହାରକୁ ବଦନାମ କରିବା ପାଇଁ କାମ କରିଛନ୍ତି ।

ଆରଜେଡିର ଶାସନକୁ ଜଙ୍ଗଲ ରାଜ ଭାବରେ ବର୍ଣ୍ଣନା କରି ସେ କହିଛନ୍ତି, ସେମାନଙ୍କ ଶାସନକୁ ଜଙ୍ଗଲ ରାଜ ଭାବରେ ମନେ ରଖାଯିବ। ପୂର୍ବରୁ, ପାଟନାର ବାପୁ ଅଡିଟୋରିୟମରେ ସମବାୟ ବିଭାଗ ଦ୍ୱାରା ଏକ କାର୍ଯ୍ୟକ୍ରମ ଆୟୋଜନ କରାଯାଇଥିଲା । ଏହାକୁ କେନ୍ଦ୍ରମନ୍ତ୍ରୀ ଅମିତ ଶାହ ଏବଂ ବିହାର ମୁଖ୍ୟମନ୍ତ୍ରୀ ନୀତୀଶ କୁମାର ମିଳିତ ଭାବରେ ଉଦଘାଟନ କରିଥିଲେ।

ଅମିତ ଶାହ ଲାଲୁ ଯାଦବଙ୍କୁ ଟାର୍ଗେଟ କରି କହିଛନ୍ତି ଯେ, ଏହି ଲୋକମାନେ ଗରିବଙ୍କ ପାଇଁ କୌଣସି କାମ କରିନାହାଁନ୍ତି । ଏନଡିଏ ସରକାର ରାସନ, ଘର, ବିଦ୍ୟୁତ, ରୋଷେଇ ଗ୍ୟାସ, ଔଷଧ ଏବଂ ମାଗଣା ରାସନ ଯୋଗାଇବା ପାଇଁ କାମ କରିଛି । ଯଦି କେହି ଗରିବଙ୍କ ପାଇଁ କିଛି କରିଛନ୍ତି, ତେବେ ସେ ହେଉଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ସେ କହିଛନ୍ତି ଯେ, ଚାରି କୋଟି ଲୋକଙ୍କୁ ବାସଗୃହ ଦିଆଯାଇଛି, ୧୧ କୋଟିରୁ ଅଧିକ ଲୋକଙ୍କୁ ଗ୍ୟାସ ସିଲିଣ୍ଡର ଦିଆଯାଇଛି, ୧୨ କୋଟି ଶୌଚାଳୟ ନିର୍ମାଣ କରାଯାଇଛି।

୮୧ କୋଟି ଲୋକଙ୍କୁ ପ୍ରତି ମାସରେ ପାଞ୍ଚ କିଲୋଗ୍ରାମ ମାଗଣା ଖାଦ୍ୟଶସ୍ୟ ସହିତ ୫ ଲକ୍ଷ ଟଙ୍କା ପର୍ଯ୍ୟନ୍ତ ମାଗଣା ଚିକିତ୍ସା ଦିଆଯାଇଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଗ୍ରାମୀଣ ଅର୍ଥନୀତି, କୃଷକ, ମହିଳା ଏବଂ ମତ୍ସ୍ୟଚାଷର କାର୍ଯ୍ୟକୁ ତ୍ୱରାନ୍ୱିତ କରିବା ପାଇଁ ଏକ ପୃଥକ ସମବାୟ ମନ୍ତ୍ରଣାଳୟ ସୃଷ୍ଟି କରିବାକୁ କାର୍ଯ୍ୟ କରିଥିଲେ। ୭୫ ବର୍ଷ ଧରି କୌଣସି ସରକାର ସମବାୟକୁ ସୁଦୃଢ଼ କରିବା ପାଇଁ କାମ କରିନଥିଲେ। କିନ୍ତୁ, ନରେନ୍ଦ୍ର ମୋଦୀ ଏହି ବିଭାଗକୁ ଗତି ଦେଇଥିଲେ।

ସେ ଦାବି କରିଛନ୍ତି ଯେ, ବିହାର ଏପରି ଏକ ରାଜ୍ୟ ଯେଉଁଠାରେ ଜମି ଉର୍ବର ଏବଂ ଏଠାରେ ପ୍ରଚୁର ଜଳସମ୍ପଦ ମଧ୍ୟ ଅଛି। ସମବାୟ କ୍ଷେତ୍ରରୁ ବିହାରକୁ ସବୁଠାରୁ ଅଧିକ ଲାଭ ମିଳିବ। ଏହି ଅବସରରେ ସେ କହିଛନ୍ତି, ଗୋଟିଏ ସମୟ ଥିଲା ଯେତେବେଳେ ଦେଶର ୩୦ ପ୍ରତିଶତ ଚିନି ଉତ୍ପାଦନ ବିହାରରେ ହେଉଥିଲା । କିନ୍ତୁ ଲାଲୁ ଯାଦବଙ୍କ ଶାସନ କାଳରେ ସମସ୍ତ ଚିନି କଳ ବନ୍ଦ ହୋଇଯାଇଥିଲା ଏବଂ ଉତ୍ପାଦନ ୬ ପ୍ରତିଶତରେ ପହଞ୍ଚିଥିଲା। ଯଦି ପୁଣି ଥରେ ଏନଡିଏ ସରକାର ଗଠନ ହୁଏ, ତେବେ ସମସ୍ତ ବନ୍ଦ ଚିନି କଳ ପୁନର୍ଜୀବିତ ହେବ ବୋଲି କହିଛନ୍ତି ଅମିତ ଶାହ ।

କେନ୍ଦ୍ରମନ୍ତ୍ରୀ ଏହା ମଧ୍ୟ କହିଛନ୍ତି ଯେ, ଯେତେବେଳେ ବି ଲାଲୁ ଯାଦବଙ୍କ ସରକାର ଆସିଛି, ବିହାର ତଳକୁ ଖସିଯାଇଛି ଏବଂ ଯେତେବେଳେ ବି ଏନଡିଏ ସରକାର ଗଠନ ହୋଇଛି, ବିହାର ପ୍ରଗତି କରିଛି। ତେଣୁ, ମୁଁ ୨୦୨୫ ରେ ପୁଣି ଥରେ ବିହାରରେ NDA ସରକାର ଗଠନ କରିବାକୁ ଏବଂ ଭାରତ ସରକାରଙ୍କୁ ବିହାରରେ କାମ କରିବାର ସୁଯୋଗ ଦେବାକୁ ଅପିଲ୍ କରୁଛି। ନୀତୀଶ କୁମାରଙ୍କ ଶାସନ କାଳରେ, ବିହାର ବିକାଶ ପଥରେ ଆଗକୁ ବଢ଼ୁଛି ବୋଲି ଶାହ କହିଛନ୍ତି ।