ମମତାଙ୍କୁ ବଡ଼ ଝଟ୍କା: ଇସ୍ତଫା ଦେଲେ ଟିଏମସିର ରାଜ୍ୟ ସଭାପତି
ପଶ୍ଚିମବଙ୍ଗ ରାଜନୀତିରେ ହଟଚମଟ ଜାରି ରହିଛି । ପୂର୍ବ ଶାସକ ଦଳ ଟିଏମସିରେ ଘଡ଼ିକେ ଘୋଡ଼ା ଛୁଟୁଛି । କିଏ କେତେବେଳେ ଦଳ ଛାଡ଼ୁଛନ୍ତି ଏବଂ ବିଦ୍ରୋହୀ ଗୋଷ୍ଠୀରେ ସାମିଲ ହେଉଛନ୍ତି, ତାର ହିସବା ପାଇବା ମୁସକିଲ ହୋଇପଡ଼ିଛି । ମାସେ ତଳେ ପଶ୍ଚିମବଙ୍ଗରେ ଟିଏମସି ସଭାପତି ଭାବରେ ଚନ୍ଦ୍ରିମା ଭଟ୍ଟାଚାର୍ଯ୍ୟଙ୍କୁ ନିଯୁକ୍ତ କରିଥିଲେ ଟଏମସି ସୁପ୍ରିମୋ ମମତା ବାନାର୍ଜୀ । ଆଉ ଆଜି (ଜୁଲାଇ ୪)ରେ ସେ ପଦରୁ ଇସ୍ତଫା ଦେଇ ବିଦ୍ରୋହୀ ଶିବିରରେ ହସଖୁସିରେ ମସଗୁଲ ।
ବିଧାନସଭା ନିର୍ବାଚନରେ ବିଜେପି (BJP) ପାଖରୁ ଶୋଚନୀୟ ପରାଜୟ ପରେ, ଦଳକୁ ସଂଗଠିତ କରିବା ପାଇଁ ମମତା ବାନାର୍ଜୀ ଗତ ଜୁନ୍ ୩ ତାରିଖରେ ଟିଏମସିର ସମସ୍ତ କମିଟିକୁ ଭଙ୍ଗ କରିଦେଇଥିଲେ। ସେ ସୁବ୍ରତ ବକ୍ସିଙ୍କ ସ୍ଥାନରେ ଚନ୍ଦ୍ରିମା ଭଟ୍ଟାଚାର୍ଯ୍ୟଙ୍କୁ ପଶ୍ଚିମବଙ୍ଗର ନୂଆ ପ୍ରଦେଶ ସଭାପତି ଭାବରେ ନିଯୁକ୍ତ କରି ଏକ ବଡ଼ ଦାୟିତ୍ୱ ଦେଇଥିଲେ। କିନ୍ତୁ ଏହି ନିଯୁକ୍ତିର ମାତ୍ର ଏକ ମାସ ପରେ ରାଜନୈତିକ ଚିତ୍ର ସମ୍ପୂର୍ଣ୍ଣ ବଦଳି ଯାଇଛି। ଶନିବାର ଦିନ ଚନ୍ଦ୍ରିମା ଭଟ୍ଟାଚାର୍ଯ୍ୟ ଦଳର ସମସ୍ତ ପଦବୀରୁ ଇସ୍ତଫା ଦେଇଛନ୍ତି। ଇସ୍ତଫା ଦେବାର କିଛି ସମୟ ପରେ ସେ ପଶ୍ଚିମବଙ୍ଗ ବିଧାନସଭାରେ ବିରୋଧୀ ଦଳ ନେତାଙ୍କ ପ୍ରକୋଷ୍ଠରେ ବିଦ୍ରୋହୀ ଶିବିରର ନେତାମାନଙ୍କ ସହ ବସିଥିବାର ଦେଖିବାକୁ ମିଳିଛି।
ଚନ୍ଦ୍ରିମା କହିଛନ୍ତି, 'ଯେଉଁଠାରେ କୌଣସି ବିଶ୍ୱାସ କିମ୍ବା ଆସ୍ଥା ନଥାଏ, ସେଠାରେ କାମ କରିବା ସମ୍ଭବ ନୁହେଁ। ସେଥିପାଇଁ ଆମେ ନିଜ ନିଜ ପଦବୀରୁ ଇସ୍ତଫା ଦେଇଛୁ।' ଦଳୀୟ ପଦବୀରୁ ଇସ୍ତଫା ପତ୍ର ପଠାଇବା ପରେ ଚନ୍ଦ୍ରିମା ସିଧାସଳଖ ବିଦ୍ରୋହୀ ନେତା ଋତବ୍ରତ ବାନାର୍ଜୀଙ୍କ ଘରକୁ ଯାଇଥିଲେ। ଋତବ୍ରତ ବାନାର୍ଜୀ ହିଁ ପ୍ରଥମେ ମମତା ବାନାର୍ଜୀଙ୍କ ବିରୋଧରେ ବିଦ୍ରୋହ ଆରମ୍ଭ କରିଥିଲେ ଏବଂ ବର୍ତ୍ତମାନ ସେ ବିଧାନସଭାରେ ବିରୋଧୀ ଦଳ ନେତା ଅଛନ୍ତି।
ଚନ୍ଦ୍ରିମା ଭଟ୍ଟାଚାର୍ଯ୍ୟ କେବଳ ଦଳୀୟ ପଦ ଛାଡ଼ିନାହାନ୍ତି, ବରଂ ଭାରତୀୟ ନିର୍ବାଚନ କମିଶନଙ୍କ ନିକଟରେ ତୃଣମୂଳ କଂଗ୍ରେସର 'ଅଧିକୃତ ବ୍ୟକ୍ତି' ପଦରୁ ମଧ୍ୟ ଓହରି ଯାଇଛନ୍ତି। ବର୍ତ୍ତମାନ ମମତା ବାନାର୍ଜୀ ନିଜ ଦଳର ନାମ ଏବଂ ସଙ୍କେତ ବଞ୍ଚାଇବା ପାଇଁ ସଂଘର୍ଷ କରୁଛନ୍ତି, କାରଣ ବିଦ୍ରୋହୀ ଗୋଷ୍ଠୀ ନିଜକୁ 'ପ୍ରକୃତ ତୃଣମୂଳ କଂଗ୍ରେସ' ବୋଲି ଦାବି କରି ନିର୍ବାଚନ କମିଶନଙ୍କ ଦ୍ୱାରସ୍ଥ ହୋଇଛନ୍ତି।
ଉଲ୍ଲେଖଯୋଗ୍ୟ ଯେ, ଚନ୍ଦ୍ରିମା ଭଟ୍ଟାଚାର୍ଯ୍ୟ ଦୀର୍ଘ ଦିନ ଧରି ମମତା ବାନାର୍ଜୀଙ୍କ ଅତ୍ୟନ୍ତ ବିଶ୍ୱସ୍ତ ସହଯୋଗୀ ଥିଲେ। ସେ ମମତାଙ୍କ ସରକାରରେ ଅର୍ଥ, ସ୍ୱାସ୍ଥ୍ୟ, ଏବଂ ପଞ୍ଚାୟତ ଓ ଗ୍ରାମ୍ୟ ଉନ୍ନୟନ ଭଳି ଅନେକ ଗୁରୁତ୍ୱପୂର୍ଣ୍ଣ ବିଭାଗର ମନ୍ତ୍ରୀ ଭାବରେ ଦାୟିତ୍ୱ ତୁଲାଇ ସାରିଛନ୍ତି। ତାଙ୍କର ଏହି ନିଷ୍ପତ୍ତି ଟିଏମସି ପାଇଁ ଶକ୍ତ ଧକ୍କା ବୋଲି କୁହାଯାଉଛି।
Click it and Unblock the Notifications
Sign in with Google