ଆଜି ଜାମ୍ମୁ କାଶ୍ମୀରର କାଠୁଆରେ 'ଭାରତ ଯୋଡୋ' ଯାତ୍ରା ଆରମ୍ଭ, ପ୍ରଥମ ଥର ଜ୍ୟାକେଟ୍ ପିନ୍ଧିଥିବାର ନଜର ଆସିଲେ ରାହୁଲ ଗାନ୍ଧୀ

ଜାମ୍ମୁ କାଶ୍ମୀର: ଆଜି ଜାମ୍ମୁ କାଶ୍ମୀରର କାଠୁଆରେ ରାହୁଲ ଗାନ୍ଧୀଙ୍କ 'ଭାରତ ଯୋଡୋ' ଯାତ୍ରା ଆନୁଷ୍ଠାନିକ ଭାବେ ଆରମ୍ଭ ହୋଇଛି । କାଠୁଆରେ ହାଲୁକା ବର୍ଷା ମଧ୍ୟରେ ରାହୁଲ ଗାନ୍ଧୀ ଯାତ୍ରା ଆରମ୍ଭ କରିଛନ୍ତି । ଏହି ସମୟରେ ପ୍ରଥମ ଥର ରାହୁଲ ଗାନ୍ଧୀ ଜ୍ୟାକେଟ୍ ପିନ୍ଧିଥିବାର ନଜର ଆସିଲେ । ପୂର୍ବରୁ ହାଡଭଙ୍ଗା ଶୀତରେ ମଧ୍ୟ ରାହୁଲ ଗାନ୍ଧୀ କେବଳ ଖଣ୍ତିଏ ଟି-ସାର୍ଟ ପିନ୍ଧି ଯାତ୍ରାରେ ଚାଲୁଥିବାର ନଜର ଆସିଥିଲେ । କନ୍ୟାକୁମାରୀରୁ ଯାତ୍ରା ଆରମ୍ଭ କରିବା ପରେ ଦିଲ୍ଲୀ-ପଞ୍ଜାବ ଶୀତରେ ମଧ୍ୟ ରାହୁଲ ଟି-ସାର୍ଟରେ ହିଁ ନଜର ଆସିଥିଲେ । ଯାହାକୁ ନେଇ ଚର୍ଚ୍ଚା ଜୋର ଧରିଥିଲା ଏବଂ ଅନେକ ବିଜେପି ନେତା ଏହାକୁ ନେଇ ପ୍ରଶ୍ନ ମଧ୍ୟ ଉଠାଇଥିଲେ ।

ଗୁରୁବାର ଦିନ ଜାମ୍ମୁର କାଠୁଆରେ ପ୍ରବେଶ କରିଥିଲା ରାହୁଲଙ୍କ 'ଭାରତ ଯୋଡୋ' ଯାତ୍ରା । ଏହି ଯାତ୍ରା ପଞ୍ଜାବ ଦେଇ ଜାମ୍ମୁ କାଶ୍ମୀରରେ ପ୍ରବେଶ କରିଛି । କଂଗ୍ରେସର ଭାରତ ଯୋଡୋ ଯାତ୍ରା ବର୍ତ୍ତମାନ ଜାମ୍ମୁର ବିଭିନ୍ନ ଜିଲ୍ଲାରେ ଜାନୁଆରୀ ୨୬ ପର୍ଯ୍ୟନ୍ତ ଚାଲିବ । କଡ଼ା ସୁରକ୍ଷା ମଧ୍ୟରେ ଜାମ୍ମୁ କାଶ୍ମୀରେ 'ଭାରତ ଯୋଡୋ' ଆରମ୍ଭ ହୋଇଛି । ଆତଙ୍କବାଦୀଙ୍କ ଧମକକୁ ନଜରରେ ରଖି ରାହୁଲଙ୍କ ଏହି ଗସ୍ତ ପାଇଁ ସୁରକ୍ଷା ବ୍ୟବସ୍ଥା ଅନେକ ପର୍ଯ୍ୟାୟରେ କରାଯାଇଛି । ତେବେ ଜାମ୍ମୁ କାଶ୍ମୀର ହେଉଛି 'ଭାରତ ଯୋଡୋ' ଯାତ୍ରାର ଶେଷ ଗନ୍ତବ୍ୟ ସ୍ଥଳ । ଏଠାରେ ହିଁ ଶେଷ ହେବ କଂଗ୍ରେସର 'ଭାରତ ଯୋଡୋ' ଯାତ୍ରା ।

ସୂଚନାଥାଉ ଯେ, କଂଗ୍ରେସର 'ଭାରତ ଯୋଡୋ' ଯାତ୍ରା କନ୍ୟାକୁମାରୀରୁ ୭ ସେପ୍ଟେମ୍ବରରୁ ଆରମ୍ଭ ହୋଇଥିଲା । ଯାହା ଚଳିତ ମାସ ୩୦ରେ ଶ୍ରୀନଗରରେ ଶେଷ ହେବ । ଗତ ୧୨୫ ଦିନରୁ ଅଧିକ ସମୟ ମଧ୍ୟରେ ଏହି ଯାତ୍ରା ଦେଶର ୧୦ ଟି ରାଜ୍ୟର ୫୨ ରୁ ଅଧିକ ଜିଲ୍ଲା ଦେଇ ଜାମ୍ମୁ କାଶ୍ମୀରରେ ପହଞ୍ଚିଛି ।

English summary

Bharat jodo yatra: Rahul Gandhi spotted wearing a jacket for the first time.