ସାଧାରଣତନ୍ତ୍ର ଦିବସରେ ଲଞ୍ଚ୍ ହେବ ଦେଶର ପ୍ରଥମ କୋଭିଡ୍ ନାଜାଲ୍ ଟିକା

ଜାନୁଆରୀ ୨୬ ତାରିଖରେ ଭାରତରେ ଲଞ୍ଚ୍ ହେବା ପାଇଁ ଯାଉଛି ଭାରତ ବାୟୋଟେକ୍ ଦ୍ୱାରା ପ୍ରସ୍ତୁତ ଦେଶର ପ୍ରଥମ କୋଭିଡ୍ ନାଜାଲ ଟିକା INCOVACC । ଏନେଇ କମ୍ପାନୀ ଚେୟାରମ୍ୟାନ୍ କ୍ରିଷ୍ଣା ଇଲ୍ଲା ସୂଚନା ଦେଇଛନ୍ତି ।

Updated: Sunday, January 22, 2023, 14:23 [IST]

ନୂଆଦିଲ୍ଲୀ: କରୋନା ବିରୋଧରେ ଲଢେଇ ବର୍ତ୍ତମାନ ଜାରି ରହିଛି ଏବଂ ଏହାକୁ ହରାଇବାର ସବୁଠାରୁ ବଡ଼ ଅସ୍ତ୍ର ହେଉଛି ଟିକା । ଫାର୍ମା କମ୍ପାନୀଗୁଡିକ କ୍ରମାଗତ ଭାବରେ ପରୀକ୍ଷଣ ଜାରି ରଖିଛନ୍ତି । ଖୁବ ଶୀଘ୍ର ଅର୍ଥାତ୍ ଚଳିତ ମାସ ଜାନୁଆରୀ ୨୬ ତାରିଖରେ ଭାରତରେ ଲଞ୍ଚ୍ ହେବା ପାଇଁ ଯାଉଛି ଭାରତ ବାୟୋଟେକ୍ ଦ୍ୱାରା ପ୍ରସ୍ତୁତ ଦେଶର ପ୍ରଥମ କୋଭିଡ୍ ନାଜାଲ ଟିକା INCOVACC । ଏହି ଟିକାକୁ ନାକରେ ପକାଇ ପାରିବେ । ଏନେଇ କମ୍ପାନୀ ଚେୟାରମ୍ୟାନ୍ କ୍ରିଷ୍ଣା ଇଲ୍ଲା ସୂଚନା ଦେଇଛନ୍ତି ।

ଭୋପାଳର ଇଣ୍ତିଆନ ଇଣ୍ଟରନ୍ୟାଶନାଲ ସାଇନ୍ସ ଫେଷ୍ଟିଭାଲରେ ଯୋଗ ଦେଇ କ୍ରିଷ୍ଣା ଇଲ୍ଲା କହିଛନ୍ତି ଯେ, ଜାନୁଆରୀ ୨୬, ସାଧାରଣତନ୍ତ୍ର ଦିବସରେ ଆମର ନାଜାଲ ଟିକା INCOVACC ଆନୁଷ୍ଠାନିକ ଭାବେ ଆରମ୍ଭ ହେବ । ଏହା ସହିତ ସେ ଆହୁରି ମଧ୍ୟ କହିଛନ୍ତି ଯେ, ଦେଶରେ ପଶୁମାନଙ୍କ ମଧ୍ୟରେ ଲମ୍ପି ନାମକ ଏକ ଚର୍ମ ରୋଗ ପାଇଁ ଆସନ୍ତା ମାସ ସୁଦ୍ଧା ଏକ ସ୍ୱଦେଶୀ ଟିକା Lumpi-Pro Vacind ଲଞ୍ଚ୍ କରାଯିବ ।

କ୍ରିଷ୍ଣା ଇଲ୍ଲା ସୂଚନା ଦେଇ କହିଛନ୍ତି ଯେ ଆମର ନାଜାଲ୍ ଟିକା ବିଧିବଦ୍ଧ ଭାବେ ୨୬ ଜାନୁଆରୀ ଦିନ ଲଞ୍ଚ୍ କରାଯିବ ଏବଂ ଏହାକୁ ବେଶ୍ ସହଜରେ ଲୋକ ମାନେ ବ୍ୟବହାର କରିପାରିବେ । ଯେଉଁଥି ପାଇଁ ଅନୁମତି ମଧ୍ୟ ମିଳି ସାରିଛି ।