ରିଲାଏନ୍ସ କମ୍ୟୁନିକେସନ୍ସ ଓ ଅନିଲ ଅମ୍ବାନୀଙ୍କୁ ଠକ ଘୋଷଣା କଲା ବ୍ୟାଙ୍କ ଅଫ୍ ଇଣ୍ଡିଆ
ଷ୍ଟେଟ୍ ବ୍ୟାଙ୍କ ଅଫ୍ ଇଣ୍ଡିଆ ପରେ, ବ୍ୟାଙ୍କ ଅଫ୍ ଇଣ୍ଡିଆ ରିଲାଏନ୍ସ କମ୍ୟୁନିକେସନ୍ସର ଋଣ ଆକାଉଣ୍ଟ ଓ ଏହାର ପୂର୍ବତନ ନିର୍ଦ୍ଦେଶକ ଅନିଲ ଅମ୍ବାନୀଙ୍କୁ ଠକ ଘୋଷଣା କରିଛି। ବ୍ୟାଙ୍କ ଅଫ୍ ଇଣ୍ଡିଆ ୨୦୧୬ ଅଗଷ୍ଟରେ ରିଲାଏନ୍ସ କମ୍ୟୁନିକେସନ୍ସକୁ ୭୦୦ କୋଟି ଟଙ୍କା ଋଣ ପ୍ରଦାନ କରିଥିଲା। ଅକ୍ଟୋବର ୨୦୧୬ରେ ପ୍ରଦାନ କରାଯାଇଥିବା ମଞ୍ଜୁରୀ ରାଶିର ଅଧା ଏକ ସ୍ଥିର ଜମାରେ ବିନିଯୋଗ କରାଯାଇଥିଲା, ଯାହା ମଞ୍ଜୁରୀର ସର୍ତ୍ତାବଳୀ ଅନୁଯାୟୀ ନଥିଲା। ରିଲାଏନ୍ସ କମ୍ୟୁନିକେସନ୍ସର ସୂଚନା ଅନୁଯାୟୀ, କମ୍ପାନୀ ବ୍ୟାଙ୍କ ଅଫ୍ ଇଣ୍ଡିଆରୁ ଅଗଷ୍ଟ ୨୨ରେ ପାଇଥିବା ଏକ ପତ୍ର ଅନୁଯାୟୀ କମ୍ପାନୀର ଋଣ ଆକାଉଣ୍ଟ, ଅନିଲ ଧୀରାଜଲାଲ ଅମ୍ବାନୀ (କମ୍ପାନୀର ପ୍ରମୋଟର ଏବଂ ପୂର୍ବତନ ନିର୍ଦ୍ଦେଶକ) ଏବଂ ମଞ୍ଜରୀ ଅଶୋକ କାକର (କମ୍ପାନୀର ପୂର୍ବତନ ନିର୍ଦ୍ଦେଶକ)ଙ୍କୁ ଠକେଇ ଭାବରେ ବର୍ଗୀକୃତ କରିବା ବିଷୟ କୁହାଯାଇଛି।
ପୂର୍ବରୁ, ଭାରତୀୟ ଷ୍ଟେଟ ବ୍ୟାଙ୍କ ଚଳିତ ବର୍ଷ ଜୁନ୍ ମାସରେ ସମାନ କାର୍ଯ୍ୟ କରିଥିଲା। ଋଣ ସର୍ତ୍ତାବଳୀ ଉଲ୍ଲଂଘନ ଏବଂ ବ୍ୟାଙ୍କ ପାଣ୍ଠିର ଅପବ୍ୟବହାର ଅଭିଯୋଗରେ ଷ୍ଟେଟ ବ୍ୟାଙ୍କ ଏଭଳି ପଦକ୍ଷେପ ନେଇଥିଲା। ଷ୍ଟେଟ ବ୍ୟାଙ୍କର ଅଭିଯୋଗ ପରେ, କେନ୍ଦ୍ରୀୟ ତଦନ୍ତ ବ୍ୟୁରୋ ଗତ ଅଗଷ୍ଟ ୨୩ରେ ରିଲାଏନ୍ସ କମ୍ୟୁନିକେସନ୍ସ ଏବଂ ଅମ୍ବାନୀଙ୍କ ବାସଭବନ ସହିତ ଅନ୍ୟ କେତେକ ସ୍ଥାନରେ ଚଢଉ କରିଥିଲା।
ରିଲାଏନ୍ସ କମ୍ୟୁନିକେସନ୍ସ ଏବଂ ଏସିଆର ସବୁଠାରୁ ଧନୀ ବ୍ୟକ୍ତି ମୁକେଶ ଅମ୍ବାନୀଙ୍କ ସାନ ଭାଇ ଅମ୍ବାନୀଙ୍କ ଦ୍ୱାରା ହୋଇଥିବା କଥିତ ପାଣ୍ଠି ଅପବ୍ୟବହାର ଯୋଗୁଁ ଭାରତୀୟ ଷ୍ଟେଟ୍ ବ୍ୟାଙ୍କ ୨ ହଜାର ୯୨୯.୦୫ କୋଟିର କ୍ଷତି ଦାବି କରିବା ପରେ ସିବିଆଇ ଏକ ଅଭିଯୋଗ ପଞ୍ଜିକୃତ କରିଛି। ତେବେ ଅନିଲ ଅମ୍ବାନୀଙ୍କ ମୁଖପାତ୍ର ଏକ ବିବୃତ୍ତିରେ "ସମସ୍ତ ଅଭିଯୋଗକୁ ଦୃଢ଼ ଭାବରେ ଖଣ୍ଡନ କରିଛନ୍ତି। ସେ କହିଛନ୍ତି, ଷ୍ଟେଟ ବ୍ୟାଙ୍କ ଦ୍ୱାରା ଦାଖଲ କରାଯାଇଥିବା ଅଭିଯୋଗ ୧୦ବର୍ଷରୁ ଅଧିକ ପୁରୁଣା ମାମଲା ସହିତ ଜଡିତ। ସେ ସମୟରେ ଅମ୍ବାନୀ କମ୍ପାନୀର ଜଣେ ଅଣ-କାର୍ଯ୍ୟକାରୀ ନିର୍ଦ୍ଦେଶକ ଥିଲେ ଓ ଦୈନନ୍ଦିନ ପରିଚାଳନାରେ ତାଙ୍କର କୌଣସି ସମ୍ପୃକ୍ତି ନଥିଲା ।
ସୂଚନାଯୋଗ୍ୟ, ପୂର୍ବରୁ ପାଞ୍ଚ ଜଣ ଅଣ-କାର୍ଯ୍ୟକାରୀ ନିର୍ଦ୍ଦେଶକଙ୍କ ବିରୋଧରେ ଷ୍ଟେଟ ବ୍ୟାଙ୍କ ମାମଲା ପ୍ରତ୍ୟାହାର କରିସାରିଛି। ବ୍ୟାଙ୍କିଙ୍ଗ ଆଇନ ଅନୁଯାୟୀ, ଥରେ ଏକ ଆକାଉଣ୍ଟକୁ ଠକ ଘୋଷଣା କରାଯିବା ପରେ, ଏହାକୁ ଫୌଜଦାରୀ କାର୍ଯ୍ୟାନୁଷ୍ଠାନ ପାଇଁ ପ୍ରବର୍ତ୍ତନ ଏଜେନ୍ସିଗୁଡ଼ିକୁ ପଠାଯିବ ଏବଂ ଋଣଗ୍ରହୀତାକୁ ପାଞ୍ଚ ବର୍ଷ ପାଇଁ ବ୍ୟାଙ୍କ ଏବଂ ନିୟନ୍ତ୍ରିତ ସଂସ୍ଥାଗୁଡ଼ିକରୁ ନୂତନ ଆର୍ଥିକ ସହାୟତା ପାଇବାରୁ ବାରଣ କରାଯିବ।
Click it and Unblock the Notifications
Sign in with Google