ବାହୁଡ଼ାରେ ବିଭିନ୍ନ ସ୍ଥାନରୁ ଆସିଲା ଅଘଟଣର ଖବର: ରଥରେ ଲାଗିଲା କରେଣ୍ଟ୍, ଜଳିଗଲେ ୬ ଶ୍ରଦ୍ଧାଳୁ
Bahuda Yatra 2023: ବାହୁଡ଼ାରେ ବିଭିନ୍ନ ସ୍ଥାନରୁ ଆସିଲା ଅଘଟଣର ଖବର । ତ୍ରିପୁରାରେ ରଥରେ କରେଣ୍ଟ ଲାଗିବାରୁ ଜଳିଗଲେ ୬ ଶ୍ରଦ୍ଧାଳୁ । ତ୍ରିପୁରାର ଉନାକୋଟି ଜିଲ୍ଲାରେ ଘଟିଛି ଏପରି ଘଟଣା ।
ବିଦ୍ୟୁତ୍ ତାର ସଂସ୍ପର୍ଶରେ ଆସିବାରୁ ରଥରେ ନିଆଁ ଲାଗି ଯାଇଥିଲା। ଏହି ଦୁର୍ଘଟଣାରେ ୬ ଜଣଙ୍କର ମୃତ୍ୟୁ ହୋଇଥିବା ବେଳେ ୧୫ ଜଣ ଗୁରୁତର ଆହତ ହୋଇଛନ୍ତି ।
ସୂଚନା ମୁତାବକ ଏଭଳି ହୃଦୟ ବିଦାରକ ଘଟଣା ଓନାକୋଟି ଜିଲ୍ଲା କୁମାରଘାଟ ଅଞ୍ଚଳରେ ବୁଧବାର ସନ୍ଧ୍ୟାବେଳେ ଘଟିଛି । ଅପରାହ୍ନ ୪.୩୦ ମିନିଟ ସମୟରେ ଏଠାରେ ଭଗବାନ ଜଗନ୍ନାଥଙ୍କ ଓଲଟା ରଥଯାତ୍ରା ଉତ୍ସବ ପାଳନ କରାଯାଉଥିଲା । ଏହି କ୍ରମରେ ଭଗବାନ ଜଗନ୍ନାଥ, ବଳଭଦ୍ର ଓ ଦେବୀ ସୁଭଦ୍ରାଙ୍କ ରଥଯାତ୍ରା ଚାଲିଥିଲା ।
ଲୁହାରେ ନିର୍ମିତ ବିଶାଳ ରଥକୁ ହଜାର ହଜାର ଲୋକ ନିଜ ହାତରେ ଟାଣି ନେଉଥିଲେ । ଏହି କ୍ରମରେ ଲୁହାରଥର କିଛି ଅଂଶ ସଡକ କଡରେ ଯାଇଥିବା ହାଇଭୋଲଟେଜ ଇଲେକ୍ଟ୍ରି ତାର ସଂସ୍ପର୍ଶରେ ଆସିଥିଲା । ଫଳରେ ରଥରେ ନିଆଁ ଲାଗିବା ସହ ରଥଟି ଚାର୍ଜ ହୋଇଯାଇଥିଲା । ଏହାଦ୍ୱାରା ଘଟଣା ସ୍ଥଳରେ ୬ଜଣଙ୍କର ମୃତ୍ୟୁ ହୋଇଥିବା ବେଳେ ୧୫ରୁ ଅଧିକ ଭକ୍ତ ଗୁରୁତର ଆହାତ ହୋଇଛନ୍ତି ।
ସେପଟେ ଓଡ଼ିଶାରେ ମଧ୍ୟ ବାହୁଡ଼ାରେ ବିଭିନ୍ନ ସ୍ଥାନରୁ ଆସିଛି ଅଘଟଣର ଖବର । ଭିନ୍ନ ଭିନ୍ନ ସ୍ଥାନରେ ୩ଜଣଙ୍କ ମୃତ୍ୟୁ ହୋଇଥିବା ସୂଚନା ମିଳିଛି । କୋରାପୁଟରେ ଜଣେ ଯୁବକ ବିଦ୍ୟୁତ ତାର ସଂସ୍ପର୍ଶରେ ଆସି ପ୍ରାଣ ହରାଇଛନ୍ତି । ଆଉ ୨ ଗୁରୁତରଙ୍କୁ କୋରାପୁଟ ମେଡିକାଲରେ ଭର୍ତ୍ତି କରାଯାଇଛି । ସେହିପରି ଯୋଡାରେ ବିଦ୍ୟୁତ୍ ସଂସ୍ପର୍ଶରେ ଆସି ୨ଜଣଙ୍କ ମୃତ୍ୟୁ ହୋଇଛି । ବିଦ୍ୟୁତ୍ ଆଘାତରେ ଆହତ ହୋଇଥିବା ଜଣଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି ।
Click it and Unblock the Notifications
Sign in with Google