ଜୁନ୍‌ ୫ରେ ହେବ ଅଯୋଧ୍ୟାରେ ରାମ ଦରବାର ପ୍ରତିଷ୍ଠା

ଅଯୋଧ୍ୟାର ଭବ୍ୟ ରାମ ମନ୍ଦିରରେ ଭଗବାନ ରାମଲଲାଙ୍କ ପ୍ରାଣ ପ୍ରତିଷ୍ଠା ଉତ୍ସବର ପ୍ରାୟ ଦେଢ଼ ବର୍ଷ ପରେ ଏବେ ଆଉ ଏକ ପ୍ରାଣ ପ୍ରତିଷ୍ଠ ହେବାକୁ ଯାଉଛି। ରାମ ମନ୍ଦିରରେ ପ୍ରଭୁ ଶ୍ରୀରାମଙ୍କ ବିଶାଳ ଦରବାର ମଧ୍ୟ ନିର୍ମିତ ହୋଇଛି। ଏହି ଦରବାର ମନ୍ଦିରର ପ୍ରଥମ ମହଲାରେ ନିର୍ମିତ, ଯାହାକୁ ରାମ ଦରବାର ଭାବରେ ପ୍ରତିଷ୍ଠିତ କରାଯିବ। ଏହି ପବିତ୍ର ସମାରୋହକୁ ମହାନ କରିବା ପାଇଁ ପ୍ରସ୍ତୁତି ଚାଲିଛି। ନିକଟରେ, ଶ୍ରୀ ରାମ ମନ୍ଦିର ତୀର୍ଥ କ୍ଷେତ୍ର ଟ୍ରଷ୍ଟର ବୈଠକରେ ଉତ୍ସବର ପ୍ରସ୍ତୁତି ସମୀକ୍ଷା କରାଯାଇଥିଲା ଏବଂ ଟ୍ରଷ୍ଟର ମହାସଚିବ ଚମ୍ପତ ରାୟଙ୍କୁ ପ୍ରତିଷ୍ଠା ଉତ୍ସବର ତାରିଖ ଘୋଷଣା କରିବାର ଦାୟିତ୍ୱ ଦିଆଯାଇଥିଲା। ଏହି ସମାରୋହ ୨୨ ଜାନୁଆରୀ, ୨୦୨୪ରେ ଆୟୋଜିତ ମହାନ ସମାରୋହ ପରି ହେବ ନାହିଁ, କିନ୍ତୁ ଏହାର ଫର୍ମାଟ ବହୁତ ବ୍ୟାପକ ହେବ।

କାର୍ଯ୍ୟକ୍ରମକୁ ୟୁପି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ଆମନ୍ତ୍ରଣ କରାଯାଇଛି । ଯୋଗୀ ଆମନ୍ତ୍ରଣ ସ୍ୱୀକାର କରିଥିବା ମଧ୍ୟ ଚମ୍ପତ ରାୟ କହିଛନ୍ତି । ଏଥିସହ ୨୦ ସନ୍ଥ-ଧର୍ମାଚାର୍ଯ୍ୟଙ୍କ ସମେତ ଟ୍ରଷ୍ଟ ପଦାଧିକାରୀଙ୍କୁ ମଧ୍ୟ ନିମନ୍ତ୍ରଣ କରାଯାଇଛି । ସନାତନ ପରମ୍ପରା ଅନୁସାରେ, ଦ୍ୱାପର ଯୁଗର ଆରମ୍ଭ ଜୈଷ୍ଠ ମାସ ଶୁକ୍ଳ ପକ୍ଷର ଦଶମୀ ତିଥିରେ ହୋଇଥିବା ବିବେଚନା କରାଯାଏ । ଚଳିତ ବର୍ଷ ଏହି ତିଥି ଜୁନ୍‌ ୫ରେ ପଡ଼ୁଛି ।

ପ୍ରାଣ ପ୍ରତିଷ୍ଠାର ଅନୁଷ୍ଠାନ କାର୍ଯ୍ୟକ୍ରମ ଜୁନ୍‌ ୩ରୁ ଆରମ୍ଭ ହେବ । ଜୁନ୍‌ ୨ରେ ମହିଳାମାନେ ସରଯୂ ନଦୀରୁ ପାଣି ଆଣି କଳସ ଯାତ୍ରା କରିବେ । ଜୁନ୍‌ ୩ ସକାଳ ସାଢ଼େ ୬ଟାରେ ସବୁ ମନ୍ଦିରରେ ବିଶେଷ ପୂଜାପାଠ ଆରମ୍ଭ ହେବ । ଏହା ରାତି ୯ଟା ପର୍ଯ୍ୟନ୍ତ ଚାଲିବ । ଅପରାହ୍ନରେ ଘଣ୍ଟାଏର ବିଶ୍ରାମ ସମୟ ରହିବ । ଏହିଭଳି ଜୁନ୍‌ ୪ ଏବଂ ଜୁନ୍‌ ୫ରେ ବି ବିଶେଷ ପୂଜାପାଠ ହେବ । ୧୧ଟା ପରେ ପ୍ରାଣପ୍ରତିଷ୍ଠା କାର୍ଯ୍ୟ ଆରମ୍ଭ ହେବ ।

ମନ୍ଦିରର ପ୍ରଥମ ମହଲାରେ ରାମ ଦରବାର ସ୍ଥାପନ ହୋଇଛି । ଏହା ପରିସରରେ ସୂର୍ଯ୍ୟ, ଗଣେଶ, ହନୁମାନ, ଶିବ, ଭଗବତୀ, ଅନ୍ନପୂର୍ଣ୍ଣାଙ୍କ ମନ୍ଦିର ରହିଛି । ଏହି ସବୁ ମନ୍ଦିରରେ ଜୁନ୍‌ ୫ରେ ପ୍ରାଣ ପ୍ରତିଷ୍ଠା କରାଯିବ। ଏହା ବ୍ୟତୀତ ସପ୍ତ ମଣ୍ଡପମ୍‌ରେ ୭ ମନ୍ଦିର ରହିଛି । ସେଥିରେ ମହର୍ଷି ବାଲ୍ମିକୀ, ବିଶ୍ୱାମିତ୍ର, ଅଗସ୍ତ୍ୟ, ବଶିଷ୍ଠ, ନିଷାଦରାଜ, ଅହଲ୍ୟା ଏବଂ ଶବରୀ ମୂର୍ତ୍ତି ସ୍ଥାପନ ହୋଇସାରିଛି ।