ଦିଲ୍ଲୀ ବିସ୍ଫୋରଣ ଘଟଣାରେ ଏନଆଇଏକୁ ଆଉ ଏକ ସଫଳତା, ସୋଏବକୁ କଲା ଗିରଫ

ଦିଲ୍ଲୀର ଲାଲକିଲ୍ଲା ନିକଟରେ ଘଟିଥିବା କାର ବିସ୍ଫୋରଣ ଘଟଣାରେ ଏନଆଇଏକୁ ମିଳିଛି ଆଉ ଏକ ସଫଳତା। ଏହି ଘଟଣାରେ ଏନଆଇଏ ଆଉ ଜଣେ ସନ୍ଦିଗ୍ଧ ବ୍ୟକ୍ତିଙ୍କୁ ଗିରଫ କରିଛି। ଏହି ସନ୍ଦିଗ୍ଧ ବ୍ୟକ୍ତି ଜଣକ ବିସ୍ଫୋରଣ ପୂର୍ବରୁ ମୁଖ୍ୟ ଆତଙ୍କବାଦୀ ଉମର ଉନ୍ ନବିକୁ ସମର୍ଥର୍ନ କରିଥିଲା। ତାଙ୍କ ଲୁଚି ରହିବା ପାଇଁ ସ୍ଥାନ ଏବଂ ଆବଶ୍ୟକୀୟ ସହାୟତା ଯୋଗାଇ ଦେଇଥିଲା। ଗିରଫ ସନ୍ଦିଗ୍ଧ ବ୍ୟକ୍ତି ଜଣକ ହେଲେ ସୋଏବ। ସେ ହରିଯାଣାର ଫରିଦାବାଦର ଧାଉଜ ଗାଁର ବାସିନ୍ଦା।

ତଦନ୍ତରୁ ଜଣାପଡିଛି ଯେ ବିସ୍ଫୋରଣ ପୂର୍ବରୁ ସୋଏବ ଆତଙ୍କବାଦୀ ଉମରକୁ ତାଙ୍କ ଘରେ ଲୁଚାଇ ରଖିଥିଲେ। ଏହି ମାମଲାରେ ଗିରଫ ହୋଇଥିବା ସୋଏବ ହେଉଛନ୍ତି ସପ୍ତମ ଅଭିଯୁକ୍ତ। ଏହି ଗିରଫଦାରୀ ପୂର୍ବରୁ, ଏନଆଇଏ ଉମରର ଅନ୍ୟ ଛଅ ଜଣ ସହଯୋଗୀଙ୍କୁ ଗିରଫ କରିଥିଲା। ଜଣେ ଏଜେନ୍ସିର ମୁଖପାତ୍ର କହିଛନ୍ତି ଯେ ସୋଏବ କେବଳ ଉମରକୁ ତାଙ୍କ ଘରେ ଆଶ୍ରୟ ଦେଇନଥିଲେ, ବରଂ ତାଙ୍କୁ ବିସ୍ଫୋରକ ପହଞ୍ଚାଇବା, ନିରାପଦ ରାସ୍ତା ଯୋଗାଇବା ଏବଂ ଖସିଯିବାରେ ମଧ୍ୟ ସାହାଯ୍ୟ କରିଥିଲେ। ଏହି ସମୟରେ ତାଙ୍କ ସ୍ଥାନ ଏବଂ କଲ୍ ଡିଟେଲ୍ସର ତଦନ୍ତରୁ ଅନେକ ଆଶ୍ଚର୍ଯ୍ୟଜନକ ଖୁଲାସା ସାମ୍ନାକୁ ଆସିଛି।

ଏନଆଇଏ ସନ୍ଦେହ କରୁଛି ଯେ ସୋଏବ ଏକ ପ୍ରମୁଖ ଆତଙ୍କବାଦୀ ନେଟୱାର୍କ ସହିତ ଜଡିତ ଥାଇପାରେ। ବର୍ତ୍ତମାନ, ସୋଏବକୁ ଦିଲ୍ଲୀ ଅଣାଯାଉଛି ଏବଂ ଏକ ସ୍ୱତନ୍ତ୍ର ଏନଆଇଏ କୋର୍ଟରେ ହାଜର କରାଯିବ। ତାଙ୍କୁ ପଚରାଉଚରା କରିବା ଏବଂ ଅବଶିଷ୍ଟ ପଳାତକ ଅଭିଯୁକ୍ତମାନଙ୍କ ପାଖରେ ପହଞ୍ଚିବା ପାଇଁ ଏଜେନ୍ସି ୧୦ ଦିନିଆ ରିମାଣ୍ଡ ଲୋଡିଛି। ଏନଆଇଏ ଦେଶର ବିଭିନ୍ନ ରାଜ୍ୟରେ ଚଢାଉ ଜୋରଦାର କରିଛି। ପଞ୍ଜାବ, ହରିୟାଣା, ଉତ୍ତର ପ୍ରଦେଶ ଏବଂ ରାଜସ୍ଥାନରେ ଏକକାଳୀନ ସର୍ଚ୍ଚ ଅପରେସନ ଚାଲିଛି।

ସୂଚନାଯୋଗ୍ୟ, ଦିଲ୍ଲୀର ଲାଲକିଲ୍ଲା ନିକଟରେ ଆତଙ୍କବାଦୀ ଆକ୍ରମଣରେ ଏପର୍ଯ୍ୟନ୍ତ ୧୩ ଜଣଙ୍କ ମୃତ୍ୟୁ ହୋଇଥିବା ବେଳେ ଅନେକ ଗୁରୁତର ଆହତ ହୋଇଛନ୍ତି। ବିସ୍ଫୋରଣ ଏତେ ଶକ୍ତିଶାଳୀ ଥିଲା ଯେ ଲାଲକିଲ୍ଲା ପାଖରେ ପାର୍କିଂ ହୋଇଥିବା ଅନେକ ଯାନ ସମ୍ପୂର୍ଣ୍ଣ କ୍ଷତିଗ୍ରସ୍ତ ହୋଇଥିଲା ଏବଂ ଅଞ୍ଚଳରେ ଚାଞ୍ଚଲ୍ୟ ଖେଳିଯାଇଥିଲା।