ମଧ୍ୟପ୍ରଦେଶ କୁନୋରେ ପୁଣି ଆଉ ଏକ ଆଫ୍ରିକୀୟ ଚିତାର ମୃତ୍ୟୁ

Updated: Tuesday, April 25, 2023, 8:52 [IST]

ଭୋପାଲ:ଆଖି ବୁଜିଲା ଆଉ ଏକ ଆଫ୍ରିକୀୟ ଚିତା 'ଉଦୟ' । ସ୍ୱାସ୍ଥ୍ୟ ଅବସ୍ଥା ଖରାପ ହେବା ପରେ ଉଦୟ ମଧ୍ୟପ୍ରଦେଶର କୁନୋ ଜାତୀୟ ଉଦ୍ୟାନରେ ଚିକିତ୍ସିତ ହେଉଥିଲା, ଚିକିତ୍ସା ସମୟରେ ଚିତାଟିର ମୃତ୍ୟୁ ହୋଇଥିଲା । ବନ ବିଭାଗର ରାଜ୍ୟ ମୁଖ୍ୟ କନେଷ୍ଟବଳ ଜେଏସ ଚୌହାନ ଏହି ଘଟଣା ସମ୍ପର୍କରେ ସୂଚନା ଦେଇଛନ୍ତି । ତେବେ ଚିତା ଉଦୟର କେମିତି ମୃତ୍ୟୁ ଘଟିଲା ତାହା ସ୍ପଷ୍ଟ ହୋଇନାହିଁ ।

ପୂର୍ବରୁ ମାର୍ଚ୍ଚ ୨୭ରେ କିଡନୀ ସଂକ୍ରମଣ ଯୋଗୁଁ ପ୍ରାଣ ହରାଇଥିଲା ପାଞ୍ଚ ବର୍ଷ ବୟସ୍କା ଚିତା 'ଶାଶା' । ଅନୁସନ୍ଧାନରୁ ଏହା ଜଣାପଡିଥିଲା ଯେ, ଯେତେବେଳେ ଶାଶାକୁ ଭାରତ ଅଣାଯାଇଥିଲା, ସେତେବେଳେ ତାର କିଡନୀ ଜନିତ ସମସ୍ୟା ଥିଲା । ଉଦୟର ମୃତ୍ୟୁ ପରେ କୁନୋରେ ଅଛନ୍ତି ୧୮ ଚିତାବାଘ, ୪ ଶାବକ ।

ଚିତା ପ୍ରୋଜେକ୍ଟ ଅଧିନରେ ୨ଟି ପର୍ଯ୍ୟାୟରେ ନାମିବିଆ ଓ ଦକ୍ଷିଣ ଆଫ୍ରିକାରୁ ୨୦ଟି ଚିତା ଅଣାଯାଇ କୁନୋରେ ଛଡାଯାଇଥିଲା । ପ୍ରଥମ ପର୍ଯ୍ୟାୟରେ ୮ଟି ଏବଂ ଦ୍ୱିତୀୟ ପର୍ଯ୍ୟାୟର ୧୨ଟି ଚିତା ଅଣାଯାଇଥିଲା । ଚଳିତ ବର୍ଷ ମାର୍ଚ୍ଚ ୨୭ରେ ଚିତା ଶାଶାର ମୃତ୍ୟୁ ଘଟିଥିଲା ଏବଂ ଗତକାଲି ଆଉ ଏକ ଆଫ୍ରିକିୟ ଚିତା ଉଦୟର ମୃତ୍ୟୁ ହୋଇଛି ।

ସୂଚନାଯୋଗ୍ୟ ଯେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ତାଙ୍କ ଜନ୍ମଦିନ ଅବସରରେ ଗତ ବର୍ଷ ସେପ୍ଟେମ୍ବର ୧୭ରେ କୁନୋ ଜାତୀୟ ଉଦ୍ୟାନରେ ନାମିବିଆରୁ ଅଣାଯାଇଥିବା ୮ଟି ଚିତାଙ୍କୁ ଛାଡିଥିଲେ ।

ସୂଚନାଥାଉ ଯେ, ୧୯୫୨ ମସିହାରେ ଭାରତରେ ଚିତା ବିଲୁପ୍ତ ହୋଇଯାଇଥିଲା, ଏହା ପରେ ଆଫ୍ରିକାର ନାମିବିଆରୁ ୮ଟି ଚିତା ଭାରତକୁ ପ୍ରୋଜେକ୍ଟ ଚିତା ଅଧୀନରେ ଅଣାଯାଇଥିଲା, ଜଙ୍ଗଲ ପରିବେଶର ଉନ୍ନତି ଲକ୍ଷ୍ୟରେ ଭାରତ ସରକାର ଏହି ଚିତାଗୁଡ଼ିକୁ ଭାରତକୁ ଆଣିଥିଲେ ।