ସୁର ସମ୍ରାଜ୍ଞୀଙ୍କ ଅନ୍ତିମ ସଂସ୍କାର: ଶ୍ରଦ୍ଧାଞ୍ଜଳି ଦେବାକୁ ବାସଭବନ ପହଞ୍ଚିଲେ ଅମିତାବ ବଚ୍ଚନ,

By Staff

Published: Sunday, February 6, 2022, 16:16 [IST]

ଶ୍ଵେତ ବସ୍ତ୍ର ପରିହିତା, ଶ୍ଵେତ ସୁଲଭ ସଙ୍ଗୀତର ରାଗ ଧାରଣ କରିଥିବା ଲତା ସ୍ଵୟଂ ଶ୍ଵେତ ପଦ୍ମା ମା ସରସ୍ଵତୀଙ୍କ ସାକ୍ଷାତ ସ୍ବରୂପୀଣୀ। ଲତାଙ୍କୁ ଏହିଭଳି ଭାବଗତ ଅଭିବ୍ୟକ୍ତି କରିଛନ୍ତି କିମ୍ବଦନ୍ତୀ ପୁରୁଷ ଅମିତାବ ବଚ୍ଚନ । ସ୍ଵରର ଝଙ୍କାର ତୋଳି ସମଗ୍ର ମାନବ ଜାତିକୁ ସ୍ନିଗ୍ଧ କରିଥିବା ଏହି ମହାନ ସଂଗୀତ ତପସ୍ଵିନୀ ଆଜି ଯାତ୍ରା କରିଛନ୍ତି ବ୍ରହ୍ମଲୋକକୁ ।

ମୁମ୍ବାଇ: ଲତା ମଙ୍ଗେସକରଙ୍କ ଦେହାନ୍ତରେ ସମଗ୍ର ବିଶ୍ଵ ଯେପରି ସ୍ତବ୍ଧ ହୋଇଯାଇଛି। ସମଗ୍ର ଦେଶବାସୀ ଆଜି ଶୋକ ସନ୍ତପ୍ତ । ରାଷ୍ଟ୍ରପତିଙ୍କ ଠାରୁ ଆରମ୍ଭ କରି ପ୍ରଧାନମନ୍ତ୍ରୀ, ବିଭିନ୍ନ ମୁଖ୍ୟମନ୍ତ୍ରୀ, ନେତା, ଅଭିନେତା, ସଙ୍ଗୀତଜ୍ଞ ଏବଂ ସାଧାରଣ ନାଗରିକ ସମସ୍ତେ ବିଚଳିତ ହୃଦୟରେ ଶୋକର ଅଭିବ୍ୟକ୍ତି କରିଛନ୍ତି। ଆଜି ସନ୍ଧ୍ଯାରେ ରାଷ୍ଟ୍ରୀୟ ମର୍ଯ୍ୟାଦା ସହିତ ଅନ୍ତିମ ସଂସ୍କାର ହେବ ଲତାଙ୍କ ପାର୍ଥିବ ଶରୀର ।

ପିଏମ ମୋଦୀ ପହଞ୍ଚିବେ 5.45ରେ:

ଲତା ମଙ୍ଗେସକରଙ୍କ ଅନ୍ତିମ ସଂସ୍କାରରେ ସାମିଲ ହେବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଗସ୍ତ ସୂଚୀ ଚୁଡାନ୍ତ ହୋଇଛି । ଆଜି 5.45ରେ ପ୍ରଧାନମନ୍ତ୍ରୀ ମୁମ୍ବାଇ ପହଞ୍ଚିବେ । ସକାଳେ ଲତାଙ୍କ ନିଧନରେ ଶୋକ ବ୍ୟକ୍ତ କରିବା ପରେ ମୋଦୀ ଅନ୍ତିମ ସଂସ୍କାରରେ ସାମିଲ ହେବା ନେଇ ନିଜେ ଟୁଇଟ କରି ଜଣାଇଥିଲେ ।

ଅନ୍ତିମ ସଂସ୍କାର ପାଇଁ ପ୍ରସ୍ତୁତି:

ମୁମ୍ବାଇର ଶିବାଜି ପାର୍କରେ ଆଜି ସନ୍ଧ୍ଯା 6.30ରେ କିମ୍ବଦନ୍ତୀ ଗାୟିକାଙ୍କ ଅନ୍ତିମ ସଂସ୍କାର ହେବ । ଏହି କାର୍ଯ୍ୟକ୍ରମରେ ଯୋଗ ଦେବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ପ୍ରଧାନମନ୍ତ୍ରୀ ମୋଦୀ ସନ୍ଧ୍ଯା 5ଟାରେ ମୁମ୍ବାଇ ଶିବାଜି ପାର୍କରେ ପହଞ୍ଚିବେ ବୋଲି ଗସ୍ତ ସୂଚୀ ଧାର୍ଯ୍ୟ ହୋଇଛି । ଏଥିରେ ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଥାକରେଙ୍କ ସମେତ ରାଜ୍ୟର ଅନ୍ୟାନ୍ୟ ମନ୍ତ୍ରୀ ଏବଂ ଗଣାନ୍ୟ ବ୍ୟକ୍ତିମାନେ ଏଥିରେ ଉପସ୍ଥିତ ରହିବେ । ସଭାସ୍ଥଳରେ ପ୍ରସ୍ତୁତି ଜୋରସୋରରେ ଜାରି ରହିଛି। ମୁମ୍ବାଇ ପୁଲିସ କମିସନରଙ୍କ ସମେତ ବରିଷ୍ଠ ଅଧିକାରୀମାନେ ଉପସ୍ଥିତ ରହି କାର୍ଯ୍ୟକ୍ରମ ତଦାରଖ କରୁଛନ୍ତି। ସଭାସ୍ଥଳକୁ ବହୁ ବିଶିଷ୍ଟ ବ୍ୟକ୍ତିଙ୍କ ଆଗମନ ଦ୍ରୁଷ୍ଟିରୁ ସୁରକ୍ଷା ବ୍ୟବସ୍ଥା କଡାକଡି କରାଯାଇଛି ।

ବାସଭବନରେ ପହଞ୍ଚିଲେ ଅମିତାଭ ବଚ୍ଚନ:

ଆଜି ସୁର ସମ୍ରାଜ୍ଞୀଙ୍କ ପାର୍ଥିବ ଶରୀର ତାଙ୍କ ମୁମ୍ବାଇ ସ୍ଥିତ ବାସଭବନରେ ପହଞ୍ଚିବା ପରେ ଶ୍ରଦ୍ଧାଞ୍ଜଳି ଅର୍ପଣ କରିବା ପାଇଁ ପହଞ୍ଚିଛନ୍ତି ଅନେକ ବିଶିଷ୍ଟ ବ୍ୟକ୍ତି । ଲତାଙ୍କ ଘରେ ବଲିଉଡ ଅଭିନେତା ଓ ଅଭିନେତ୍ରୀ ପହଞ୍ଚି ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି। ଅମିତାଭ ବଚ୍ଚନ ଝିଅ ଶ୍ଵେତା ବଚ୍ଚନଙ୍କ ସହିତ ପହଞ୍ଚି ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି ।

#WATCH Amitabh Bachchan arrives to pay last respects to singer Lata Mangeshkar at her 'Prabhukunj' residence in Mumbai pic.twitter.com/BKzJflbLpX
— ANI (@ANI) February 6, 2022