ବିମାନ ଦୁର୍ଘଟଣାରେ ମୃତକଙ୍କ ପରିବାର ପାଇଁ ସହାୟତା ଘୋଷଣା, ୧ କୋଟି ଲେଖାଏଁ ସହାୟତାରାଶି ଦେବ ଟାଟା ଗ୍ରୁପ୍

ଅହମ୍ମଦାବାଦ ବିମାନ ଦୁର୍ଘଟଣାକୁ ନେଇ ଆସିଲା ଆଉ ଏକ ଅପଡେଟ୍ । ବିମାନ ଦୁର୍ଘଟଣାରେ ପ୍ରାଣ ହରାଇଥିବା ସମସ୍ତ ମୃତକଙ୍କ ପରିବାରକୁ ମିଳିବ ସହାୟତା ରାଶି। ଏହି ସହାୟତା ରାଶି ଦେବ ଟାଟା ଗୃପ୍। ପ୍ରତି ମୃତକଙ୍କ ପରିବାରକୁ ମିଳିବ ୧ କୋଟି ଲେଖାଏଁ ସହାୟତା ରାଶି। ଏନେଇ ଟାଟା ଗୃପ୍ ପକ୍ଷରୁ ସୂଚନା ଦିଆଯାଇଛି। ଆଜି ଅପରାହ୍ନରେ ଗୁଜୁରାଟର ଅହମ୍ମଦାବାଦରେ ଏୟାର ଇଣ୍ଡିଆ ବିମାନ ଦୁର୍ଘଟଣାଗ୍ରସ୍ତ ହୋଇଥିଲା।

ବିମାନରେ ଥିଲେ ମୋଟ 242 ଜଣ ଲୋକ। 230 ଜଣ ଯାତ୍ରୀ, 2 ଜଣ ପାଇଲଟ ଓ 10 ଜଣ କ୍ରୁ ମେମ୍ବର । 230 ଯାତ୍ରୀଙ୍କ ମଧ୍ୟରୁ ସର୍ବାଧିକ 169 ଜଣ ଭାରତୀୟ, 53 ଜଣ ବ୍ରିଟେନର ନାଗରିକ, 7 ଜଣ ପର୍ତ୍ତୁଗୀଜ୍ ଓ ଜଣେ କାନାଡ଼ାର ନାଗରିକ। କୁହାଯାଉଛି ଏହି ଦୁର୍ଘଟଣାରେ ମାତ୍ର ଜଣେ ଯାତ୍ରୀ ଜୀବିତ ଅଛନ୍ତି। ତାଙ୍କର ହସ୍ପିଟାଲରେ ଚିକିତ୍ସା ଚାଲିଛି। ଏହାସହ ଗୁଜୁରାଟର ପୂର୍ବତନ ମୁଖ୍ୟମନ୍ତ୍ରୀ ମଧ୍ୟ ଏହି ବିମାନ ଦୁର୍ଘଟଣାରେ ପ୍ରାଣ ହରାଇଥିବା ସୂଚନା ମିଳିଛି।