ଜମ୍ମୁ-କଶ୍ମୀର ଆତଙ୍କୀ ହମଲା: ପ୍ରଧାନମନ୍ତ୍ରୀଙ୍କୁ ଟାର୍ଗେଟ କଲେ ଓୱେସି, କହିଲେ ମୋଦି କହୁଥିଲେ ଘରେ....

ଗତକାଲି ସନ୍ଧ୍ୟାରେ ଜମ୍ମୁ- କଶ୍ମୀରର ଡୋଡା ଜିଲ୍ଲାରେ ଆତଙ୍କବାଦୀଙ୍କ ସହ ଗୁଳି ବିନିମୟରେ ୪ ଯବାନ ଶହୀଦ ହୋଇଥଲେ । ମୃତକଙ୍କ ମଧ୍ୟରେ ଜଣେ ଅଧିକାରୀ ଓ ୩ ଯବାନ ରହିଥିଲେ । ବର୍ତ୍ତମାନ ଆଉ ଜଣେ ଯବାନ ଗୁରୁତର ଅବସ୍ଥାରେ ଚିକିତ୍ସିତ ହେଉଛନ୍ତି । ଆତଙ୍କବାଦୀ ସଙ୍ଗଠନ କଶ୍ମୀର ଟାଇଗର୍ସ ଏହି ଆକ୍ରମଣ ପାଇଁ ନିଜକୁ ଦାୟୀ କରିଛି ।

ପାକିସ୍ତାନୀ ଆତଙ୍କବାଦୀ ସଙ୍ଗଠନ ଜୈସ- ଇ- ମହମ୍ମଦ ସହ ଏହି ସଙ୍ଗଠନର ସମ୍ପର୍କ ଥିବା ଜଣାଯାଇଛି । ବର୍ତ୍ତମାନ ଏହି ଆତଙ୍କି ଆକ୍ରମଣ ପରେ ଦେଶରେ ରାଜନୈତିକ ମାହୋଲ ହୋଇଛି ପୁରା ଉଷ୍ମ । ଏହି ଘଟଣାରେ ଏଆଇଏମ୍‌ଆଇଏମ୍ ମୁଖ୍ୟ ଅସଦୁଦ୍ଦିନ ଓୱେସି ପ୍ରଧାନମନ୍ତ୍ରୀ ମୋଦିଙ୍କୁ କରିଛନ୍ତି ଟାର୍ଗେଟ । ସେ କହିଛନ୍ତି ଯେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହୁଥିଲେ କି ଆମେ ଘରେ ପଶି ମାରିବୁ ।

ହେଲେ ଏ ସବୁ କଣ ହେଉଛି ବୋଲି ସେ ପ୍ରଶ୍ନ କରିଛନ୍ତି । ଇଏ ସରକାରଙ୍କ ବଡ଼ ବିଫଳତା । କେନ୍ଦ୍ର ସରକାର ଆତଙ୍କବାଦକୁ ନିୟନ୍ତ୍ରଣରେ ରଖିପାରୁନାହାନ୍ତି ବୋଲି ସେ ଏଏନ୍‌ଆଇ ଦେଇଥିବା ସାକ୍ଷାତକାରରେ କହିଛନ୍ତି । ଡୋଡାର ଯେଉଁ ସ୍ଥାନରେ ଏହା ଆକ୍ରମଣ ହୋଇଛି ତାହା ଏଲ୍‌ଓସି ଠାରୁ ବହୁତ ଦୂର । ତେଣୁ ଏହା ବଡ଼ ଚିନ୍ତାର ବିଷୟ ବୋଲି ଓୱେସି କହିଛନ୍ତି ।