ଦୀପାବଳୀ 2022: ହଜାର ହଜାର ଦୀପ ତିଆରି କରି ବିକିଲେ କାଶ୍ମୀରର ମୁସଲିମ ପରିବାର

କାଶ୍ମୀରୀ ମୁସଲମାନ ପରିବାର ଅନେକ ସପ୍ତାହ ଧରି ମାଟି ଦୀପ ତିଆରି କରି ବିକ୍ରି କରିଥିବା ଖବର ଏବେ ଚର୍ଚ୍ଚାର ବିଷୟ ପାଲଟିଛି ।

Published: Sunday, October 23, 2022, 15:42 [IST]

ଶ୍ରୀନଗର: ଆସନ୍ତାକାଲି ଦେଶର କୋଣ ଅନୁକୋଣରେ ପାଳନ ହେବ ଆଲୋକର ପର୍ବ ଦୀପାବଳି । ଏକ କାଶ୍ମୀରୀ ମୁସଲମାନ ପରିବାର ଅନେକ ସପ୍ତାହ ଧରି ମାଟି ଦୀପ ତିଆରି କରି ବିକ୍ରି କରିଥିବା ଖବର ଏବେ ଚର୍ଚ୍ଚାର ବିଷୟ ପାଲଟିଛି । ଏହି ପରିବାର ବର୍ତ୍ତମାନ ସୁଦ୍ଧା 15 ହଜାରରୁ ଅଧିକ ମାଟି ଦୀପ ତିଆରି କରି ବିକ୍ରି କରିଥିବା ଜଣା ପଡିଛି । ତେବେ ଦୀପ ତିଆରି କରୁଥିବା ବ୍ୟକ୍ତି ହେଲେ ଓମାର କୁମାର । ସେ ତାଙ୍କ ପୁରା ପରିବାର ସହିତ ଦଶନ୍ଧି ଧରି କୁମ୍ଭାର ବ୍ୟବସାୟରେ ଅଛନ୍ତି କିନ୍ତୁ ଚଳିତ ବର୍ଷ ସେମାନେ ପ୍ରଥମ ଥର ପାଇଁ ଦୀପାବଳି ଦୀପ ତିଆରି କରିଛନ୍ତି।

ଦିନ ରାତି ଅକ୍ଳାନ୍ତ ପରିଶ୍ରମ କରି ଦୀପ ତିଆରି କରୁଛନ୍ତି ଏହି ପରିବାର । କାଶ୍ମୀର ଉପତ୍ୟକାର ପାରମ୍ପାରିକ ଗ୍ଲେଜ୍ ମାଟିପାତ୍ର କଳାକୁ ବଞ୍ଚାଇବା ପାଇଁ ଓମାର ତାଙ୍କ ପରିବାର ସହିତ କାମ କରିଛନ୍ତି ବୋଲି କହିଛନ୍ତି । ତାଙ୍କ କହିବା ଅନୁସାରେ,'' ଆମେ ଚଳିତ ବର୍ଷ ବଡ ଅର୍ଡର ପାଇଲୁ, ଗତ ବର୍ଷ ଆମର ପ୍ରାୟ 8ଶହ ଖଣ୍ଡ ଦୀପ ଅର୍ଡର କରାଯାଇଥିଲା । ଚଳିତ ବର୍ଷ ଏହା 15 ହଜାରରୁ ଅଧିକ ରହିଥିଲା । କିନ୍ତୁ ଏହାପରେ ବି ଆହୁରି ଅର୍ଡର ରହିଥିଲା, କିନ୍ତୁ ସବୁ କରିବା ସମ୍ଭବପର ହୋଇନଥିଲା । ଏହି ଦୀପ ତିଆରି କରି କୁଲଗାମକୁ ପଠାଇଛୁ , ସେଠାରୁ ଏହି ଦୀପ ଗୁଡିକୁ ଦେଶର ବିଭିନ୍ନ ସ୍ଥାନକୁ ପଠାଯ।ଉଛି ।

ଆମେ ହିନ୍ଦୁ ଏବଂ ମୁସଲମାନମାନଙ୍କ ମଧ୍ୟରେ ପାର୍ଥକ୍ୟ କରୁନାହୁଁ, ଆମେ ସମସ୍ତେ ଖୁସିରେ ଏକାଠି ବାସ କରୁ ଏବଂ ଆମେ ଅନ୍ୟ ସମ୍ପ୍ରଦାୟରୁ ଜିନିଷ ମଧ୍ୟ କିଣୁ । ଏହି ଦୀପାବଳିରେ ଆମେ ଭଲ ଟଙ୍କା ରୋଜଗାର କରିଥିଲୁ ବୋଲି କୁମ୍ଭାର ଓମାର କୁମାର କହିଛନ୍ତି। କେବଳ ଏତିକି ନୁହେଁ ଦୀପାବଳି ପାଇଁ ଓମାର ତାଙ୍କ ଅଞ୍ଚଳରେ ହିନ୍ଦୁ ଲୋକମାନଙ୍କୁ ମାଗଣାରେ ଶହ ଶହ ଦୀପ ବାଣ୍ଟିଛନ୍ତି। କାଶ୍ମୀର ସର୍ବଦା ସମ୍ପ୍ରଦାୟରେ ଭାଇଚାରାର ଏକ ନିଆରା ଉଦାହରଣ ସୃଷ୍ଟି କରିଛି। ଏହି ମୁସଲିମ ପରିବାର ଦୀପାବଳିରେ ଦୀପ ତିଆରି ଏହାକୁ ପ୍ରମାଣିତ କରିଛନ୍ତି।

Published On October 23, 2022