ଭଗବାନ ଭେଙ୍କଟେଶ୍ବରଙ୍କୁ ୧୪୦ କୋଟିର ସୁନା ଦାନ କଲେ ଭକ୍ତ

ଭେଙ୍କଟେଶ୍ବର ସ୍ବାମୀ ମନ୍ଦିରକୁ ୧୨୧ କିଲୋ ସୁନା ଅର୍ପଣ କରିଛନ୍ତି ଜଣେ ଶ୍ରଦ୍ଧାଳୁ । ଯାହାର ଦାମ୍ ୧୪୦ କୋଟି ବୋଲି ଜଣାପଡିଛି । ଶ୍ରଦ୍ଧାଳୁ ଜଣକ ନିଜର ନାଁ ଗୁପ୍ତ ରଖି ଏହି ଦାନ କରିଛନ୍ତି। । ନିଜ ବ୍ୟବସାୟରେ ଉନ୍ନତି ହେବା ଯୋଗୁଁ ସେ ଭଗବାନଙ୍କୁ ଏହି ସୁନା ଅର୍ପଣ କରିଛନ୍ତି । ଏନେଇ ଆନ୍ଧ୍ର ପ୍ରଦେଶ ମୁଖ୍ୟମନ୍ତ୍ରୀ ଏନ ଚନ୍ଦ୍ରବାବୁ ନାଇଡୁ ଏହା ଘୋଷଣା କରିଛନ୍ତି ।

ଭଗବାନ ଭେଙ୍କଟେଶ୍ୱର ସ୍ୱାମୀଙ୍କ ଜଣେ ଗୁପ୍ତ ଅନୁଗାମୀ ତାଙ୍କ ବ୍ୟବସାୟିକ ସଫଳତା ପାଇଁ କୃତଜ୍ଞତା ସ୍ୱରୂପ ପ୍ରାୟ ୧୪୦ କୋଟି ଟଙ୍କା ମୂଲ୍ୟର ୧୨୧ କିଲୋଗ୍ରାମ ସୁନା ଦାନ କରିବାକୁ ପ୍ରତିଶ୍ରୁତି ଦେଇଛନ୍ତି । ନାମ ଗୋପନ ରଖିବାକୁ ଅନୁରୋଧ କରିଛନ୍ତି ଏହି ଭକ୍ତ । ତାଙ୍କ କମ୍ପାନୀର ୬୦% ଷ୍ଟକ୍ ୧.୫ ବିଲିୟନ ଆମେରିକୀୟ ଡଲାର (ପ୍ରାୟ ୬,୦୦୦-୭,୦୦୦ କୋଟି ଟଙ୍କା) ରେ ବିକ୍ରି କରିଛନ୍ତି ଏବଂ ଶ୍ରୀ ଭେଙ୍କଟେଶ୍ୱର ସ୍ୱାମୀଙ୍କ ଆଶୀର୍ବାଦକୁ ନିଜର ସମ୍ପତ୍ତି ଶ୍ରେୟ ଦେଇ କୃତଜ୍ଞତା ସ୍ୱରୂପ ଭଗବାନଙ୍କୁ ଦାନ କରିବାକୁ ବାଛିଛନ୍ତି ।

ନାଇଡୁ କହିଛନ୍ତି ଯେ, ଭକ୍ତ ଜଣକ ଏକ କମ୍ପାନୀ ଆରମ୍ଭ କରିବାକୁ ଚାହୁଁଥିଲେ । ଭଗବାନ ଭେଙ୍କଟେଶ୍ୱର ସ୍ୱାମୀଙ୍କ କ୍ପାରୁ ତାଙ୍କ କମ୍ପାନୀ ତିଆରି ହୋଇ ବଡ଼ ସଫଳତା ମଧ୍ୟ ହାସଲ କରିଛି । ତେଣୁ ନିଜ ଉନ୍ନତିର ଶ୍ରେୟ ଭଗବାନଙ୍କୁ ଦେଇଛନ୍ତି । ଆଉ ମନ୍ଦିରକୁ ୧୨୧ କିଲୋ ସୁନା ଅର୍ପଣ କରିଛନ୍ତି । ଭଗବାନ ଭେଙ୍କଟେଶ୍ବର ସ୍ବାମୀ ମନ୍ଦିର ଆନ୍ଧ୍ରପ୍ରଦେଶର ତିରୁପତିରେ ରହିଛି । ଏହା ଦୁନିଆର ସବୁଠାରୁ ପ୍ରସିଦ୍ଧ ଏବଂ ଧନୀ ମନ୍ଦିର ମଧ୍ୟରେ ଗଣାଯାଏ। ଏହି ମନ୍ଦିରରେ ଭଗବାନ ବିଷ୍ଣୁଙ୍କ ଅବତାର ଭେଙ୍କଟେଶ୍ବରଙ୍କୁ ସମର୍ପିତ ।