କେଜ୍ରିୱାଲ ଜେଲରେ, ସୁନୀତା ଦେଲେ ପ୍ରତିଶ୍ରୁତି, ମାଗଣା ବିଜୁଳି ପ୍ରତିମାସରେ ମହିଳାଙ୍କୁ ୧ହଜାର ଟଙ୍କା

ନୂଆଦିଲ୍ଲୀ: ଆଉ କିଛି ମାସ ପରେ ହରିୟାଣାରେ ବିଧାନସଭା ନିର୍ବାଚନ ଅନୁଷ୍ଠିତ ହେବାକୁ ଯାଉଛି । ଏଥିଲାଗି ରାଜ୍ୟରେ ରାଜନୈତିକ ମାହୋଲ ହୋଇଛି ପୁରା ଉଷ୍ମ । ବର୍ତ୍ତମାନ ଦିଲ୍ଲୀ ଓ ପଞ୍ଜାବରେ କ୍ଷମତାସୀନ ଆପ୍ ଭୋଟରଙ୍କୁ ଆକୃଷ୍ଟ କରିବା ପାଇଁ ନିଜର ଗ୍ୟାରେଣ୍ଟୀ କାର୍ଡ ଏହି ରାଜ୍ୟରେ ଜାରି କରିଛି ଆମ ଆଦମି ପାର୍ଟି ।

ଜେଲରେ ଥିବା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ପତ୍ନୀ ସୁନିତା ଆପ୍‌ର କମାଣ ସମ୍ଭାଳିବା ସହ ହରିୟାଣାବାସୀଙ୍କ ପାଇଁ 'କେଜ୍ରିୱାଲ କି ଗ୍ୟାରେଣ୍ଟୀ' କାର୍ଡ ଜାରି କରିଛନ୍ତି । ଗ୍ୟାରେଣ୍ଟୀ କାର୍ଡ ଜାରି କରି ଆପ୍ ବିଧିବଦ୍ଧ ଭାବେ ହରିୟାଣାରେ ପ୍ରଚାର ଆରମ୍ଭ କରିଛି । ହରିୟାଣାର ଲୋକଙ୍କ ପାଇଁ ସୁନୀତା ଆଦମୀ ପାର୍ଟିର ପାଞ୍ଚଟି ଗ୍ୟାରେଣ୍ଟି ଉପସ୍ଥାପନ କରିଛନ୍ତି । ଏଥିରେ ମହିଳାମାନଙ୍କୁ ମାସକୁ ୧୦୦୦ ଟଙ୍କା, ମାଗଣା ବିଦ୍ୟୁତ୍‌, ମାଗଣା ଶିକ୍ଷା ଏବଂ ଅନ୍ୟାନ୍ୟ ଗ୍ୟାରେଣ୍ଟି ଘୋଷଣା କରାଯାଇଛି ।

ହରିୟାଣାରେ ବିଧାନସଭା ନିର୍ବାଚନ ପୂର୍ବରୁ ଆମ୍ ଆଦମୀ ପାର୍ଟି ପ୍ରଚାର ଆରମ୍ଭ କରିଛି । ଏଭଳି ପରିସ୍ଥିତିରେ ଅରବିନ୍ଦ କେଜ୍ରିୱାଲଙ୍କ ପତ୍ନୀ ସୁନୀତା କେଜ୍ରିୱାଲ ହରିୟାଣାରେ ଦାୟିତ୍ୱ ଗ୍ରହଣ କରିଛନ୍ତି । ସେ ଶନିବାରହରିୟାଣାରେ ପହଞ୍ଚି ଏକ ସାଧାରଣ ସଭାରେ ସମ୍ବୋଧିତ କରିଥିଲେ । ଏହି ସମୟରେ ସେ କହିଛନ୍ତି ଯେ ଯଦି ଆପ୍ ବିଧାନସଭା ନିର୍ବାଚନରେ ଜିତେ ତେବେ ମହିଳାଙ୍କୁ ପ୍ରତି ମାସରେ ୧୦୦୦ଟଙ୍କା ଦିଆଯିବ । ଏହା ସହିତ ସେ ପାଞ୍ଚଟି ବଡ ଗ୍ୟାରେଣ୍ଟି ଉପସ୍ଥାପନ କରିଛନ୍ତି ।

ପ୍ରଥମ ଗ୍ୟାରେଣ୍ଟି-୨୪ ଘଣ୍ଟା ମାଗଣା ବିଦ୍ୟୁତ୍ ଉପଲବ୍ଧ ହେବ । ଦିଲ୍ଲୀ ଏବଂ ପଞ୍ଜାବ ପରି ସମସ୍ତ ପୁରୁଣା ଘରୋଇ ବିଦ୍ୟୁତ୍ ବକେୟା ଛାଡ କରାଯିବ ।

ଦ୍ୱିତୀୟ ଗ୍ୟାରେଣ୍ଟି- ସମସ୍ତଙ୍କୁ ଉନ୍ନତ ମାନର ଏବଂ ମାଗଣା ଚିକିତ୍ସା ଯୋଗାଇ ଦିଆଯିବ । ଦିଲ୍ଲୀ ଏବଂ ପଞ୍ଜାବ ଭଳି ପ୍ରତ୍ୟେକ ଗ୍ରାମ ଏବଂ ସହରର ପ୍ରତ୍ୟେକ ଅଞ୍ଚଳରେ ମୋହଲ୍ଲା କ୍ଲିନିକ୍ ନିର୍ମାଣ ହେବ । ସମସ୍ତ ସରକାରୀ ଡାକ୍ତରଖାନାକୁ ନବୀକରଣ କରାଯିବ । ପରୀକ୍ଷା, ଔଷଧ, ଅପରେସନ୍ ଏବଂ ଚିକିତ୍ସା ମାଗଣା ହେବ

ତୃତୀୟ ଗ୍ୟାରେଣ୍ଟି - ଭଲ, ଉତ୍କୃଷ୍ଟ ଏବଂ ମାଗଣା ଶିକ୍ଷା ଯୋଗାଇ ଦିଆଯିବ । ଦିଲ୍ଲୀ ଏବଂ ପଞ୍ଜାବ ପରି ଶିକ୍ଷା ମାଫିଆକୁ ସମାପ୍ତ କରିବ । ଆମେ ସରକାରୀ ବିଦ୍ୟାଳୟଗୁଡ଼ିକୁ ଏତେ ଭଲ କରିବୁ ଯେ ତୁମେ ତୁମ ପିଲାମାନଙ୍କୁ ଘରୋଇ ବିଦ୍ୟାଳୟରୁ ବାହାର କରି ସରକାରୀ ବିଦ୍ୟାଳୟରେ ନାମ ଲେଖାଇବ । ବେସରକାରୀ ବିଦ୍ୟାଳୟଗୁଡ଼ିକର ଗୁଣ୍ଡାଗର୍ଦ୍ଦିକୁ ମଧ୍ୟ ଆମେ ବନ୍ଦ କରିବୁ । ବେସରକାରୀ ବିଦ୍ୟାଳୟଗୁଡ଼ିକର ବେଆଇନ ଫିସ୍ ବୃଦ୍ଧିକୁ ବନ୍ଦ କରାଯିବ ।

ଚତୁର୍ଥ ଗ୍ୟାରେଣ୍ଟି- ସମସ୍ତ ମା ଏବଂ ଭଉଣୀମାନଙ୍କୁ ପ୍ରତି ମାସରେ ୧୦୦୦ ଟଙ୍କା ଦିଆଯିବ

ପଞ୍ଚମ ଗ୍ୟାରେଣ୍ଟି- ପ୍ରତ୍ୟେକ ଯୁବବର୍ଗଙ୍କୁ ନିଯୁକ୍ତି ପ୍ରଦାନ କରାଯିବ । ଆମେ ପ୍ରତ୍ୟେକ ବେକାର ଯୁବବର୍ଗମାନଙ୍କ ପାଇଁ ରୋଜଗାରର ବ୍ୟବସ୍ଥା କରିବୁ ।