ଆପ୍ କଲା ବଡ଼ ଦାବି, ପଞ୍ଜାବ ମୁଖ୍ୟମନ୍ତ୍ରୀଙ୍କ ଦିଲ୍ଲୀ ବାସଭବନରେ....

ଦିଲ୍ଲୀ ବିଧାନସଭା ନିର୍ବାଚନକୁ ଆଉ ମାତ୍ର ସପ୍ତାହେ ବାକି । ନିର୍ବାଚନ ଦିନ ଯେତେ ପାଖେଇ ଆସୁଛି ଜାତୀୟ ରାଜଧାନୀରେ ନିର୍ବାଚନୀ ପ୍ରଚାର ଉଷ୍ମତା ସେତେ ବଢ଼ି ବଢ଼ି ଚାଲିଛି । ୭୦ ବିଧାନସଭା ଆସନ ପାଇଁ ହେବାକୁ ଯାଉଥିବା ଏହି ଭୋଟରେ ଆମ ଆଦମୀ ପାର୍ଟି, ବିଜେପି ଓ କଂଗ୍ରେସ ମଧ୍ୟରେ ଏକ ତ୍ରିମୁଖି ଲଢେଇ ଦେଖିବାକୁ ମିଳିବ । କିଏ ଜିତିବ ଦିଲ୍ଲୀର ଦିଲ୍ ? ଏହି ପ୍ରତିଯୋଗିତା ମୂଳକ ନିର୍ବାଚନରେ ରାଜନୈତିକ ଦଳଗୁଡିକ ପରସ୍ପର ବିରୋଧୀ ଆଭିମୁଖ୍ୟ ଏବଂ ତୁ ତୁ ମେଁ ମେଁ ରଣନୀତି ଆପଣାଉଛନ୍ତି । ଆଉ ଏଭଳି ମାହୋଲ ମଧ୍ୟରେ ଶାସକ ଆମ ଆଦମୀ ପାର୍ଟି (AAP)ର ଦାବି ଏକ ଚାଞ୍ଚଲ୍ୟ ସୃଷ୍ଟି କରିଛି। ଆପ ଦାବି କରିଛି ଯେ ନିର୍ବାଚନ କମିଶନଙ୍କ ଟିମ୍ ଦିଲ୍ଲୀରେ ପଞ୍ଜାବ ମୁଖ୍ୟମନ୍ତ୍ରୀ ଭଗବନ୍ତ ମାନଙ୍କ ସରକାରୀ ବାସଭବନରେ ଚଢାଉ କରିଛି।

ସୂଚନା ଅନୁଯାୟୀ, ଆପ ପଞ୍ଜାବ ମୁଖ୍ୟମନ୍ତ୍ରୀ ଭଗବନ୍ତ ମାନଙ୍କୁ ନେଇ ଏହି ବଡ ଦାବି ହୋଇଛି। ଦାବି ଅନୁଯାୟୀ, ନିର୍ବାଚନ କମିଶନର ଦଳ ଦିଲ୍ଲୀରେ ପଞ୍ଜାବ ମୁଖ୍ୟମନ୍ତ୍ରୀ ଭଗବନ୍ତ ମାନଙ୍କ ସରକାରୀ ବାସଭବନରେ ଚଢାଉ କରିଛନ୍ତି। ଆପ ଆହୁରି ଦାବି କରିଛି ଯେ ନିର୍ବାଚନ କମିଶନଙ୍କ ଦଳ ମୁଖ୍ୟମନ୍ତ୍ରୀ ମାନଙ୍କ କପୁରଥଲାସ୍ଥିତ ଘରକୁ ଖୋଜାଖୋଜି କରିବା ପାଇଁ ପହଞ୍ଚିଥିଲେ। ନିର୍ବାଚନ ପାଇଁ ଭଗବନ୍ତ ମାନ ଦିଲ୍ଲୀରେ ନିରନ୍ତର ପ୍ରଚାର କରୁଛନ୍ତି। ସେ ଆମ ଆଦମୀ ପାର୍ଟି ପ୍ରାର୍ଥୀଙ୍କ ପାଇଁ ଭୋଟ ମାଗୁଛନ୍ତି। ଏହା ବ୍ୟତୀତ, ସେମାନେ ଦଳର ଏଜେଣ୍ଡାକୁ ଜନସାଧାରଣଙ୍କ ନିକଟରେ ପହଞ୍ଚାଇବାକୁ ମଧ୍ୟ ଚେଷ୍ଟା କରୁଛନ୍ତି। ପଞ୍ଜାବ ମୁଖ୍ୟମନ୍ତ୍ରୀ ମାନ ଦିଲ୍ଲୀର କପୁରଥଲା ହାଉସରେ ରୁହନ୍ତି।

ଭଗବନ୍ତ ମାନଙ୍କ ଦିଲ୍ଲୀସ୍ଥିତ ସରକାରୀ ବାସଭବନରେ ଚଢାଉ କୌଣସି କାରଣ ବିନା କରାଯାଇ ନଥିଲା। ସୂତ୍ର ଅନୁଯାୟୀ ନିର୍ବାଚନ କମିଶନଙ୍କୁ ଏକ ଗମ୍ଭୀର ଅଭିଯୋଗ ମିଳିଥିଲା। କମିଶନଙ୍କୁ ସି ଭିଜନ୍ ଆପ୍ ମାଧ୍ୟମରେ ଏକ ଅଭିଯୋଗ ମିଳିଥିଲା, ଯାହା ଅନୁଯାୟୀ ସେଠାରେ ଟଙ୍କା ବଣ୍ଟନ କରାଯାଉଥିଲା। ଅଭିଯୋଗ ଆଧାରରେ, FST (ଫ୍ଲାଇଂ ସ୍କ୍ୱାଡ୍ ଟିମ୍) କପୁରଥଲା ହାଉସରେ ଚଢାଉ କରିବାକୁ ପହଞ୍ଚିଥିଲା। ବର୍ତ୍ତମାନ ଏହି ଘଟଣାର ତଦନ୍ତ କରାଯାଉଛି।