ତେଜସ୍ୱୀ-ରାହୁଲଙ୍କ ଖେଳ ବିଗାଡ଼ିବାକୁ ଯୋଜନା,୧୦୦ ଆସନରେ ଲଢ଼ିବ ଅୱେସୀଙ୍କ ଏଆଇଏମ୍‌ଆଇଏମ୍‌

ବିହାର ବିଧାନସଭା ନିର୍ବାଚନ-୨୦୨୫ରେ ଅସଉଦ୍ଦିନ ଅୱେସୀଙ୍କ ଅଲ୍‌ ଇଣ୍ଡିଆ ମଜଲିସ-ଏ-ଇତ୍ତେହାଦୁଲ ମୁସଲମିନ (ଏଆଇଏମ୍‌ଆଇଏମ୍‌) ୧୦୦ ଆସନରେ ପ୍ରାର୍ଥୀ ଦେବାକୁ ଘୋଷଣା କରିଛି। ଏହା ୨୦୨୦ରେ ଲଢ଼ିଥିବା ୨୦ ଆସନଠାରୁ ପାଞ୍ଚ ଗୁଣ ଅଧିକ। ଏହି ନିଷ୍ପତ୍ତି ଏନ୍‌ଡିଏ (ବିଜେପି-ଜେଡିୟୁ) ଓ ଇଣ୍ଡି ମେଣ୍ଟ (ଆର୍‌ଜେଡି-କଂଗ୍ରେସ) ବିରୋଧରେ ଏକ ତୃତୀୟ ବିକଳ୍ପ ଗଢ଼ିବା ଲକ୍ଷ୍ୟରେ ନିଆଯାଇଛି ବୋଲି ଦଳ କହିଛି। ଏଆଇଏମ୍‌ଆଇଏମ୍‌ ରାଜ୍ୟ ସଭାପତି ଅଖ୍‌ତରୁଲ ଇମାନ କହିଛନ୍ତି, ଆର୍‌ଜେଡି ନେତା ଲାଲୁ ପ୍ରସାଦ ଓ ତେଜସ୍ୱୀ ଯାଦବଙ୍କୁ ମେଣ୍ଟ ପାଇଁ ଚିଠି ଲେଖାଯାଇଥିଲା, କିନ୍ତୁ ଜବାବ ନ ମିଳିବାରୁ ଏକାକୀ ଲଢ଼ିବା ନିଷ୍ପତ୍ତି ନିଆଯାଇଛି।

ସୂଚନାଯୋଗ୍ୟ, ୨୦୨୦ରେ ଏଆଇଏମ୍‌ଆଇଏମ୍‌ ୨୦ ଆସନରେ ଲଢ଼ି ୫ଟି ଜିତିଥିଲା। ସୀମାଞ୍ଚଳ (କିଶନଗଞ୍ଜ, କଟିହାର, ଅରରିଆ, ପୂର୍ଣ୍ଣିଆ)ରେ ଦଳକୁ ଏହି ସଫଳତା ମିଳିଥିଲା। ସେଠାରେ ମୁସଲମାନ ଭୋଟର ୫୫%ରୁ ଅଧିକ। ୨୦୨୨ରେ ଦଳର ୪ ବିଧାୟକ ଆର୍‌ଜେଡିରେ ସାମିଲ ହୋଇଥିବାରୁ ଏହା ଅୱେସୀଙ୍କ ପାଇଁ ବହୁତ ବଡ଼ ଝଟ୍‌କା ଥିଲା। ଏବେ ଅୱେସୀ ସୀମାଞ୍ଚଳ ବାହାରେ ମିଥିଳାଞ୍ଚଳ ଓ ମୁସଲମାନ-ପ୍ରଭାବିତ ୪୭ ଆସନରେ ଫୋକସ୍‌ କରୁଛନ୍ତି, ଯେଉଁଠି ମୁସଲମାନ ଭୋଟ ୨୦-୪୦% ରହିଛି। ବିହାରର ୧୭.୭% ମୁସଲମାନ ଭୋଟ ୪୭ ଆସନରେ ନିର୍ଣ୍ଣାୟକ ହେବ ବୋଲି କୁହାଯାଉଛି। ଏଆଇଏମ୍‌ଆଇଏମ୍‌ର ନୂଆ ରଣନୀତି ତେଜସ୍ୱୀ-ରାହୁଲଙ୍କ ଇଣ୍ଡି ମେଣ୍ଟର ତଥାକଥିତ ଧର୍ମନିରପେକ୍ଷ ଭୋଟ ବିଭାଜନ କରିପାରେ ଏବଂ ଏହା ଏନ୍‌ଡିଏକୁ ଫାଇଦା ଦେବ ବୋଲି କୁହାଯାଉଛି।