ବଙ୍ଗୋପସାଗରକୁ ମାଡ଼ିଆସୁଛି ୧୦,୦୦୦ କିଲୋମିଟରର ମହାବଳୟ ! ଜୁଲାଇ ଶେଷ ସପ୍ତାହରେ ହେବ ପ୍ରବଳ ବର୍ଷା
ଦେଶର ଅନେକ ଅଞ୍ଚଳରେ ମୌସୁମୀ ବର୍ଷା ଦୁର୍ବଳ ହେବା ଯୋଗୁଁ ଚିନ୍ତାରେ ଥିବା ଚାଷୀ। ଏହାରି ଭିତରେ ଭଲ ଖବର ସାମ୍ନାକୁ ଆସିଛି। ଭାରତଠାରୁ ପ୍ରାୟ ୭,୦୦୦ ରୁ ୧୦,୦୦୦ କିଲୋମିଟର ପୂର୍ବରେ ବଙ୍ଗୋପସାଗରରୁ କେନ୍ଦ୍ରୀୟ ପ୍ରଶାନ୍ତ ମହାସାଗର ପର୍ଯ୍ୟନ୍ତ ଏକ ବିଶାଳ ପାଣିପାଗ ପ୍ରଣାଳୀ ସକ୍ରିୟ ହୋଇଛି। ବିଜ୍ଞାନ ଭାଷାରେ ଏହାକୁ ଆନ୍ତଃଉଷ୍ଣୀୟ ଅଭିସରଣ କ୍ଷେତ୍ର ବା ITCZ (Intertropical Convergence Zone) କୁହାଯାଏ। ଏହି ଜୋନ୍ ଏବେ ଭାରତ ଆଡ଼କୁ ଗତି କରୁଥିବାରୁ ଜୁଲାଇ ଶେଷ ସପ୍ତାହରେ ଦେଶରେ ବ୍ୟାପକ ବର୍ଷା ହେବାର ସମ୍ଭାବନା ସୃଷ୍ଟି ହୋଇଛି।
ITCZ ହେଉଛି ପୃଥିବୀର ବିଷୁବରେଖା ଚାରିପାଖରେ ଥିବା ବାୟୁର ଏକ ପ୍ରମୁଖ ସଂଗମସ୍ଥଳ। ଏଠାରେ ଉତ୍ତର ଓ ଦକ୍ଷିଣ ଗୋଲାର୍ଦ୍ଧରୁ ଆସୁଥିବା ପବନ ପରସ୍ପର ସହ ଧକ୍କା ଖାଆନ୍ତି। ଏହାଫଳରେ ଉଷ୍ମ ଓ ଆର୍ଦ୍ର ବାୟୁ ଉପରକୁ ଉଠି ପ୍ରବଳ ମେଘ ସୃଷ୍ଟି କରେ ଏବଂ ବର୍ଷା କରାଏ। ସାଧାରଣତଃ ମୌସୁମୀ ସମୟରେ ଏହା ଭାରତ ଉପରେ ରହିଥାଏ, କିନ୍ତୁ Global Warming, ସମୁଦ୍ର ପୃଷ୍ଠର ତାପମାତ୍ରା ବୃଦ୍ଧି ଏବଂ ପ୍ରଶାନ୍ତ ମହାସାଗରରେ 'ଲା ନିନା' ପରିସ୍ଥିତି ଯୋଗୁଁ ଏଥର ଏହା ବହୁତ ପୂର୍ବ ଦିଗରେ ଗଠିତ ହୋଇଛି।
ପାଣିପାଗ ବିଭାଗ ଏବଂ ଆନ୍ତର୍ଜାତୀୟ ମଡେଲଗୁଡ଼ିକର ପୂର୍ବାନୁମାନ ଅନୁଯାୟୀ, ଏହି ITCZ ବଳୟ ମଧ୍ୟରେ ଅନେକ ଉଷ୍ଣକଟିବନ୍ଧୀୟ ଲଘୁଚାପ ପ୍ରଣାଳୀ ସକ୍ରିୟ ଅଛନ୍ତି, ଯାହା ଧୀରେ ଧୀରେ ପଶ୍ଚିମ ଦିଗରେ ବଙ୍ଗୋପସାଗର ଆଡ଼କୁ ମାଡ଼ି ଆସୁଛନ୍ତି। ଜୁଲାଇ ୨୦ ରୁ ୩୦ ତାରିଖ ମଧ୍ୟରେ ଏହି ପ୍ରଣାଳୀ ଭାରତୀୟ ଉପମହାଦେଶକୁ ପ୍ରଭାବିତ କରିବ। ବିଶେଷ କରି ଓଡ଼ିଶାର ପଡ଼ୋଶୀ ରାଜ୍ୟ ବିହାର, ଝାଡ଼ଖଣ୍ଡ, ପୂର୍ବ ଉତ୍ତର ପ୍ରଦେଶ, ମଧ୍ୟପ୍ରଦେଶ ଏବଂ ରାଜସ୍ଥାନ ଭଳି ଅଞ୍ଚଳରେ ଦୁର୍ବଳ ମୌସୁମୀ ପୁଣି ସକ୍ରିୟ ହେବ ଏବଂ ଭଲ ବର୍ଷା ହେବ।
ଏହି ପ୍ରଣାଳୀ କେତେ ଶକ୍ତିଶାଳୀ ହେବ ତାହା ସମ୍ପୂର୍ଣ୍ଣ ସ୍ପଷ୍ଟ ହୋଇନଥିଲେ ମଧ୍ୟ, ଏହା ମଧ୍ୟରୁ ଗୋଟିଏ କିମ୍ବା ଦୁଇଟି ସିଷ୍ଟମ୍ ଘୂର୍ଣ୍ଣିଝଡ଼ (Cyclone) କିମ୍ବା ପ୍ରବଳ ଲଘୁଚାପରେ ପରିଣତ ହେବାର ସମ୍ଭାବନାକୁ ଏଡ଼ାଇ ଦିଆଯାଇପାରିବ ନାହିଁ।
Click it and Unblock the Notifications
Sign in with Google