ଦିଲ୍ଲୀ ନିର୍ବାଚନ ପାଇଁ କଡାକଡି ସୁରକ୍ଷା ବ୍ୟବସ୍ଥା, ମୁତୟନ ହେଲେ ୪୨୦୦୦ ପୋଲିସ ଫୋର୍ସ

ନୂଆଦିଲ୍ଲୀ: ରାତି ପାହିଲେ ଦିଲ୍ଲୀରେ ପଡିବ ଭୋଟ । ଜନତା ବାଛିବେ ପସନ୍ଦର ନେତା । ଗତକାଲି ପ୍ରଚାର ଶେଷ ହୋଇଛି ଆଉ ଆସନ୍ତାକାଲି ଅର୍ଥାତ ୫ ତାରିଖକୁ ଅପେକ୍ଷା ରହିଛି । ଆସନ୍ତାକାଲି ଭୋଟ୍ ପଡିବାକୁ ଥିବା ବେଳେ ଏହାରି ଭିତରେ କଡାକଡି ହୋଇଛି ଦିଲ୍ଲୀର ସୁରକ୍ଷା ବ୍ୟବସ୍ଥା । ଦିଲ୍ଲୀ ବିଧାନସଭା ନିର୍ବାଚନକୁ ଶାନ୍ତି ଶୃଙ୍ଖଳାରେ କରିବା ପାଇଁ ସୁରକ୍ଷା ବ୍ୟବସ୍ଥାକୁ କଡାକଡି କରାଯାଇଛି । ସବୁ ସମ୍ୱେଦନଶୀଳ ବୁଥରେ ଅଧିକ ପୋଲିସଙ୍କୁ ମୁତୟନ କରିବା ପାଇଁ ବ୍ୟବସ୍ଥା କରାଯାଇଛି ।

ତେବେ ଦିଲ୍ଲୀ ନିର୍ବାଚନକୁ ଶାନ୍ତି ଶୃଙ୍ଖଳାରେ କରିବା ପାଇଁ ୧୫୦ ପାରାମିଲିଟ୍ରି ଫୋର୍ସ ଏବଂ ୪୨ ହଜାରରୁ ଅଧିକ ପୋଲିସ କର୍ମୀଙ୍କୁ ମୁତୟନ କରାଯାଇଛି । ପାଖାପାଖି ୩ ହଜାର ମତଦାନ କେନ୍ଦ୍ରକୁ ସମ୍ୱେଦନଶୀଳ କେନ୍ଦ୍ରଭାବେ ତାଲିକାଭୂକ୍ତ କରାଯାଇଛି । ଏହି ସମ୍ୱେଦନଶୀଳ ମତଦାନ କେନ୍ଦ୍ର ଗୁଡିକରେ ଅତିରିକ୍ତ ପୋଲିସ ଫୋର୍ସ ମୁତୟନ ପାଇଁ ବ୍ୟବସ୍ଥା କରାଯାଇଛି । ସବୁଠୁ ବଡ କଥା ହେଉଛି ମତଦାନ କେନ୍ଦ୍ର ଉପରେ ଡ୍ରୋନ୍ ସାହାଯ୍ୟରେ ବି ନଜର ରଖାଯିବାର ବ୍ୟବସ୍ଥା କରାଯାଇଛି । ଡ୍ରୋନ୍ ସର୍ଭିଲାନ୍ସରେ ରହିବ ସମ୍ୱେଦନଶୀଳ ବୁଥ୍ ।

ଦିଲ୍ଲୀର ୪୩ଟି ମୁଖ୍ୟ ଓ ୧୦୦ଟି କ୍ଷୁଦ୍ର ସୀମାନ୍ତ ନିକଟବର୍ତ୍ତୀ ପୋଷ୍ଟଗୁଡିକରେ ସୁରକ୍ଷା ନିମନ୍ତେ ଯାଞ୍ଚ, ତଦାରଖ ଓ ସମୟାନୁକ୍ରମିକ ଯାଞ୍ଚ ପାଇଁ ସୁରକ୍ଷା କର୍ମୀ ମାନେ ନିଯୁକ୍ତ ହୋଇଛନ୍ତି। ଏହା ସହିତ ପଡୋଶୀ ରାଜ୍ୟର ସୁରକ୍ଷାକର୍ମୀ ତଥା ପୋଲିସ ମାନଙ୍କ ସହିତ ମିଳିତ ଯାଞ୍ଚ ତଥା ସମ୍ବେଦନଶିଳ ଅଞ୍ଚଳରେ ବର୍ଦ୍ଧିତ ସୁରକ୍ଷା ପାଇଁ ଯୋଗ ଦେବେ। କେବଳ ଏତିକି ନୁହେଁ ଯାଞ୍ଚ ଓ ତଦାରଖ ପାଇଁ ସ୍ୱତନ୍ତ୍ର ଡ୍ରୋନର ବ୍ୟବସ୍ଥା କରାଯାଇଛି।