ଜାମ୍ମୁ କାଶ୍ମୀରରେ ସୁରକ୍ଷାକର୍ମୀଙ୍କର ବଡ଼ ସଫଳତା, ଏନକାଉଣ୍ଟରରେ ୪ ଆତଙ୍କୀ ନିପାତ

Updated: Tuesday, July 18, 2023, 10:57 [IST]

Jammu Kashmir Encounter: ଜାମ୍ମୁ କାଶ୍ମୀରର ପୁଞ୍ଚରେ ସୁରକ୍ଷା ବାହିନୀର ବଡ଼ ସଫଳତା । ସୋମବାର (ଜୁଲାଇ 17) ଏନକାଉଣ୍ଟରରେ ସୁରକ୍ଷା ବାହିନୀ ୪ ଆତଙ୍କବାଦୀଙ୍କୁ ନିପାତ କରିଛନ୍ତି । ସୂଚନା ଅନୁଯାୟୀ, ସିନ୍ଧ୍ରା ଅଞ୍ଚଳରେ କିଛି ଆତଙ୍କବାଦୀ ଲୁଚି ରହିଥିବା ଖବର ପାଇ ଜାମ୍ମୁ କାଶ୍ମୀର ପୋଲିସ ଏବଂ ସୁରକ୍ଷା ବାହିନୀର ମିଳିତ ସର୍ଚ୍ଚ ଅପରେସନ ଆରମ୍ଭ ହୋଇଥିଲା ।

ଭାରତୀୟ ସେନା ଅଧିକାରୀଙ୍କ ଅନୁସାରେ, ପୁଞ୍ଚର ସିନ୍ଧରା ଅଞ୍ଚଳରେ ମିଳିତ ଅପରେସନରେ ସୁରକ୍ଷା ବାହିନୀଙ୍କ ଗୁଳିରେ ୪ ଆତଙ୍କବାଦୀଙ୍କର ମୃତ୍ୟୁ ହୋଇଛି । ସୁରକ୍ଷା ବାହିନୀ ଏବଂ ଆତଙ୍କବାଦୀଙ୍କ ମଧ୍ୟରେ ପ୍ରଥମ ମୁକାବିଲା ସୋମବାର ରାତି ପ୍ରାୟ ୧୧.୩୦ରେ ଆରମ୍ଭ ହୋଇଥିଲା ।

ଡ୍ରୋନ ଦ୍ୱାରା ଆତଙ୍କବାଦୀଙ୍କ ଉପରେ ନଜର ରଖାଯାଇଥିଲା । ଏହାପରେ ପୁଣି ମଙ୍ଗଳବାର ସକାଳେ ସୁରକ୍ଷା ବାହିନୀ ଏବଂ ଆତଙ୍କବାଦୀଙ୍କ ମଧ୍ୟରେ ଗୁଳି ବିନିମୟ ହୋଇଥିଲା। ଏହି ଅପରେସନରେ ନିହତ ହୋଇଥିବା ଆତଙ୍କବାଦୀଙ୍କୁ ଏପର୍ଯ୍ୟନ୍ତ ଚିହ୍ନଟ କରାଯାଇ ନାହିଁ। ସମସ୍ତ ଆତଙ୍କବାଦୀ ବିଦେଶୀ ବୋଲି ସୂଚନା ରହିଛି ।

ଏହା ପୂର୍ବରୁ ଜୁନ୍ ୨୩ରେ ମଧ୍ୟ ସୁରକ୍ଷା ବାହିନୀକୁ ଏକ ବଡ ସଫଳତା ମିଳିଥିଲା । କୁପୱାରାରେ ସେନା ଗୁଳିରେ ଚାରି ଆତଙ୍କବାଦୀ ନିହତ ହୋଇଥିଲେ । ଏହା ସହ ଆତଙ୍କବାଦୀଙ୍କ ନିକଟରୁ ବିପୁଳ ପରିମାଣର ଗୁଳି ଜବତ କରାଯାଇଛି ବୋଲି ପୋଲିସ ପକ୍ଷରୁ ସୂଚନା ରହିଛି । ଏହି ଘଟଣା ପରଠାରୁ, LoCର ସୁରକ୍ଷା ବଢାଇ ଦିଆଯାଇଛି ।