୨୦୦ କିଲୋର ରୁପା ଇଟା ଚୋରି ; ଚମ୍ପତ ରାୟ ଓ ଅନିଲ ମିଶ୍ରାଙ୍କ ଇସ୍ତଫା

Published: Saturday, June 27, 2026, 14:09 [IST]

ଅଯୋଧ୍ୟା ଶ୍ରୀରାମ ମନ୍ଦିର ଦାନ ଅର୍ଥ ଆତ୍ମସାତ୍ କରିବା ଘଟଣାରେ ଗିରଫ ହୋଇଥିବା ୮ ଅଭିଯୁକ୍ତଙ୍କୁ ସ୍ଥାନୀୟ ଅଦାଲତ ୩ ଦିନ ପାଇଁ ବିଚାର ବିଭାଗୀୟ ହାଜତକୁ ପଠାଇ ଦେଇଛନ୍ତି। ଅଭିଯୁକ୍ତମାନେ ଏବେ ଜେଲ୍‌ରେ ରହିବେ। ସୋମବାର ସେମାନଙ୍କୁ ପୁନର୍ବାର କୋର୍ଟରେ ହାଜର କରାଯିବ। ଜେଲ୍‌ ଯାଇଥିବା ଅଭିଯୁକ୍ତମାନେ ହେଲେ ଅବିନାଶ ଶୁକ୍ଳା, ଅନୁକଳ୍ପ ମିଶ୍ରା, ମନୀଷ ଯାଦବ, ରାମଶଙ୍କର ମିଶ୍ରା, ରାମଶଙ୍କର ଯାଦବ ଓରଫ ଟିନ୍ନୁ, ସୁଭାଷ ଚନ୍ଦ୍ର ଶ୍ରୀବାସ୍ତବ, କରୁଣେଶ ପାଣ୍ଡେ ଓ ଲବକୁଶ ମିଶ୍ରା। ଏହିସବୁ ଅଭିଯୁକ୍ତଙ୍କ ବିରୋଧରେ ଗୁରୁବାର ପୁଲିସ ନିକଟରେ ଏତଲା ଦାୟର କରାଯାଇଥିଲା।

ଅନ୍ୟପଟେ ତଦନ୍ତକାରୀ ଅଧିକାରୀମାନେ ଅଭିଯୁକ୍ତଙ୍କ ଠାରୁ ୭୯.୮୫ ଲକ୍ଷ ଟଙ୍କା ଜବତ କରିଛନ୍ତି। ସୁଭାଷ ଶ୍ରୀବାସ୍ତବଙ୍କ ଛାଡି ଅନ୍ୟ ୭ ଅଭିଯୁକ୍ତଙ୍କ ଠାରୁ ଏହି ଟଙ୍କା ଜବତ କରାଯାଇଛି। ତଦନ୍ତରୁ ଜଣାଯାଇଛି ଯେ ଗିରଫ ଅଭିଯୁକ୍ତଙ୍କ ମଧ୍ୟରୁ ୬ଜଣ ମନ୍ଦିରକୁ ମିଳୁଥିବା ଦାନ ଅର୍ଥ ଗଣତି ନିମନ୍ତେ ନିଯୁକ୍ତ ଏକ ବ୍ୟାଙ୍କର ଆଉଟ ସୋର୍ସିଂ ଏଜେନ୍ସି ସହିତ ଜଡିତ ଥିଲେ। ଏହି ୬ଜଣ ପ୍ରତ୍ୟକ୍ଷ ଭାବେ ଦାନ ଆକାରରେ ମିଳୁଥିବା ଅର୍ଥ ଓ ଅନ୍ୟାନ୍ୟ ମୂଲ୍ୟବାନ ସାମଗ୍ରୀକୁ ଆତ୍ମସାତ୍ କରୁଥିଲେ। ଏସ୍‌ଆଇଟି ତଦନ୍ତରୁ ଜଣାଯାଇଛି ଯେ ଦାନ ଅର୍ଥ ଓ ମୂଲ୍ୟବାନ ସାମଗ୍ରୀକୁ ଦାନ ହୁଣ୍ଡିରୁ ଗଣତି କୋଠରିକୁ ନିଆଯିବା ସମୟରେ ଲୁଟ୍ କରାଯାଉଥିଲା। ତେଣୁ ଏହା ଏକ ପରିଚାଳନାଗତ ତ୍ରୁଟି ବୋଲି କୁହାଯାଇଛି। ଏସ୍‌ଆଇଟି ପକ୍ଷରୁ ଦିଆଯାଇଥିବା ତଦନ୍ତ ରିପୋର୍ଟରୁ ଜଣାଯାଇଛି ଯେ ୧୦ ଦିନ ମଧ୍ୟରେ ୭୦ ଥର ଚୋରି ହୋଇଛି। ଏସଆଇଟି ମନ୍ଦିର ଅଡିଟ୍ ରିପୋର୍ଟକୁ ଯାଞ୍ଚ କରିଥିବାବେଳେ ସେଥିରେ ଅନେକ ତ୍ରୁଟି ଦେଖିବାକୁ ପାଇଛି। ମନ୍ଦିର ପ୍ରଶାସନ ପକ୍ଷରୁ ଯେତିକିଟି ଦାନ ହୁଣ୍ଡି ସ୍ଥାପନ କରାଯାଇଥିଲା ବାସ୍ତବରେ ମନ୍ଦିର ପରିସରରେ ତା'ଠାରୁ ଅଧିକ ହୁଣ୍ଡି ରହିଥିଲା। ଆଉ ମଧ୍ୟ ଚୋରି ହେଉଥିବା ଅଞ୍ଚଳରେ ଯଥେଷ୍ଟ ସିସିଟିଭି ଫୁଟେଜ ନଥିଲା। ଅଭିଯୋଗ ଅନୁଯାୟୀ ବିଭିନ୍ନ ବ୍ୟକ୍ତି ବିଶେଷ ଓ ସଂଗଠନ ଠାରୁ ମନ୍ଦିରକୁ ଦାନ ଆକାରରେ ମିଳିଥିବା ୨୦୦ କିଲୋର ରୁପା ଇଟା ଚୋରି ହୋଇଛି। ମନ୍ଦିର ନିର୍ମାଣ ସମୟରେ ଶିବସେନା (ୟୁବିଟି) ମୁଖ୍ୟ ଉଦ୍ଧବ ଠାକରେ ଦେଇଥିବା ୪ କିଲୋର ରୁପା ଇଟା ମଧ୍ୟ ଚୋରି ହୋଇଯାଇଥିବା ଜଣାଯାଇଛି। ରାମ ମନ୍ଦିର ଦାନ ଅର୍ଥ ଚୋରି କରାଯାଇଥିବା ନେଇ ସମାଜବାଦୀ ପାର୍ଟିର ପୂର୍ବତନ ବିଧାୟକ ପୱନ ପାଣ୍ଡେ ପ୍ରଥମେ ଅଭିଯୋଗ କରିଥିଲେ। ପୱନଙ୍କ ଅଭିଯୋଗ ଅନୁଯାୟୀ ମନ୍ଦିର ଦାନ ଅର୍ଥରୁ ପ୍ରାୟ ୭ରୁ ସାଢେ ୭ କୋଟି ଟଙ୍କା ଚୋରି ହୋଇଛି। ଅଭିଯୋଗ ଆଧାରରେ ରାଜ୍ୟ ସରକାର ତିନି ଜଣିଆ ଏସ୍‌ଆଇଟି ଗଠନ କରିଥିଲେ। ଏସ୍‌ଆଇଟିର ତଦନ୍ତ ରିପୋର୍ଟରେ ଦାନ ଅର୍ଥ ଆତ୍ମସାତ୍ କରାଯାଇଥିବା ସ୍ପଷ୍ଟ ହେବା ପରେ ପୁଲିସରେ ଏତଲା ଦାୟର କରାଯାଇଥିଲା। ଶ୍ରୀରାମ ଜନ୍ମଭୂମି ତୀର୍ଥକ୍ଷେତ୍ର ଟ୍ରଷ୍ଟର ସଦସ୍ୟ ଶ୍ରୀ କୃଷ୍ଣ ମୋହନଙ୍କ ଅଭିଯୋଗ ଆଧାରରେ ଅଯୋଧ୍ୟାର ରାମ ଜନ୍ମଭୂମି ଥାନାରେ ମାମଲା ରୁଜୁ କରାଯାଇଥିଲା।

ଅଯୋଧ୍ୟା ଶ୍ରୀରାମ ଜନ୍ମଭୂମି ତୀର୍ଥକ୍ଷେତ୍ର ଟ୍ରଷ୍ଟର ସାଧାରଣ ସମ୍ପାଦକ ଚମ୍ପତ ରାୟ ଓ ଟ୍ରଷ୍ଟି ଅନିଲ ମିଶ୍ରା ଶୁକ୍ରବାର ନିଜ ପଦରୁ ଇସ୍ତଫା ଦେଇଛନ୍ତି। ଶ୍ରୀରାମ ମନ୍ଦିର ଦାନ ଅର୍ଥ ଆତ୍ମସାତ୍ କରାଯିବା ଘଟଣାରେ ନିଜକୁ ନୈତିକ ଭାବେ ଦାୟୀ କରି ଏହି ଦୁଇ ଜଣ ଇସ୍ତଫା ଦେଇଛନ୍ତି। ତେବେ ରାମ ମନ୍ଦିର ନିର୍ମାଣ କମିଟିର ଅଧ୍ୟକ୍ଷ ନୃପେନ୍ଦ୍ର ମିଶ୍ରା ଏହି ଘଟଣାରେ ଚମ୍ପତ ରାୟଙ୍କ ସ୍ବଚ୍ଛତାକୁ ସମ୍ମାନ ଜଣାଇଛନ୍ତି। ନୃପେନ୍ଦ୍ର ମିଶ୍ର କହିଛନ୍ତି ଯେ ଚମ୍ପତଙ୍କ ବିଶ୍ବସନୀୟତା ଉପରେ ପ୍ରଶ୍ନ ଉଠାଯାଇପାରିବ ନାହିଁ।

Published On June 27, 2026