କରୋନା ଅପଡେଟ୍ : ଲାଗୁନି କରୋନାରେ ଲଗାମ୍, ଦେଶରେ ଦୈନିକ 20, 528 ଛୁଇଁଲା ସଂକ୍ରମଣ

ଦେଶରେ ପୁଣି ବୃଦ୍ଧି ପାଇବାରେ ଲାଗିଛି କରୋନା ସଂକ୍ରମଣ । କ୍ରମାଗତ ଭାବେ ଚତୁର୍ଥ ଦିନରେ 20 ହଜାର ପାର କରିଛି ଦୈନିକ ସଂକ୍ରମଣ ।

ନୂଆଦିଲ୍ଲୀ: ଦେଶରେ ପୁଣି ବୃଦ୍ଧି ପାଇବାରେ ଲାଗିଛି କରୋନା ସଂକ୍ରମଣ । କ୍ରମାଗତ ଭାବେ ଚତୁର୍ଥ ଦିନରେ 20 ହଜାର ପାର କରିଛି ଦୈନିକ ସଂକ୍ରମଣ । ଗତ 24 ଘଣ୍ଟା ମଧ୍ୟରେ ଦେଶବ୍ୟାପୀ ମୋଟ 20,528 ଜଣ ନୂଆ ସଂକ୍ରମିତ ଚିହ୍ନଟ ହୋଇଛନ୍ତି । ସଂକ୍ରମଣ ବଢିବା ସହିତ ମୃତ୍ୟୁସଂଖ୍ୟା ମଧ୍ୟ କ୍ରମଶଃ ବୃଦ୍ଧି ପାଉଛି । 24 ଘଣ୍ଟାରେ ଦେଶରେ 49 ଜଣଙ୍କର ମୃତ୍ୟୁ ଘଟିଛି । ଏହି ତୁଳନାରେ ଗୋଟିଏ ଦିନରେ ସୁସ୍ଥଙ୍କ ସଂଖ୍ୟା 17,790 ରହିଥିବ ସ୍ବାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ସୂଚନା ଦିଆଯାଇଛି ।

ମନ୍ତ୍ରଣାଳୟର ସୂଚନା ଅନୁଯାୟୀ, ବର୍ତ୍ତମାନ ଭାରତରେ ସକ୍ରିୟ ମାମଲା ଦେଢ ଲକ୍ଷ ମୁହାଁ ହୋଇଛି । ଆଜିର ନୂଆ ସଂକ୍ରମଣକୁ ମିଶାଇ ମୋଟ ସକ୍ରିୟ ସଂକ୍ରମିତଙ୍କ ସଂଖ୍ୟା 1,43,449କୁ ବୃଦ୍ଧି ପାଇଛି । ଏଯାବତ୍ 4,30,63,651 ସଂକ୍ରମଣରୁ ସୁସ୍ଥ ହୋଇଥିବା ବେଳେ ସମୁଦାୟ 5,25,709 ଜଣଙ୍କ ମୃତ୍ୟୁ ଘଟିଛି ।

ଦେଶବ୍ୟାପୀ ସମୁଦାୟ 199.98 କୋଟିରୁ ଅଧିକ ଡୋଜ୍ ଟୀକାକରଣ କରାଯାଇଛି । ଗତ 24 ଘଣ୍ଟା ମଧ୍ୟରେ କେବଳ 25,59,840 ଜଣଙ୍କୁ ଟିକା ଦିଆଯାଇଛି । ଲୋକଙ୍କ ସୁରକ୍ଷା ପାଇଁ ଟୀକା ମଧ୍ୟ ଯଥେଷ୍ଟ ପରିମାଣରେ ଦିଆଯାଉଛି । ଏହା ସତ୍ତ୍ବେ ମଧ୍ୟ କରୋନା ମହାମାରୀରେ ଲାଗି ପାରୁନି ଲଗାମ। ଧିରେ ଧିରେ କମିବା ପରିବର୍ତ୍ତେ ବଢିବାରେ ଲାଗିଛି ସଂକ୍ରମଣ ।

English summary

An increase of 2,689 cases has been recorded in the active COVID-19 caseload in a span of 24 hours.