୩ ଦିନରେ ୧୨ଟି ବିମାନକୁ ମିଳିଲାଣି ବୋମା ଧମକ

ନୂଆଦିଲ୍ଲୀ : ବିମାନରେ ବୋମା ଥିବା ନେଇ ମିଛ ଧମକ କଲ୍‌ ବାରମ୍ବାର ଆସୁଛି। ଆଜି ପୁଣି ୨ଟି ବିମାନକୁ ବୋମା ଥିବା କଲ୍‌ ପରେ ଛନକା ପଶିଛି। ମୁମ୍ବାଇ-ଦିଲ୍ଲୀ ଇଣ୍ଡିଗୋ ଏବଂ ଦିଲ୍ଲୀ-ବେଙ୍ଗାଲୁରୁ ଆକାଶ ଏୟାର୍‌ ବିମାନକୁ ଧମକ ଆସିଛି। ଗତ ୩ ଦିନ ମଧ୍ୟରେ ଏଭଳି ୧୨ ଥର ଧମକ ମିଳିସାରିଛି । ୩ ଦିନରେ ୧୨ ବିମାନକୁ ମିଳିଲାଣି ବୋମା ଧମକ। ତେବେ ସବୁ ଧମକ ଗୁଜବ ଥିଲା। ବଡ଼ ବଡ଼ ରୁଟ୍ ରେ ଯାଉଥିବା ବିମାନ ଗୁଡ଼ିକୁ ଧମକ ମିଳୁଛି। ବୋମା ଧମକ ବିଭିନ୍ନ ଏୟାର ଲାଇନ୍ସର ନିଦ ହଜାଇ ଦେଲାଣି ।

ମୁମ୍ବାଇରୁ ଦିଲ୍ଲୀ ଉଡ଼ାଣ ଭରିଥିବା ଏକ ଇଣ୍ଡିଗୋ ବିମାନକୁ ପ୍ରଥମେ ସୋସିଆଲ ମିଡିଆରେ ଧମକ ମିଳିଥିଲା । ପରେ ଏହି ବିମାନକୁ ଅହମ୍ମଦାବାଦ ଡାଇଭର୍ଟ କରାଯାଇଥିଲା । ୨୦୦ ଯାତ୍ରୀ ଏବଂ କ୍ରିଉ ସଦସ୍ୟଙ୍କୁ ନେଇ ମୁମ୍ବାଇ ଏୟାରପୋର୍ଟରୁ ମଙ୍ଗଳବାର ରାତିରେ ଉଡ଼ାଣ ଭରିଥିଲା ଏହି ଇଣ୍ଡିଗୋ ବିମାନ । କିନ୍ତୁ ସୋସିଆଲ ମିଡିଆରେ ମିଳିଥିବା ଧମକ ପଛରେ କୌଣସି ସତ୍ୟତା ନଥିବା ନେଇ ବୁଧବାର ସ୍ପଷ୍ଟ ହୋଇଛି ।

ବାରମ୍ବାର ଏପରି ଘଟଣା ଦ୍ଵାରା ଯାତ୍ରୀମାନେ ବହୁ ଅସୁବିଧାର ସମ୍ମୁଖୀନ ହୋଇଛନ୍ତି। ତେଣୁ ସରକାର ଏହାର ତର୍ଜମା କରି ମିଥ୍ୟା କଲ୍‌ କରୁଥିବା ଅପରାଧୀଙ୍କୁ ଧରିବା ସହିତ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ଯୋଜନା କରୁଛି।